Sifundvo 11

Tinkholelo Nemasiko Langamjabulisi Nkulunkulu

Nguletinjani tinkholelo nemasiko langakalungi? (1)

EmaKhristu kufanele yini akholelwe kutsi Nkulunkulu Mtsatfu Amunye? (2)

EmaKhristu eliciniso awamgubhi ngani Khisimusi, ema-Easter, nemalanga ekutalwa? (3, 4)

Labafile bangabalimata yini labaphilako? (5)

Wafela esiphambanweni yini Jesu? (6)

Kubaluleke kangakanani kujabulisa Nkulunkulu? (7)

1. Akusito tonkhe tinkholelo nome emasiko lamabi. Kepha Nkulunkulu akawemukeli nangabe avela etinkholweni temanga nome angavumelani netimfundziso teliBhayibheli.—Matewu 15:6.

2. Mtsatfu Amunye: Nkulunkulu ubantfu labatsatfu abe amunye yini—Mtsatfu Amunye? Cha! Jehova, longuBabe, “nguNkulunkulu longuye yedvwa weliciniso”. (Johane 17:3; Makho 12:29) Jesu uyiNdvodzana yaKhe yematubulo, futsi ucondziswa nguNkulunkulu. (1 Khorinte 11:3) Babe mkhulu kuneNdvodzana. (Johane 14:28) Umoya longcwele awusiye umuntfu; ungemandla Nkulunkulu lakawasebentisela kwenta intsandvo yakhe.—Genesisi 1:2; Imisebenti 2:18.

3. Khisimusi nema-Easter: Jesu akamange atalwe nga-December 25. Watalwa lapha kubo-October 1, lokusikhatsi semnyaka lapho belusi bebahlala nemihlambi yabo ngephandle ebusuku. (Lukha 2:8-12) Jesu akamange sekayalete emaKhristu kutsi akhumbule kutalwa kwakhe. Esikhundleni saloko, watjela balandzeli bakhe kutsi bakhumbule kufa kwakhe. (Lukha 22:19, 20) Khisimusi nemasiko lahambisana naye kuchamuka etinkholweni temanga takadzeni. Kuyefana nangemasiko ema-Easter, njengekusetjentiswa kwemacandza nabologwaja. EmaKhristu akucala bewangamgubhi Khisimusi nema-Easter, nalomuhla emaKhristu eliciniso awamgubhi.

4. Emalanga ekutalwa: Lokukuphela kwekugujwa kwemalanga ekutalwa lokukhulunywa ngako eBhayibhelini ngulokwentiwa bantfu lababili labebangamkhonti Nkulunkulu. (Genesisi 40:20-22; Makho 6:21, 24-27) EmaKhristu akucala bewangawagubhi emalanga ekutalwa. Lisiko lekugubha emalanga ekutalwa lichamuka etinkholweni temanga takadzeni. EmaKhristu eliciniso aphana tipho futsi abe netikhatsi letimnandzi ngaletinye tikhatsi emnyakeni.

5. Kwesaba labafile: Bantfu labafile ngeke beve nome bente lutfo. Angeke sibasite futsi ngeke basilimate (Umshumayeli 9:5, 10) Kute incenye yemuntfu lesala iphila nasekafile. Kepha ngalesinye sikhatsi, tingilosi letimbi letibitwa ngekutsi ngemademoni tenta shengatsi tingulabantfu labafile. Nome ngumaphi emasiko lahambisana nekwesaba labafile nome kubakhonta awakalungi.—Isaya 8:19

6. Siphambano: Jesu akafelanga esiphambanweni. Wafela elugodvweni lunye. Leligama lesi-Greek lelihunyushwe emaBhayibhelini lamanyenti ngekutsi “siphambano” lifane lisho lugodvo lunye kuphela. Siphambano sichamuka etinkholweni takadzeni temanga. EmaKhristu akucala bewangasisebentisi futsi angasikhonti siphambano. Wena-ke, ucabanga kutsi bekungaba kuhle kusebentisa siphambano ekukhonteni Nkulunkulu?—Dutheronomi 7:26; 1 Khorinte 10:14.

7. Kungahle kube lukhuni sibili kushiya letinye taletinkholelo nemasiko. Tihlobo nebangani bangetama kukuncenga kutsi ungatilahli tinkholelo takho. Kepha kujabulisa Nkulunkulu kubaluleke kakhulu kunekujabulisa bantfu.—Imisebenti 29:25; Matewu 10:36, 37.

[Sitfombe ekhasini 22]

Nkulunkulu akasuye Mtsatfu Amunye

[Sitfombe ekhasini 23]

Khisimusi nema-Easter kuchamuka etinkholweni temanga takadzeni

[Sitfombe ekhasini 23]

Kute sizatfu sekukhonta labafile nome sekubesaba