August

Emihlanganweni sikhunjutwa ngaloko Jehova naJesu labasentele kona. Setama kulingisa Jesu onkhe malanga kute sikhombise kutsi siyabonga ngenhlawulo. (2 Khor. 5:14, 15) Ngetulu kwaloko, siyakhutsateka kutsi simdvumise ngalokusuka enhlitiyweni Jehova ngenca yenhlawulo. Lenye indlela lesingamdvumisa ngayo kutsi siphendvule nasisemihlanganweni. Sikhombisa kutsi simtsandza kakhulu Jehova neNdvodzana yakhe nangabe sitimisele kudzela nome yini ngenca yabo. Ngalokuvamile sidzela tintfo letehlukahlukene kute sibe khona emihlanganweni. Emabandla lamanyenti aba namunye umhlangano entsambama, futsi labanyenti betfu kungenteka basuke badziniwe njengobe basuke babuya emisebentini. Lomunye umhlangano uba ngemphelasontfo ngesikhatsi labanye labaphumula ngaso. Jehova uyabona yini kutsi siyatikhandla kute sibe khona emihlanganweni ngisho noma sidziniwe? Siyaciniseka kutsi uyabona! Ecinisweni, Jehova uyibona yonkhe imetamo lesiyentako kute sibe khona njalo emihlanganweni futsi uyayijabulela.—Mak. 12:41-44. w19.01 29 ¶12-13

Jesu wahlangabetana netinkinga bantfu labahlangabetana nato. Nasi sibonelo, Jesu wakhulela emndenini lobewuphuyile. Bekasebenta nababe wakhe Josefa futsi wafundza kwenta umsebenti lomatima. (Mat. 13:55; Mak. 6:3) Kubonakala ngatsi Josefa wafa ngaphambi kwekutsi Jesu acedze umsebenti wakhe wekushumayela. Ngako Jesu bekakwati kutsi kubuhlungu kangakanani kufelwa ngumuntfu lomtsandzako. Jesu bekakwati kutsi kunjani kuba semndenini lonebantfu labanetinkholo letehlukene. (Joh. 7:5) Tintfo Jesu labhekana nato kungenteka tamsita waticondza tinkinga tebantfu kanye nendlela lebebativa ngayo. Jesu wakhombisa kutsi uyabacabangela labanye ngesikhatsi enta timangaliso. Akazange ente timangaliso ngenca yekutsi bekufanele nje atente. ‘Wahawukela’ labo lebebacindzetelekile. (Mat. 20:29-34; Mak. 1:40-42) Jesu weva buhlungu ngalebekwenteke kulabantfu, futsi wafuna kubasita.—Mak. 7:32-35; Luk. 7:12-15. w19.03 16 ¶10-11

Busuku Jesu lafa ngabo. Cabanga nje kutsi Jesu wacindzeteleka kangakanani. Bekatawuhlala etsembekile aze afe yini? Kute bekatawuba nelitsemba lekuphila phakadze kube Jesu akachubekanga etsembekile kuJehova. (Rom. 5:18, 19) Lokubaluleke kakhulu kutsi loko labekatawukwenta bekutawuhlambalata noma kungcwelise ligama laJehova. (Jobe 2:4) Ngesikhatsi adla kwekugcina nebangani bakhe labakhulu lokubaphostoli, labaphostoli baphikisana ngekutsi “ngubani lomkhulu kunabo bonkhe.” Nanobe kunjalo, Jesu akazange abatsetsise, kodvwa wachubeka abaphendvula ngemusa. Ngemusa nangesibindzi wabachazela indlela lebekufanele bacabange ngayo. Waphindze wancoma bangani bakhe ngekuchubeka bamsekela ngekwetsembeka. (Luk. 22:24-28; Joh. 13:1-5, 12-15) Singakhona kumlingisa Jesu ngekutsi sibe nemusa ngisho noma sicindzetelekile nanasikhumbula kutsi sonkhe kuyenteka sikhulume nome sente tintfo letitawuvisa labanye buhlungu. (Taga 12:18; Jak. 3:2, 5) Yetama kuncoma labanye ngebuntfu babo lobuhle.—Ef. 4:29. w19.02 11-12 ¶16-17

UMtsetfo waMosi bewuwanciphisa ematfuba ekutsi umuntfu amangalelwe ngelicala langakalenti. Ummangalelwa bekanelilungelo lekwati kutsi ngubani lommangalelako. (Dut. 19:16-19; 25:1) Ngaphambi kwekutsi abekwe licala, bekufanele kube nabofakazi lababili labaniketa bufakazi. (Dut. 17:6; 19:15) Kutsiwani ngemIsrayeli lobekente sono futsi abonwe ngumuntfu munye? Bekungakafaneli acabange kutsi ngeke ajeziswe ngelicala lalentile. Jehova bekakubonile loko lakwentile. Jehova usibonelo lesihle ngobe konkhe lakwentako kulungile. Ubanika umvuzo labaphila ngetimiso takhe letilungile, kodvwa uyabajezisa bantfu labawasebentisa kabi emagunya labanawo. (2 Sam. 22:21-23; Hez. 9:9, 10) Labanye bangenta tintfo letimbi futsi bangajeziswa, kodvwa Jehova usicinisekisa kutsi utawubehlulela ngesikhatsi lesifanele. (Taga 28:13) Nangabe bangaphendvuki, masinyane batawufundza kutsi “kuyintfo leyesabekako kuwela etandleni taNkulunkulu lophilako.”—Heb. 10:30, 31. w19.02 23-24 ¶20-21

Mosi waciniseka kutsi wetsembele kuJehova kutsi amcondzise. “Wachubeka acinile shengatsi uyambona Loyo longabonakali.” (Heb. 11:24-27) Kungakapheli tinyanga letimbili ema-Israyeli aphumile eGibhithe, asengakafiki eNtsabeni iSinayi, kwavela inkinga lenkhulu. Bantfu bakhonona ngoba bekute emanti. Bacala kububula kuMosi futsi simo saba sibi kangangekutsi Mosi wakhala kuJehova watsi: “Ngitabatsini nje labantfu? Sebasezingeni lekutsi bangangigcoba ngematje nome ngangunini.” (Eks. 17:4) Jehova wamphendvula ngekutsi amnikete ticondziso leticacile. Watsi akatsatse indvuku yakhe ashaye lelidvwala lebeliseHorebe kuze kutophuma emanti. “Mosi wenta njalo embikwebaholi bema-Israyeli.” Ema-Israyeli anatsa futsi lenkinga yacatululeka.—Eks. 17:5, 6. w18.07 13 ¶4-5

Jehova uphindze asebentise libandla kuze asidvudvute. Singakhombisa kutsi natsi siyamtsandza Jehova ngekutsi sidvudvute bazalwane nabodzadze. (1 Joh. 4:19-21) Umphostoli Pawula wakhutsata emaKhristu watsi: “Chubekani nikhutsatana futsi nakhana, njengobe nje nenta.” (1 Thes. 5:11) Lona akusiwo umsebenti walabadzala kuphela, kepha sonkhe singamlingisa Jehova naJesu ngekutsi sidvudvute bazalwane betfu nabodzadze. (Rom. 15:1, 2) Labanye labacindzetelekile nalabakhatsateke kakhulu bangadzinga lusito lwabodokotela. (Luk. 5:31) Labadzala kanye nalabanye bazalwane bayati kutsi abasibo bodokotela, kodvwa bangabasita ngekutsi babadvudvute. Sonkhe kufanele ‘sikhulume ngendlela ledvudvutako nalabacindzetelekile, sisekele lababutsakatsaka, futsi sibeketelele bonkhe bantfu.’—1 Thes. 5:14. w18.09 14 ¶10-11

Sitametsemba kakhulu Jehova nangabe simati kahle. Indlela lekuphela kwayo lesingamati kancono ngayo Jehova kutsi sitinike sikhatsi sifundze liBhayibheli siphindze sizindle ngalesikufundzako. LiBhayibheli linekwatiswa lesingakwetsemba kwendlela Nkulunkulu lavikela ngayo bantfu bakhe esikhatsini lesendlulile. Loko kusicinisekisa kutsi natsi utasivikela. Cabanga ngemfanekiso lofanelekako Isaya lawusebentisa kuze asichazele kutsi Jehova usivikela kanjani. Wafananisa Jehova nemelusi, waphindze wafananisa tikhonti taNkulunkulu nemazinyane emvu. Isaya utsi: “[Jehova] ugona emazinyane akhe ngemikhono yakhe, awasondzete edvutane nenhlitiyo yakhe.” (Isa. 40:11) Nasibona kutsi Jehova unatsi, sitiva sivikelekile. Kute akusite ungesabi ngisho nobe uhlangabetana netinkinga, cabangisisisa ngalamavi lasicinisekiso labhalwe kulombhalo welusuku walamuhla. Atakucinisa njengobe utawuhlangabetana netinkinga. w19.01 7 ¶17-18

Ikhona yini imigomo yekukhonta Nkulunkulu lotibekele yona futsi lotimisele kuyifeza? Kungenteka wetama kufundza emavesi latsite eliBhayibheli onkhe malanga, noma wetama kutfutfukisa likhono lakho lekushumayela nelekufundzisa. Utiva kanjani nangabe ubona imiphumela lejabulisako yemetamo yakho noma nangabe labanye bayibona futsi bakuncoma? Kuliciniso kutsi uyajabula ngaloko lokufezile ngobe usuke wenta loko Jehova lakufunako futsi ulingisa Jesu. (Taga 27:11) Nangabe unaka umsebenti lowentela Jehova, utawujabula futsi utawuba nenjongo ekuphileni. Umphostoli Pawula watsi: “Banini ngulabacinile, labangeke banyakatiswe, nihlale ninalokunyenti kwekukwenta emsebentini weNkhosi, nati kutsi kutikhandla kwenu akusilo lite eNkhosini.” (1 Khor. 15:58) Bantfu abayitfoli injabulo sibili nangabe balwela kufeza imigomo yebantfu balelive njengekwakha imali lenyenti noma kuba ngumuntfu lodvumile. Ngisho noma bangaphumelela, abakutfoli kwenetiseka.—Luk. 9:25. w18.12 22 ¶12-13

Davide bekakhuluma ngesikhatsi lapho khona bantfu bebatawuphila ngekuvumelana netindlela taNkulunkulu letilungile emhlabeni. (2 Phet. 3:13) Siphrofetho lesiku-Isaya 65:22 sitsi: “Njengemalanga esihlahla ayawuba njalo-ke nemalanga ebantfu bami.” Loko kusitjela kutsi bantfu batawuphila iminyaka letinkhulungwane. Incwadzi yeSembulo 21:1-4 isitjela kutsi Nkulunkulu utawuba nebantfu futsi lesinye sibusiso lasetsembisa sona kutsi “kufa ngeke kusaba khona” emhlabeni lomusha lonekulunga. Adamu na-Eva balahlekelwa lilungelo lekuphila phakadze ePharadisi, kodvwa umhlaba utawuphindze ube lipharadisi. Njengobe Nkulunkulu etsembisa, utawubabusisa bantfu emhlabeni. Davide watsi bantfu labalungile batawudla lifa lemhlaba futsi bahlale kuwo kuze kube phakadze. (Hla. 37:11) Siphrofetho lesisencwadzini ya-Isaya sisisita kutsi sisibuke ngalabovu sikhatsi lapho khona sitawujabulela kuphila emhlabeni lolipharadisi lelihle. (Isa. 11:6-9; 35:5-10; 65:21-23) Loko kutawenteka nini? Kutawenteka nakufezeka loko Jesu lakwetsembisa lesigelekece. (Luk. 23:43) Nawe ungaba khona ePharadisi. w18.12 7 ¶22-23

Angeke sikhone kuyibalekela ngalokuphelele indlela bantfu balelive labacabanga ngayo ngoba siphila kulo. Leminye imibono yabo ngeke sikhone kuyibalekela. (1 Khor. 5:9, 10) Emsebentini wekushumayela sihlangana nebantfu labakholelwa tintfo letingasilo liciniso. Nobe kunjalo, kufanele singacabangi ngendlela yabo futsi singayemukeli imibono yabo. NjengaJesu, kufanele siyibalekele imicabango lefeza injongo yaSathane. Ngetulu kwaloko, singativikela ngekutsi singatihlanganisi nebantfu labacabanga ngendlela yalelive kungenasidzingo. Nasi sibonelo, kufanele sibakhetse ngekuhlakanipha bangani betfu. LiBhayibheli lisecwayisa ngekutsi nasitihlanganisa nebantfu labangamkhonti Jehova sitawugcina sesicabanga ngendlela labacabanga ngayo. (Taga 13:20; 1 Khor. 15:12, 32, 33) Nangabe singatijabulisi ngetintfo letikhutsata kutigucukela kwemvelo, budlova nekutiphatsa lokubi, sisuke sivikela tingcondvo tetfu kutsi tingonakaliswa yimicabango ‘lemelene nelwati ngaNkulunkulu.’—2 Khor. 10:5. w18.11 21 ¶16-17

Singasikhulisa njani sifiso setfu sekuchubeka sihamba ecinisweni? Lenye indlela kuhlanganyela ngalokugcwele emsebentini wekufundzisa labanye liciniso leliseBhayibhelini. Loko kutakusita kutsi ube nelikhono lekulisebentisa kahle “liVi laNkulunkulu”, lelifananiswa nenkemba. (Ef. 6:17) Njengobe sibafundzisi, sonkhe kufanele sitimisele kutfutfukisa emakhono etfu kute ‘siphatse livi leliciniso ngendlela lefanele.’ (2 Thim. 2:15) Sitawatsandza emaciniso futsi siwacondze kahle nangabe sisita labanye bawafundze futsi balahle timfundziso temanga. Nasenta kanjalo, sifiso setfu sekuchubeka sihamba ecinisweni sitawukhula. Liciniso lisipho lesiligugu Jehova lasiphe sona. Libaluleke kakhulu kitsi ngoba lisenta sibe nebuhlobo lobuhle naBabe wetfu losezulwini. Konkhe loko Jehova lasifundzise kona kusesicalo futsi wetsembisa kutsi utawuchubeka asifundzisa kute kube phakadze. Shengatsi singalitsandza liciniso njengobe lifana nelitje leliligugu. Chubeka ‘utsenga liciniso ungalitsengisi.’—Taga 23:23. w18.11 8 ¶2; 12 ¶15-17

Ngaphambi kwaZamcolo Nowa washumayela kuze ecwayise bantfu ngenhlekelele lebeyiseta. Naka kutsi Jesu watsi: “Ngobe ngesikhatsi usengakefiki Zamcolo, bantfu bebadla, banatsa, labadvuna batsatsa, labasikati bendza, kwadzimate kwaba lilanga Nowa langena ngalo emkhunjini, futsi abazange banake kwate kwefika Zamcolo wabakhukhula bonkhe, kuyawuba njalo nekuba khona kweNdvodzana yemuntfu.” (Mat. 24:38, 39) Ngekwetsembeka, Nowa wabecwayisa bantfu ngaZamcolo ngisho nobe bebangamnaki. Lamuhla sishumayela umlayeto weMbuso kuze sinikete bantfu litfuba lekufundza ngenjongo yaNkulunkulu ngebantfu. NjengaJehova, natsi sifisa kutsi bantfu bangawulalela lomlayeto kuze bachubeke ‘baphila.’ (Hez. 18:23) Ngesikhatsi lesifanako nasishumayela emtini ngemuti nasetindzaweni letiphitsitelako, sisuke secwayisa bantfu labanyenti ngekutsi uMbuso waNkulunkulu utawufika futsi ubhubhise lelive lelinebantfu labangamhloniphi Nkulunkulu.—Hez. 3:18, 19; Dan. 2:44; Semb. 14:6, 7. w18.05 19 ¶8-9

Kufanele wente njani nangabe bantfu labasetikhundleni bawuvimbela umsebenti weMbuso eveni lokulo futsi bakubite kute bayokubuta imibuto ngebazalwane bakho? Kufanele ubatjele konkhe yini lokwatiko? Yini Jesu layenta ngesikhatsi aphenywa ngumbusi longumRoma? Ngekuvumelana nesimiso semBhalo lesitsi: ‘Kunesikhatsi sekubindza nesikhatsi sekukhuluma,’ ngaletinye tikhatsi, Jesu Khristu akazange asho lutfo. (Shu. 3:1, 7; Mat. 27:11-14) Endzabeni lenjena kukahle kutsi sisebentise kucondza kuze singafaki bazalwane betfu enkingeni. (Taga 10:19; 11:12) Ungenta njani nangabe umngani wakho lomkhulu nobe sihlobo sakho sente sono lesikhulu futsi wena uyati kutsi kwentekeni? Khuluma liciniso. Kufanele utjele labadzala liciniso lonkhe futsi akukafaneli ukhulume emanga. Banelilungelo lekwati onkhe emaciniso kuze babone kutsi nguyiphi indlela lekahle yekusita umuntfu lowonile kutsi aphindze abe nebuhlobo lobuhle naJehova.—Jak. 5:14, 15. w18.10 10 ¶17-18

Singabakhutsata njani labanye ngelutsandvo? Lenye indlela kuba silaleli lesihle. (Jak. 1:19) Sikhombisa kutsi siyabatsandza bantfu nangabe sibalalela futsi sibavela. Singabuta imibuto ngekuhlakanipha nangendlela lekhombisa umusa kuze sati kutsi umuntfu lodvumatekile utiva njani. Nasenta njalo sitawukhona kumvela futsi simdvudvute. Simo sakho sebuso kufanele sikhombise kutsi umkhatsalela mbamba futsi uyamtsandza. Nangabe umKhristu akuchazela indlela lativa ngayo, kufanele umlalelisise ngesineke futsi ungamngeni emlonyeni. Loko kutakusita kutsi uyicondze kahle indlela lativa ngayo. Kutawuphindze kumente akwetsembe futsi akulalele loko lokushoko njengobe wetama kumdvudvuta. Utawukhona kudvudvuta labanye nangabe ubakhombisa kutsi unendzaba nabo futsi uyabatsandza. w18.09 14 ¶10; 15 ¶13

Kutsatsa sikhatsi kulalela umlayeto weMbuso, kufundza liBhayibheli kanye netincwadzi letisekelwe kulo, kudadisha liBhayibheli, kulungiselela imihlangano yelibandla kanye nekuya kuyo. Kute sikhone kutenta letintfo, kufanele sisebentise sikhatsi lebesingasicitsa senta tintfo letingakabaluleki kakhulu. (Ef. 5:15, 16) Singanani sikhatsi lesisidzingako kute sibe nelwati lolungulonalona ngetimfundziso teliBhayibheli letisisekelo? Loko kuya ngetimo lesikuto. Kodvwa kute imincele mayelana nalesingakufundza ngekuhlakanipha kwaJehova, tindlela takhe kanye nemisebenti. (Rom. 11:33) Sicongosekulindza sekucala safanisa liciniso “nembali lenhle” futsi satsi: “Ungenetiswa nje kuba nembali yinye. Timisele kutfola letinyenti.” Ngisho noma singaphila phakadze, siyohlale sifundza lokunyenti ngaJehova. Lamuhla kubaluleke kakhulu kutsi sisebentise sikhatsi lesinaso kute sifundze emaciniso lamanyenti. w18.11 4 ¶7

Emadvodza kufanele ahlale nebafati bawo ‘ngekubati,’ lokusho kutsi kufanele abanakekele futsi abati kahle. (1 Phet. 3:7) Indvodza lenekucondza yati kahle kutsi nanobe yehluke kakhulu kumkayo, loko akuyenti ibe ncono kunaye. (Gen. 2:18) Ngako kufanele icabangele indlela lativa ngayo futsi ikhombise kutsi iyamhlonipha. Indvodza leyinakekelako imiva yemkayo ayenti tintfo letikhombisa kutsandza labanye besifazane noma ibanake ngendlela lengakafaneli. Loko angeke ikwente etinhlelweni tekuchumana noma ku-internet. (Jobe 31:1) Kufanele ihlale yetsembekile kumkayo ngoba imtsandza, itsandza naJehova futsi ikuzonda lokubi.—Hla. 19:14; 97:10. w18.09 29 ¶3-4

Kungani kulukhuni kusebentisa lesikufundza eBhayibhelini? Lesinye sizatfu kutsi kufanele sitfobeke kuze sente lokulungile. Kulamalanga ekugcina kumatima kuhlala sitfobekile ngobe siphila nebantfu ‘labatitsandza bona, labatsandza imali, labatigabatisako, labatigcabhako nalabangatibambi.’ (2 Thim. 3:1-3) Njengoba sitinceku taNkulunkulu siyati kutsi kutiphatsa lokunjena kubi, kodvwa ngaletinye tikhatsi bantfu labenta letintfo bangabonakala baphumelela futsi bakujabulela kuphila. (Hla. 37:1; 73:3) Labanye bangatibuta kutsi: ‘Kufanele yini ngibeke tidzingo talabanye kucala kunetami? Nangabe ngitiphatsa “njengalomncane,” bantfu batawuyekela yini kungihlonipha?’ Nangabe sinemoya webugovu, buhlobo betfu nebazalwane betfu bungalimala futsi labanye ngeke babone kutsi singemaKhristu. Kodvwa sitfola imiphumela lemihle nangabe sifundza ngetinceku taNkulunkulu futsi sitilingisa. w18.09 3 ¶1

Jehova abengaticabangeli yena kuphela ngisho noma asengakawadali emazulu nemhlaba. “Nkulunkulu lojabulako” Jehova uyatsandza kupha bantfu tipho letinhle. (1 Thim. 1:11; Jak. 1:17) Ngenca yekutsi ufuna natsi sijabule, usifundzisa kutsi sibaphe labanye. (Rom. 1:20) Nkulunkulu wadala bantfu ngemfanekiso wakhe. (Gen. 1:27) Sadalwa saba nebuntfu lobufana nebakhe futsi kufanele simlingise. Kuze sijabule futsi senetiseke, kufanele silingise sibonelo saJehova ngekutsi sibatsandze labanye futsi sibaphe ngalokusuka enhlitiyweni. (Fil. 2:3, 4; Jak. 1:5) Kungani? Kungoba Jehova wasidala saba ngumfanekiso wakhe. Ngisho noma sinesono, singakhona kulingisa Jehova futsi siphane. Jehova ufuna kutsi bantfu bamlingise, ngako uyajabula nangabe sipha labanye.—Ef. 5:1. w18.08 18 ¶1-2; 19 ¶4

Balandzeli baKhristu bakhombisa kutsi bayamlalela ngekutsi bangagcini ngekunaka emavi akhe, kodvwa baphindze bekwente loko lakushoko. Abaphatanyiswa “tinkhatsato tekuphila.” (Luk. 21:34) Kunaloko, kulalela imiyalo yaJesu kuta kucala ekuphileni kwabo ngisho nobe kumatima kwenta njalo. Bazalwane betfu bahlale betsembekile kuJehova ngisho nobe bahlangabetana natiphi tinkinga. Lenye indlela lesingakhombisa ngayo kutsi siyamlalela Jesu kutsi sibalalele labo lababeke kutsi basihole. (Heb. 13:7, 17) Inhlangano yaJehova yente tingucuko kuleminyaka leyengcile. Letingucuko tifaka ekhatsi emathuluzi lamasha lesiwasebentisa nasishumayela, indlela yekuchuba imihlangano yasekhatsi neliviki kanye nendlela lesakha ngayo, silungise siphindze sinakekele ngayo emaHholwa eMbuso. Sibonga kakhulu ngaleticondziso letikhombisa kutsi Jehova uyasitsandza. Singaciniseka kutsi Jehova utasibusisa nasilandzela ticondziso lesititfola enhlanganweni yakhe. w19.03 10-11 ¶11-12

Indzaba leneliciniso lelingakapheleli ingasidukisa. Cabanga ngaloko lokwenteka kuma-Israyeli labehlala ngasenshonalanga yeMfula iJordane ngesikhatsi kusaphila Joshuwa. (Josh. 22:9-34) Eva kutsi ema-Israyeli lahlala emphumalanga yeJordane akhe lithempeli lelikhulu. Incenye yalendzaba beyiliciniso, kepha belingakapheleli. Loko kwenta kutsi ema-Israyeli lahlala enshonalanga yeJordane acabange kutsi banakabo labahlala ngasemphumalanga sebahlubukile kuJehova. (Josh. 22:9-12) Kodvwa ngaphambi kwekutsi ayokulwa nabo, ema-Israyeli atfumela emadvodza letsenjwako kutsi ayotfola emaciniso ngalendzaba. Yini lamadvodza layitfola? Atfola kutsi bebangakakhi lelithempeli kute bakhonte bonkulunkulu bemanga kepha bebalakhe ngobe bafuna kutsi libe sikhumbuto sekutsi bakhonta Jehova. Kungenteka ema-Israyeli ajabula kakhulu ngekutsi akazange alwe nabomnakabo, kepha atinika sikhatsi sekutfola emaciniso ngalendzaba. w18.08 5 ¶9-10

Lamavi aPawula aveta kutsi ngisho nebantfu labakhonta Nkulunkulu bangatenta tintfo letimbi futsi bangahle bacabange kutsi Jehova solo usabemukela. Kodvwa kufuna kuba ngumngani waNkulunkulu noma kucabanga kutsi setsembekile kuye akusho kutsi Jehova utawuhlale asemukela. (1 Khor. 10:1-5) Ema-Israyeli akhatsateka nakabona Mosi solo angabuyi entsabeni iSinayi. Ngendlela lefanako, nalamuhla emaKhristu angakhatsateka nakabona ngatsi sehlulelo saJehova siyephuta kanye nekutsi live lelisha solo alifiki. Singahle sicabange kutsi tetsembiso taNkulunkulu ngeke tifezeke noma titawephuta kugcwaliseka. Loko kungasenta kutsi sente loko lesikufunako esikhundleni sekwenta intsandvo yaJehova. Ngekuhamba kwesikhatsi singakhwesha kuJehova futsi sigcine sesenta tintfo lebesingacabangi kutsi siyoke sitente. w18.07 21 ¶17-18

Natsi singatfola tibusiso letinyenti nangabe Jehova asati kahle. Yini lesingayenta kuze Jehova asati kahle? Jehova utawusati nangabe simtsandza futsi sitinikela kuye. (1 Khor. 8:3) Noma kunjalo, kufanele sihlale sinebuhlobo lobuhle naBabe wetfu losezulwini. NjengemaKhristu aseGalathiya Pawula lawabhalela, natsi kufanele sibalekele kwenta tintfo “letibutsakatsaka naletingenamsebenti,” letifaka ekhatsi kufuna kudvunyiswa bantfu labalelive. (Gal. 4:9) LamaKhristu angelikhulu lekucala besekatfutfukile futsi atiwa nguNkulunkulu. Noma kunjalo, Pawula watsi labazalwane baphindze ‘babuyela’ ekwenteni tintfo letingenamsebenti. Ecinisweni Pawula bekatsi kubo: “Njengobe senitfutfuke kangaka, kungani nibuyela ekwenteni tintfo letibulima naletingenamsebenti?” w18.07 8 ¶5-6

Siyajabula kutsi akudzingeki sibhekane nemiphumela lebuhlungu yekwephula imitsetfo yaNkulunkulu kuze sifundze kutsi kuyini lokuhle nalokubi. Singafundza emaphutseni ebantfu lokukhulunywa ngabo eVini laNkulunkulu. Nangabe sifundza ngetibonelo tebantfu letiseBhayibhelini futsi sizindla ngato, sitfola sicondziso lesivela kuJehova. Nasi sibonelo, cabanga ngebuhlungu iNkhosi Davide leyabuva ngekungalaleli umyalo waNkulunkulu futsi iphinga naBhatisheba. (2 Sam. 12:7-14) Nawufundza indzaba yaDavide, tibute kutsi: ‘Davide bekangayibalekela njani lenhlekelele? Yini lengingayenta nangingaba sesimeni lesifanako? Ngingaphinga yini njengaDavide noma ngingabaleka njengobe kwenta Josefa?’ (Gen. 39:11-15) Nangabe sicabangisisa ngemiphumela lebuhlungu yekwenta sono, ‘sitakutondza lokubi.’—Amo. 5:15. w18.06 17 ¶5, 7

Nangabe bantfu babona kungalungi, bavamisa kungenela tepolitiki. Ngesikhatsi Jesu asemhlabeni, kukhokha umtselo kwenta bantfu labanyenti bangenela tepolitiki. Bantfu labebabuswa ngemaRoma bekufanele babhadale imitselo leminyenti lefaka ekhatsi yetintfo letiligugu labanato, yemhlaba, kanye neyetindlu. Batselisi bebakhohlakele kakhulu futsi loko bekwenta kuphila kube matima. Bebaphindze badizele babusi kute batfole tikhundla futsi ngato bebakha imali lenyenti. Zakewu lebekayindvuna yebatselisi yaseJerikho, bekanjingile ngobe bekatselisa bantfu imali lenyenti. (Luk. 19:2, 8) Titsa taJesu tetama kumgila ngekutsi timente atsatse luhlangotsi endzabeni yemtselo. Tambuta kutsi kuvumelekile yini kukhipha “umtselo” wadenariyo lobewubhadalwa ngiwo onkhe emaJuda. (Mat. 22:16-18) EmaJuda bekakwenyanya kukhipha umtselo ngoba bekuwakhumbuta kutsi abebuswa ngemaRoma. w18.06 5-6 ¶8-10

Kukhetsa luhlangotsi lwaSathane kwahlale kunemiphumela lebuhlungu futsi kute tinzuzo letihlala njalo. (Jobe 21:7-17; Gal. 6:7, 8). Kusisita ngani kwati kutsi Sathane unemandla langanani? Kusenta sibe nembono lokahle ngabohulumende kuphindze kusikhutsate kutsi sishumayele. Jehova ufuna sibahloniphe bohulumende. (1 Phet. 2:17) Ulindzele kutsi sihloniphe imitsetfo yabo yingci nje nangabe ingashayisani netimiso takhe. (Rom. 13:1-4) Kodvwa siyati kutsi kufanele singatsatsi luhlangotsi, futsi akukafaneli sitsandze licembu lelitsite lepolitiki noma umholi lotsite kunalomunye. (Joh. 17:15, 16; 18:36) Ngesizatfu sekutsi Sathane uhlambalata ligama laNkulunkulu, sitiva siphocelelekile kutsi sicoce nalabanye ngemaciniso lamayelana naNkulunkulu wetfu. Siyatigcabha ngekubitwa ngelibito lakhe kanye nangekulisebentisa. Siyati kutsi sitawutfola umvuzo lomkhulu nasitsandza Nkulunkulu kunekutsandza imali kanye nemcebo.—Isa. 43:10; 1 Thim. 6:6-10. w18.05 24 ¶8-9

Nangabe labashadile babanetinkinga, kuhlala ngekwehlukana kungaba sincumo lesihle yini? ImiBhalo ayitisho tizatfu letingabenta bahlale ngekwehlukana. Pawula wabhala: “Nangabe umfati anendvodza lengakholwa kodvwa ivuma kuhlala naye, akangayishiyi.” (1 Khor. 7:12, 13) Loko kuyasebenta nalamuhla. Nanobe kunjalo, kuba khona tikhatsi lapho ‘indvodza lengakholwa ingavumi kuhlala nemkayo.’ Ingahle imhlukumete kakhulu aze abone ngatsi kuphila kwakhe kusengotini. Ingayekela kumnakekela yena kanye nemndeni wayo noma ibeke buhlobo bakhe naJehova engotini. Etimeni letinjalo lamanye emaKhristu ancume kutsi ahlale ngekwehlukana ngenca yekutsi lendvodza ayivumi kuhlala naye. Kodvwa lamanye emaKhristu lasesimeni lesifanako ancume kusibeketelela simo futsi etama kusilungisa. w18.12 13 ¶14, 16; 14 ¶17

Kulomfanekiso wemhlanyeli lokuLukha 8:5-8, 11-15, inhlanyelo “livi laNkulunkulu,” noma umlayeto weMbuso. Umhlabatsi umelela inhlitiyo yemuntfu. Inhlanyelo leyawela emhlabatsini lovundzile, yamila, futsi yatsela “titselo letiphindvwe kalikhulu.” Lenhlanyelo yachubeka ikhula yaze yatsela titselo. Kolo awutseli lomunye kolo kodvwa uveta inhlanyelo. Ngendlela lefanako titselo lesititselako atimeleli bafundzi labasha kepha timelela inhlanyelo lesiyihlanyelako. Loku sikwenta ngekutsi nasicocela labanye ngeMbuso waNkulunkulu sisuke sisakata lenhlanyelo leyahlanyelwa etinhlitiyweni tetfu. (Luk. 6:45; 8:1) Ngako lomfanekiso usifundzisa kutsi nasishumayela ngeMbuso waNkulunkulu sisuke ‘sitsela titselo ngekucinisela.’ w18.05 14 ¶10-11

Pawula bekafuna kukhutsata bazalwane bakhe, ngako bekasebentisa konkhe labenako, futsi naye abesetjentiswa ngalokugcwele ngenca yemiphefumulo yabo. (2 Khor. 12:15) Ngalokufanako labadzala belibandla akukafaneli bagcine ngekukhutsata bazalwane ngemavi kuphela, kepha kufanele babakhutsate nangetento letikhombisa kutsi bayabakhatsalela. (1 Khor. 14:3) Kukhutsata labanye kungafaka ekhatsi kubayala futsi labadzala belibandla kufanele balandzele sibonelo lesiseBhayibhelini sekuyala labanye ngendlela letabakhutsata. Ngemuva kwekuvuswa kwakhe, Jesu wasibekela sibonelo lesihle sekuniketa siyalo. Bekanesiyalo lesicinile labefuna kusinika emabandla ase-Asia Minor, kodvwa wacale wancoma libandla lase-Efesu, lasePhegamu nelaseThiyathira. (Semb. 2:1-5, 12, 13, 18, 19) Labadzala benta kahle ngekulingisa sibonelo saJesu nakufanele banikete siyalo. w18.04 22 ¶8-9

Batali, asingabati kutsi nenta konkhe lokusemandleni enu kute nivikele bantfwana benu kutsi bangatfoli tifo. Nigcina emakhaya enu ahlobile, futsi nilahla nobe yini lengenta nine nobe bantfwana benu bagule. Ngendlela lefanako, kufanele nivikele bantfwana benu etintfweni letingabenta bacabange njengaSathane. Letintfo tingafaka ekhatsi ema-movie, tinhlelo te-TV, imidlalo ledlalwa etintfweni tebuchwephesha kanye nema-website layingoti. Jehova uninikete umsebenti wekusita bantfwana benu babe bangani bakhe. (Taga 1:8) Ngako ningesabi kubekela imindeni yenu imitsetfo lesekelwe etimisweni letiseBhayibhelini. Tjelani bantfwana benu labasebancane tintfo labangatibukela kanye netintfo lokungakafaneli batibukele, bese nibachazela sizatfu lesinenta nisho kanjalo. (Mat. 5:37) Njengoba bantfwana benu bakhula, bacecesheni kutsi basebentise timiso taJehova kute behlukanise lokulungile nalokungakalungi. (Heb. 5:14) Khumbulani kutsi bantfwana benu batawufundza lokunyenti kakhulu kuloko lenikwentako.—Dut. 6:6, 7; Rom. 2:21. w19.01 16 ¶8

Nangabe ungumKhristu losemusha, kungaba kuhle kutsi utibekele umgomo wekunaka bazalwane lasebakhulile. Ungabacela kutsi bakucocele ngetintfo letentekile ekuphileni kwabo njengoba bakhonta Nkulunkulu. Bangakufundzisa tifundvo letibalulekile futsi loku kungakhutsata wena kanye nabo. Sonkhe ebandleni singenta bantfu labasivakashele eHholweni leMbuso bative bakhululekile. Nangabe wabelwe kuchuba imihlangano yangaphambi kwekuya ensimini, kunyenti longakwenta kuze usite lasebakhulile kutsi baphumelele emsebentini wekushumayela. Kufanele uciniseke kutsi ubanika insimu letabalungela. Ngaletinye tikhatsi ungakhetsa kubahambisa nemmemeteli losemusha. Bazalwane nabodzadze lesebakhulile kanye nalabo labanetinkinga temphilo bangadvumateka nangabe bangasakhoni kushumayela ngendlela lebebenta ngayo ngaphambili. Kungakhatsaliseki kutsi sebakhule kangakanani noma banesikhatsi lesidze bakhonta Jehova, kubakhombisa umusa kubakhutsata kutsi bachubeke bashumayela ngekutimisela.—Lev. 19:32. w18.06 23-24 ¶10-12

Akukafaneli sikutsatsele phasi kutsi Jehova wasikhulula ekugcilatweni sono nekufa. Inhlawulo yaJesu isenta sikhonte Jehova nganembeza lohlantekile futsi sitfole injabulo ngekwenta kanjalo. (Hla. 40:8) Ngetulu kwekubonga ngenkhululeko yetfu, kufanele sigadze kutsi singayisebentisi kabi. Umphostoli Phetro wasecwayisa kutsi singayisebentisi kabi inkhululeko yetfu kuze senetise tifiso tenyama. Lesecwayiso asikukhumbuti yini loko lokwehlela ema-Israyeli ehlane? Natsi singabhekana nengoti lefanako. Sathane nelive lakhe bachubeka baletsa tintfo letinyenti lesingakhetsa kuto kwekwembatsa nekutilungisa, kudla nekwekunatsa, kutijabulisa kanye naletinye tintfo. Bakhangisi labahlakaniphile basebentisa bantfu labahle kuze basente sitsenge tintfo lesingatidzingi. Kumelula kakhulu kutsi sibanjwe ngulolugibe futsi siyisebentise kabi inkhululeko yetfu! w18.04 10 ¶7-8