Bangani BaNkulunkulu Benta Lokulungile

Nawunemngani lomtsandzako futsi lomhloniphako, wetama kumlingisa. LiBhayibheli litsi: “Simakadze muhle ulungile.” (Tihlabelelo 25:8) Nasifuna kuba bangani baNkulunkulu, kufanele sente lokuhle futsi sibe ngulabalungile. LiBhayibheli litsi: “Njengobe nibantfwana baNkulunkulu, futsi naye anitsandza, yetamani kutsi nibe njengaye. Niphile imphilo yelutsandvo.” (Efesu 5:1, 2) Nati tindlela tekukwenta loko:

Bani lusito kulabanye. “Asente lokuhle kubo bonkhe bantfu.”—Galathiya 6:10.

Sebenta kametima. “Lisela alingabe liseba, kepha kunaloko alikhutsale, lisebente lokuhle ngetandla talo.”—Efesu 4:28.

Tigcine uhlobile emtimbeni nasekutiphatseni. “Bazalwane, njengobe letetsembiso titetfu, asitihlante kuko konkhe lokungcolisa umtimba nemoya, siphile imphilo yebungcwele lobuphelele ngekwesaba Nkulunkulu.”—2 Khorinte 7:1.

Phatsa emalunga emndeni wakho ngelutsandvo nangenhlonipho. “Noko-ke, akube ngulowo nalowo atsandze umkakhe, njengobe atitsandza yena, nemfati ahloniphe indvodza yakhe. Bantfwana, hloniphani batali benu.”—Efesu 5:33–6:1.

Khombisa lutsandvo kulabanye. “Batsandzekako, asitsandzaneni ngobe lutsandvo luvela kuNkulunkulu.”—1 Johane 4:7.

Hlonipha imitsetfo yelive. ‘Wonkhe umuntfu kufanele amtfobele ngenhlonipho hulumende . . . Bonkhe banikeni lokubafanele: umtselo kulofanelwe ngumtselo.’—Roma 13:1, 7.