Hoseya
5 “Lalelani nine baphristi,+
Lalelisisani nine ma-Israyeli,
Lalelani nine lenihlala esigodlweni,*
Ngobe nitawehlulelwa.
Nine nilugibe eMispa
Futsi nilinethi lelendlalwe eThabori.+
3 Ngiyamati Efrayimu,
Na-Israyeli angeke angibhacele.
4 Tento tabo tibenta bangakhoni kubuyela kuNkulunkulu wabo,
Ngobe banesifiso sekugwadla;*+
Futsi abafuni kuvuma kutsi mine Jehova nginguNkulunkulu wabo.
5 Kutigcabha kwa-Israyeli kube bufakazi lobumelene naye.*+
Israyeli kanye na-Efrayimu bawile ngenca yetono tabo,
Futsi Juda uwe kanye nabo.+
6 Bahamba nemhlambi wabo wetimvu, wetimbuti newetinkhomo kuze bayofuna Jehova,
Kodvwa abazange bamtfole,
Ngobe yena wabashiya.+
7 Abaketsembeki kuJehova,+
Ngobe bobabe bakhona batele bantfwana ngephandle.
Ngenyanga yinye nje, bona kanye nelive* labo batawucotfulwa.
8 Shayani luphondvo+ eGibeya, nishaye licilongo eRama!+
Hlabani umkhosi wemphi eBhethi-aveni!+ Awu Bhenjamini, hola libutfo!
9 Wena Efrayimu, utawuba yintfo leyetfusako ngelilanga lakho lekujeziswa.+
Tive taka-Israyeli sengititjelile loko lokutakwenteka.
10 Tindvuna takaJuda tifana nalabo labakhweshisa umncele.+
Intfukutselo yami ngitayitfululela kuto kuhle kwemanti.
11 Efrayimu ucindzetelekile, futsi ufihlitwe kufanele,
Ngobe bekatimisele kulandzela sitsa sakhe.+
12 Ngako ngafanana nemvunya ku-Efrayimu
Futsi ngafanana nekubola endlini yakaJuda.
13 Ngesikhatsi Efrayimu atibona kutsi uyagula, naJuda atibona kutsi unesilondza,
Efrayimu waya e-Asiriya+ futsi watfumela titfunywa enkhosini lenkhulu.
Kodvwa lenkhosi yehluleka kunelapha,
Futsi yehluleka kupholisa lesilondza.
14 Ku-Efrayimu ngitawuba njengelibhubesi lelisakhula,
Ngibe njengelibhubesi lelinemandla endlini yakaJuda.
15 Ngitawuhamba ngibuyele endzaweni yami baze batfole imiphumela yekona kwabo,
Batawutsi nasebacindzetelekile, bangifune.”+