Sifundvo 8
Kuphila Kwasekhaya Lokujabulisa Nkulunkulu
Ngusiphi sikhundla sendvodza ekhaya? (1)
Indvodza kufanele imphatse kanjani umkayo? (2)
Babe unatiphi tibopho ekhaya? (3)
Iyini indzima yamake ekhaya? (4)
Yini lefunwa nguNkulunkulu kubatali nakubantfwana? (5)
Uyini umbono weliBhayibheli ngekuhlala ngekwehlukana nekulahlana? (6, 7)
1. LiBhayibheli litsi indvodza iyinhloko yemndeni wayo. (1 Khorinte 11:3) Indvodza kufanele ibe nemfati munye. Kufanele batsatsane ngalokusemtsetfweni.—1 Thimothi 3:2; Thithusi 3:1.
2. Indvodza kufanele itsandze umkayo njengoba ititsandza yona. Kufanele imphatse ngendlela Jesu laphatsa ngayo balandzeli bakhe. (Efesu 5:25, 28, 29) Akufanele nanini imshaye umkayo, nome imphatse kabi nganome nguyiphi indlela. Esikhundleni saloko, kufanele imdvumise futsi imhloniphe.—Kholose 3:19; 1 Phetro 3:7.
3. Indvodza kufanele isebente kamatima kute inakekele umndeni wayo. Kufanele inikete umfati wayo nebantfwana kudla, kwekwembatsa, nendzawo yekuhlala. Babe kufanele ondle umndeni wakhe nangetintfo takamoya. (1 Thimothi 5:8) Uhamba embili ekusiteni umndeni wakhe ufundze ngaNkulunkulu nangetinjongo takhe.—Dutheronomi 6:4-9; Efesu 6:4.
4. Umfati kufanele abe ngumsiti lokahle wendvodza yakhe. (Genesisi 2:18) Kufanele asite indvodza yakhe ekufundziseni nasekulolongeni bantfwana babo. (Taga 1:8) Jehova ufuna kutsi umfati anakekele umndeni wakhe ngelutsandvo. (Taga 31:10, 15, 26, 27; Thithusi 2:4, 5) Kufanele abe nenhlonipho lejulile ngendvodza yakhe.—Efesu 5:22, 23, 33.
5. Nkulunkulu ufuna bantfwana balalele batali babo. (Efesu 6:1-3) Ubheke kutsi batali bafundzise futsi bayale bantfwana babo. Batali kudzingeka babe nesikhatsi banebantfwana babo, baphindze badadishe liBhayibheli nabo, kanjalo banakekele tidzingo tabo temphefumulo netakamoya. (Dutheronomi 11:18, 19; Taga 22:6, 15) Batali akufanele nanini bajezise bantfwana babo ngendlela lekhahlabetako nome lenelunya.—Kholose 3:21.
6. Nangabe indvodza nemkayo banekungevani kahle, kufanele betame kusebentisa seluleko seliBhayibheli. Lisikhutsata kutsi sibe nelutsandvo siphindze sicolelane. (Kholose 3:12-14) LiVi laNkulunkulu alikukhutsati kucatulula tinkinga letincane ngekuhlala ngekwehlukana. Kepha umfati angakhetsa kuyishiya indvodza yakhe nangabe: (1) ngenkhani ingafuni kondla umndeni wayo, (2) ineludlame kangangekutsi imphilo yakhe isengotini, nome (3) angakhoni kukhonta Jehova ngenca yekuphikisa kwayo lokwecile.—1 Khorinte 7:12, 13.
7. Indvodza nemkayo kufanele batsembeke kulomunye nalomunye. Kuphinga kusono kuNkulunkulu nakumuntfu loshade naye. (Hebheru 13:4) Kuphinga kuphela lokusizatfu lesiseBhayibhelini sekulahla lona loshade naye utsatse lomunye. (Matewu 19:6-9; Roma 7:2, 3) Jehova uyakwenyanya kutsi bantfu balahlane ngephandle kwetizatfu letiseBhayibhelini, bahambe bayotsatsa kabusha.—Malakhi 2:14-16.
[Titfombe ekhasini 16, 17]
Babe lonelutsandvo unakekela umndeni wakhe ngetintfo tenyama netakamoya
[Sitfombe ekhasini 17]
Nkulunkulu ubheke kutsi batali bafundzise bantfwana babo, baphindze babayale