Baka di Adam nanga Eva komoto na ini a dyari fu Eden, den kisi furu pikin. A fosi boi fu den na Kain èn a ben lobi prani gron. A di fu tu boi na Abel èn a ben lobi kweki skapu.

Wan dei Kain nanga Abel tyari wan ofrandi gi Yehovah. Yu sabi san na wan ofrandi? Na wan kado gi Gado. Yehovah ben breiti nanga na ofrandi fu Abel, ma a no ben breiti nanga a di fu Kain. Dati meki Kain ati ben bron. Yehovah taigi Kain taki efu a tan mandi tapu en brada a kan du wan sani di no bun. Ma Kain no arki.

Wan dei Kain taigi Abel: ’Kon meki wi go na gron.’ Di den wawan ben de na ini a gron, Kain naki en brada kiri. San Yehovah ben o du? Yehovah strafu Kain. A seni en go libi bun fara fu en famiri. Noiti moro Kain ben mag drai kon baka.

San wi kan leri fu a tori disi? A kan taki wi e bigin mandi efu sani no e waka leki fa wi ben wani. Efu wi e firi taki wi ati e bron moro nanga moro noso efu wan sma taigi wi taki a si taki wi ati e bron, dan san wi musu du? Wantewante wi musu du wan sani fu no atibron moro, so taki wi no du ogri.

Fu di Abel ben lobi Yehovah èn a ben e du san bun, meki noiti Yehovah o frigiti en. Te Gado o meki grontapu tron wan paradijs, a o tyari Abel kon na libi baka.

Bakaten sma ben kon lai na grontapu. Furu fu den ben e du ogri. Srefi wan tu engel na hemel ben kon ogri. Den ben gowe libi hemel èn den kon na grontapu. Yu sabi fu san ede den du dati? Den ben wani teki libisma skin fu kan trow nanga umasma.

Den engel kisi manpikin nanga den umasma. Di den manpikin dati kon bigi, den ben tranga srefisrefi èn den ben e du ogri. Den ben e pina tra sma. Yehovah no ben o libi a sani disi so. Dati meki a bosroiti fu kiri den ogrisma na ini wan frudu.

Ma wan man ben de di no ben e du ogri. A ben lobi Yehovah. En nen na Noa. A ben abi wan frow nanga dri boi: Sem, Kam nanga Yafet. Ibriwan fu den boi ben abi wan frow. Yehovah ben taigi Noa fu meki wan bigi ark, so taki en nanga en osofamiri ben o tan na libi te a Frudu kon. Wan ark na wan bigi udu dosu di man tan na tapu watra. Yehovah ben taigi Noa tu fu tyari furu meti go na ini na ark, so taki den no dede ini a Frudu.

Wantewante Noa bigin bow na ark. A teki sowan 50 yari, fosi Noa nanga en osofamiri kaba bow na ark. Den bow na ark precies leki fa Yehovah taigi den. Na a ten dati Noa ben warskow den sma tu taki wan frudu ben o kon. Ma nowan sma arki en.

Now a ten ben doro fu go na ini na ark. Meki wi go luku san pasa baka dati.