Sifundvo 12

Kuhlonipha Kuphila Nengati

Kufanele sikubuke kanjani kuphila? (1) kukhipha sisu? (1)

EmaKhristu akhombisa kanjani kutsi akucilikele kuphepha? (2)

Akukalungi yini kubulala tilwane? (3)

Ngumiphi leminye imikhuba lengakhombisi kuhlonipha kuphila? (4)

Utsini umtsetfo waNkulunkulu ngengati? (5)

Lomtsetfo ukufaka ekhatsi yini kufakelwa ingati? (6)

1. Jehova unguMtfombo wekuphila. Konkhe lokuphilako kufanele kubonge Nkulunkulu ngekuphila kwako. (Tihlabelelo 36:9) Kuphila kungcwele kuNkulunkulu. Ngisho nekuphila kwemntfwana losakhula esiswini senina kuligugu kuJehova. Kubulala umntfwana lonjalo ngemabomu akukalungi emehlweni aNkulunkulu.—Eksodusi 21:22, 23; Tihlabelelo 127:3.

2. EmaKhristu eliciniso akucilikele kuphepha. Ayahlolisisa kutsi timoto nemiti yawo kuphephile yini. (Duteronomi 22:8) Tinceku taNkulunkulu atitijabulisi ngekutifaka engotini ngemabomu. Imidlalo lenebudlova lelimata labanye bantfu ngemabomu atiyidlali.—Tihlabelelo 11:5; Johane 13:35.

3. Kuphila kwetilwane nako kungcwele kuMdali. UmKhristu angatibulala tilwane kute atfole kudla, tembatfo, nome ativikele ekuguleni nasengotini. (Genesisi 3:21; 9:3; Eksodusi 21:28) Kepha akukalungi kuphatsa kabi tilwane nome kutibulala ngoba nje kungumdlalo.—Taga 12:10.

4. Kutijabulisa ngekubhema ligwayi nobe insangu nekudla tidzakamiva akufuneki kumaKhristu. Lemikhuba ayikalungi ngoba (1) isenta tigcila, (2) ilimata imitimba yetfu, futsi (3) ingcolile. (Roma 6:19; 12:1; 2 Khorinte 7:1) Kungaba lukhuni kwehlukana nalemikhuba. Kepha kufanele siyiyekele kute sijabulise Jehova.

5. Ingati nayo ingcwele emehlweni aNkulunkulu. Nkulunkulu utsi umphefumulo, nome kuphila, kusengatini. Nangabe silwane sibulewe ngekwekhanywa nobe sifele elugibeni, kufanele singadliwa. Nangabe sibulewe ngesikhali nome sidutjuliwe, kufanele siphomphiswe ngekushesha, kube ngukhona singadliwa.—Genesisi 9:3, 4; Levithikusi 17:13, 14; Imisebenti 15:28, 29.

6. Akukalungi yini kuvuma kufakelwa ingati? Khumbula kutsi Jehova ufuna sehlukane nengati. Loku kusho kutsi ngeke sifake ingati yalomunye emitimbeni yetfu, nome yetfu lebeyibekiwe. (Imisebenti 21:25) Ngako, emaKhristu eliciniso ngeke avume kufakelwa ingati. Ayatemukela letinye tindlela tekwelashwa, njengekufakwa imikhicito lete ingati. Ayafuna kuphila, kepha angeke etame kusindzisa kuphila kwawo ngekwephula imitsetfo yaNkulunkulu.—Matewu 16:25.

[Titfombe ekhasini 25]

Kute sijabulise Nkulunkulu, kufanele sikubalekele kufakelwa ingati, imikhuba lengcolile, nekutifaka engotini ngephandle kwesizatfu