BIGIN WAN TAKMAKANDRA
LES 2
Meki a takmakandra waka switi
Bijbel e taki: „Wan sani di taki na a yoisti ten, bun srefisrefi.”—Odo 15:23.
San Filipus du
1. Luku a FELEM, noso leisi Tori fu den apostel 8:30, 31. Baka dati luku den aksi disi:
Fa Filipus bigin a takmakandra?
Fu san ede disi ben de wan bun fasi fu bigin a takmakandra èn fu ferteri a man wan nyun sani di a no ben frustan ete?
San wi kan leri fu Filipus?
2. Te wi no e dwengi wan sma fu taki nanga wi, dan dati kan meki en moro makelek gi a sma fu taki fri èn fu arki a boskopu fu wi.
Du leki Filipus
3. Luku fa a situwâsi de. Wi kan sabi furu fu wan sma te wi e luku fa a e poti en fesi, fa a e tnapu noso fa a de. A gersi leki a sma wani taki nanga yu? Efu dati de so, dan kande yu kan bigin wan Bijbel takmakandra nanga wan aksi, soleki: „Yu ben sabi taki Gado e broko en ede nanga yu?” No forceer wan takmakandra nanga wan sma di no wani taki nanga yu.
4. Abi pasensi. No denki taki yu abi fu bigin taki fu Bijbel wantewante. Luku san na a yoisti momenti, so taki a takmakandra kan waka switi. Son leisi a kan taki yu musu wakti teleki wan tra leisi te yu o go baka na a sma.
5. Fiti yusrefi. Son leisi wan sma kan bigin taki fu wan sani di yu no ben ferwakti. Sobun, de klarklari fu taki fu wan sani di a sma abi fanowdu tapu a momenti dati, awinsi a no a Bijbel tori dati yu ben abi na prakseri fu taki.