“UMbuso Wakho Awute”

Jehova watsi: ‘Ngeke kusaba khona kukhala, buhlungu, kugula nobe kufa. Ngitawesula tonkhe tinyembeti emehlweni abo. Tintfo letindzala titawube setendlulile.’

Jehova wabeka Adamu na-Eva ensimini yase-Edeni kuze baphile ngekuthula futsi bajabule. Bekufanele bakhonte Babe wabo wasezulwini baphindze batalane bagcwalise umhlaba. Injongo yaJehova ayizange ishintje nanobe bo-Adamu na-Eva bangazange bamlalele. Kulencwadzi sibonile kutsi tonkhe tintfo Nkulunkulu latetsembisako tiyenteka. UMbuso wakhe utawuletsa tibusiso emhlabeni njengoba etsembisa Abrahama.

Ngekushesha Sathane, emadimoni akhe kanye nabo bonkhe bantfu lababi batawususwa. Bonkhe bantfu labaphilako batawukhonta Jehova. Ngeke sigule futsi sife. Esikhundleni saloko, sitawuhlala siphilile futsi sijabula. Umhlaba utawuba lipharadisi. Bonkhe bantfu batawube banemakhaya abo kanye nekudla lokwenele. Bantfu batawuba nemusa futsi batawuhlalisana ngekuthula. Tilwane tesiganga angeke tisesabe futsi natsi ngeke sitesabe.

Kutawuba mnandzi kakhulu lapho Jehova asavusa bantfu labafile. Sitawubona bantfu labafa kadzeni, lokufaka ekhatsi Abela, Nowa, Abrahama, Sara, Mosi, Ruthe, Esta kanye naDavide. Sitawusebenta kanye nabo nasesenta lomhlaba kutsi ube lipharadisi. Kunyenti kakhulu lokujabulisako lesitawube sikwenta.

Jehova ufuna kutsi ube khona. Utawumati kakhulu kunendlela lomati ngayo nyalo. Shengatsi singasondzela kakhulu kuJehova nyalo ngisho nasesikhatsini lesitako.