Setfulo

Incwadzi letsi ImiBhalo Lecondzisa Kuphila KwemaKhristu itawenta kube melula kutfola emavesi eliBhayibheli netindzaba letikulo letingakusita kutsi ubeketelele tinkinga lobhekana nato. Itawuphindze ikusite kutsi utfole emavesi lakahle kuze ukhutsate labanye futsi ubasite bente tincumo letidvumisa Jehova. Vula sihloko losifunako, sihloko ngasinye sinemibuto lelusito nenchazelo lemfishane yendzaba letsite leseBhayibhelini. (Buka libhokisi lelitsi “Indlela Yekusebentisa Lencwadzi.”) Utawutfola imiBhalo letakunika seluleko nendvudvuto loyidzingako. Utawuphindze utfole emavesi lalusito longawacocela labanye, nalangabakhutsata, abasite ngetinkinga tabo futsi abanike seluleko.

Indlela Yekusebentisa Lencwadzi

Kuze utfole sihloko, ungasebentisa incenye lebhalwe kutsi funa nobe ubuke encenyeni letsi tihloko letihlelwe ngaloko letikhuluma ngako. Incwadzi letsi ImiBhalo Lecondzisa Kuphila KwemaKhristu yentiwe yaba netincenye letingu-7 taloko lekhuluma ngako: Tinkinga, Indlela Yekutiphatsa, Libandla, Kuphila Kwamalanga Onkhe, Umndeni, Buhlobo Betfu NaJehova, naletsi Buntfu Betfu. Tihloko letinyenti titawuba ngephansi kwencenye yinye kuleti. Khetsa incenye loyifunako, bese uvula lesihloko losifunako. Kodvwa nangabe ungati kutsi nguyiphi incenye lenesihloko losifunako, chafata lakubhalwe kutsi Konkhe bese ufuna lesihloko losifunako. Ngephansi kwesihloko ngasinye, utawutfola tihlokwana letinembala logcamile. Letinye tiyimisho; kantsi letinye timibuto. Njengobe ufundza emavesi labhalwe ngalokugcamile langentasi kwaletihlokwana, cabangisisa ngekutsi awusekela njani lomusho nobe kutsi awuphendvula njani lombuto. Letinye tihloko tinetincenye letitakusita kutsi usheshe ukutfole loko lokufunako. Kuletinye timo, kwengetwe emavesi labhalwe kutsi “Buka na-.” Lamavesi anemicondvo lehambisana nalesihloko. Etihlokweni letinyenti, kunencenye letsi “Tindzaba letiseBhayibhelini letingakusita.” Ilandzelwa ngumusho lochaza kafishane emaphuzu layinhloko alamavesi. Njengobe ufundza lombhalo, sebentisa lomusho kuze ucabangisise ngalokufundza kulombhalo.

Lencwadzi ayiwasho onkhe emavesi lakhuluma ngendzaba letsite. Kodvwa ilusito kakhulu nawucwaninga. (Tag 2:1-6) Nangabe ufuna kumba ujule, ungasebentisa luhla lwemavesi latikhombo lasemkhatsini welikhasi ngalinye EHumushweni Lemhlaba Lomusha LemiBhalo Lengcwele. Sebentisa Lithulusi Lekucwaninga LaBoFakazi BaJehova nobe i-Watch Tower Publications Index kuze ufundze lokunyenti ngenchazelo yelivesi nobe kutsi ungalisebentisa njani. Sebentisa tintfo letisandza kushicilelwa kuze uciniseke kutsi unenchazelo yakamuva yemaciniso eliBhayibheli.

Shengatsi lencwadzi letsi ImiBhalo Lecondzisa Kuphila KwemaKhristu ingakusita utfole kuhlakanipha, lwati kanye nekucondza lokusemiBhalweni Lengcwele. Njengobe usebentisa lencwadzi, utawuciniseka kakhulu kutsi “livi laNkulunkulu liyaphila, [futsi] linemandla.”—Heb 4:12.