March

Asitikhetseli kutondvwa. Asikutsandzi kuphatfwa kabi ngenca yekukholwa kwetfu. Ngako kungani kufanele sijabule nasitondvwa? Cabanga nganati tizatfu letintsatfu. Sekucala, nangabe sicinisela, Nkulunkulu uyajabula ngatsi. (1 Phet. 4:13, 14) Sesibili, kukholwa kwetfu kucina kakhulu. (1 Phet. 1:7) Sesitsatfu, sitawutfola umvuzo lomuhle kakhulu wekuphila lokuphakadze. (Rom. 2:6, 7) Kungakapheli sikhatsi lesidze Jesu avusiwe, baphostoli batfola lenjabulo lebekakhulume ngayo. Ngemuva kwekushaywa kamatima nekuyalwa kutsi bayekele kushumayela, bajabula. Kungani? “Ngobe Nkulunkulu bekabatsatse njengalabakufanele kuhlazwa ngenca yelibito laJesu.” (Imis. 5:40-42) Bebayitsandza kakhulu iNkhosi yabo kwendlula kwesaba kutondvwa titsa tabo. Bakhombisa kutsi bayayitsandza ngobe “abazange bayekele” kushumayela tindzaba letimnandzi. Bazalwane betfu labanyenti lamuhla bayachubeka bakhonta Nkulunkulu ngekwetsembeka ngisho nobe babhekana nebumatima. Bayati kutsi Jehova angeke awukhohlwe umsebenti wabo nelutsandvo lababe nalo ngelibito lakhe. w21.03 25 ¶18-19

EmaKhristu lagcotjiwe akatalwa anelitsemba lekuyophila ezulwini. NguNkulunkulu lobanika lelitsemba. Bacabanga ngelitsemba labo, bathantaza ngalo futsi bayakulangatelela kuyophila ezulwini. LamaKhristu akati kutsi imitimba yawo itawuba njani ezulwini. (Fil. 3:20, 21; 1 Joh. 3:2) Nanobe kunjalo, ayakulangatelela kuhlala etihlalweni tebukhosi eMbusweni wasezulwini. Letinye timvu tilangatelela kuphila phakadze emhlabeni, futsi lesi sifiso bonkhe bantfu labanaso. Basibuke ngalabovu sikhatsi lapho batawushintja khona wonkhe umhlaba ube lipharadisi. Bayasilangatelela sikhatsi lapho batawakha khona tindlu tabo, bahlanyele tihlahla futsi bakhulise bantfwana babo labaphilile. (Isa. 65:21-23) Bayasilangatelela sikhatsi lapho batawuvakashela khona tindzawo letinyenti emhlabeni, babone tintsaba, emahlatsi nelwandle, futsi bafundze ngetintfo letinyenti Jehova latidalile. Ngetulu kwaloko, bayajabula ngekwati kutsi buhlobo babo naJehova butawucina kakhulu. w21.01 18-19 ¶17-18

Ngesikhatsi baseBhabhulona sebalihlasele lelive, bantfu bebatsi: “Lendzawo ilihlane, ayinabantfu natilwane, ngobe seyinikelwe etandleni temaBhabhulona.” (Jer. 32:43) Eminyakeni lengaba ngu-200 ngemuva kwesiphrofetho saJoweli, Jehova wasebentisa Jeremiya kutsi abiketele lokutsite ngalokuhlasela. Watsi lamabutfo bekatawafunisisa ema-Israyeli lebekenta tintfo letimbi futsi awabambe onkhe. Jehova wachubeka watsi: “Kodvwa nyalo sengitawutfumela badwebi babe banyenti, futsi batababamba baka-Israyeli. Emvakwaloko ngitawutfumela batingeli babe banyenti, batawubatingela yonkhe indzawo, ngisho nasetintsabeni, nasemagcumeni, nasemifantfwini yemadvwala . . . Ngitabaphindzisela ngalokuphindziwe ngenca yetono tabo nangebubi babo.” Lwandle kanye nemahlatsi bekungeke kukhone kuwafihla ema-Israyeli lebekangaphendvuki kutsi lelibutfo laseBhabhulona lingawaboni.​—Jer. 16:16, 18. w20.04 5 ¶12-13

Ngalesinye sikhatsi lebesibalulekile ekuphileni kwakhe, Loti wahudvula tinyawo ekulaleleni ticondziso taJehova. Kungenteka sicabange kutsi Loti bekanganendzaba naloko Jehova lebekamtjele kutsi akwente nobe bekangalaleli. Nanobe kunjalo, Jehova akayekelanga kumsindzisa. “Ngobe Simakadze waba nesihawu kuye,” tingilosi tababamba ngetandla tabakhiphela ngephandle kwelidolobha. (Gen. 19:15, 16) Kungenteka kunetizatfu letenta Jehova wamvela Loti. Kungenteka Loti bekangabata kuhamba ekhaya ngobe bekasaba bantfu lebebangephandle kwelidolobha. Bekunaletinye futsi tingoti. Loti kungenteka bekawati emakhosi lamabili lebekagcumukele emigodzini yelitiyela etsafeni lebelidvutane. (Gen. 14:8-12) Njengobe bekayindvodza futsi angubabe, kungenteka bekakhatsateka ngemndeni wakhe. Ngetulu kwaloko, Loti bekanjingile ngako kungenteka bekanendlu lenhle eSodoma. (Gen. 13:5, 6) Kuliciniso kutsi kuto tonkhe letizatfu kute lobekungenta Loti angamlaleli Jehova ngekushesha. Nanobe kunjalo, Jehova akazange anake liphutsa lelentiwa nguLoti kodvwa wamtsatsa ‘njengemuntfu lolungile.’​—2 Phet. 2:7, 8. w20.04 18 ¶13-14

Wena mzalwane losemusha, kutawutsatsa sikhatsi kutsi labo labakwati kusukela usemncane babone kutsi sewukhulile. Kodvwa ungaciniseka kutsi Jehova akagcini nje ngekubuka indlela lobukeka ngayo, ukwati kahle futsi uyakwati naloko longakhona kukwenta. (1 Sam. 16:7) Cinisa buhlobo bakho naNkulunkulu. Davide wakwenta loko ngekubukisisa tintfo Jehova latidalile. Wacabangisisa ngekutsi letintfo timfundzisani ngeMdali. (Hla. 8:3, 4; 139:14; Rom. 1:20) Ungaphindze ucele Jehova kutsi akuphe emandla. Nasi sibonelo, lofundza nabo esikolweni bahlekisa ngawe yini ngenca yekutsi unguFakazi waJehova? Nangabe kunjalo, thantaza ucele Jehova akusite ubeketelele lenkinga. Sebentisa seluleko lesilusito lesitfolakala eVini lakhe nasetincwadzini letisekelwe eBhayibhelini nakuma-video. Ngaso sonkhe sikhatsi Jehova nakakusita uncobe inkinga letsite, utawumetsemba kakhulu, ngetulu kwaloko, labanye bantfu nababona kutsi wetsembele kuJehova nabo batakwetsemba. w21.03 4 ¶7

Bangani labatsandzanako bahlale bacoca ngetintfo labaticabangako nangendlela labativa ngayo. Kwenteka lokufanako nangabe sibangani baJehova. Jehova ukhuluma natsi asebentisa liVi lakhe, futsi usebentisa lona kuze asivetele indlela lativa ngayo nalacabanga ngayo. Sikhuluma naye ngemthantazo, futsi siyakhona kutfulula sifuba setfu kuye. Njengobe angumngani lositsandzako, Jehova uyayilalela aphindze ayiphendvule imithantazo yetfu. Esikhatsini lesinyenti usheshe aphendvule. Ngaletinye tikhatsi, kungadzingeka sichubeke sithantaza ngendzaba letsite. Nobe kunjalo, singaciniseka kutsi imphendvulo sitayitfola ngesikhatsi lesifanele nangendlela lekahle. Kuliciniso kutsi imphendvulo lesitayitfola kuNkulunkulu, ingaba ngulokwehlukile kuloku lebesikulindzele. Nasi sibonelo, kunekutsi asuse inkinga lesinayo, Jehova angasinika kuhlakanipha nemandla ‘ekuyibeketelela.’ (1 Khor. 10:13) Singakhombisa njani kutsi siyabonga ngesipho setfu lesiligugu lesingumthantazo? Lenye indlela lesingakwenta ngayo loku kutsi silandzele sicondziso saJehova sekutsi ‘sihlale sithantaza.’​—1 Thes. 5:17. w20.05 27-28 ¶7-8

Tingijimi letisemncintiswaneni welibanga lelidze tiyawunakisisa umgwaco kuze tingaphatamiseki nobe tigileke. Nangabe tiwa, tiyavuka tichubeke nekugijima. Atikunaki loko lokutiphatamisile, kodvwa tinaka kakhulu kushaya intsambo nemklomelo letitawutfola. Kulomncintiswane wetfu, kungenteka siphatamiseke tikhatsi letinyenti, singenta emaphutsa nobe sisho tintfo letikabi. Tingijimi lesinato tingenta emaphutsa langasivisa buhlungu. Akukafaneli kusimangalise loko nakwenteka. Sonkhe sinesono futsi sigijima emgwacweni munye lomncane futsi loyisa ekuphileni. Ngako, ngaletinye tikhatsi kungenteka “sigilane” futsi sibe ‘sizatfu sekukhonona’ kulabanye. (Khol. 3:13) Kunekutsi sinake tintfo letisiphatamisile, kufanele sinake umvuzo losembikwetfu futsi sichubeke nekugijima. Nangabe sitawutfukutsela bese siyayekela kukhonta Jehova, ngeke sifike entsanjeni futsi ngeke siwutfole umklomelo wetfu. Ngetulu kwaloko, kungenteka sibaphatamise labanye labetama kugijima kulomgwaco lomncane. w20.04 26 ¶1; 28 ¶8-9

Umphrofethi Danyela wakhuluma ngesitfombe lesikhulu lesinetitfo temtimba letakhiwe ngetinsimbi letehlukehlukene. Sitfo ngasinye besimelela hulumende lowehlukile lobuse endzaweni lebeyinebantfu baNkulunkulu labanyenti. Tinyawo talesitfombe betakhiwe ngensimbi lehlanganiswe nelubumba. Timelela umbuso wekugcina, lokuyi-Britain ne-United States. Lesiphrofetho sisho kutsi i-Britain ne-United States titawube tibusa ngesikhatsi uMbuso waNkulunkulu ubhubhisa yonkhe imibuso yebantfu. Umphostoli Johane wakhuluma nangemibuso lebeyibusa bantfu baJehova. Johane wafananisa lemibuso nesilo sasendle lesinetinhloko letisikhombisa. Inhloko yesikhombisa yalesilo imelela i-Britain ne-United States. Kubalulekile kukwati loku ngobe kute letinye tinhloko ngemuva kwalena yesikhombisa. Lenhloko yesikhombisa yalesilo, itawube ibusa ngesikhatsi Khristu kanye nelibutfo lakhe lasezulwini bayibhubhisa nalesilo.​—Semb. 13:1, 2; 17:13, 14. w20.05 14 ¶11-12

Lamavi lamelula asikhumbuta ngeliciniso lelibalulekile: Nkulunkulu longuMtfombo wekuphila, uphindze abe nguMtfombo welutsandvo. Jehova uyasitsandza! Lutsandvo lwakhe lusenta sitive sivikelekile, sijabulile futsi senetisekile. EmaKhristu kufanele akhombise lutsandvo ngaso sonkhe sikhatsi futsi lona ngumyalo. (Mat. 22:37-40) Nasimati kahle Jehova, kungaba melula ngatsi kulalela lomyalo wekucala. Loku kungenca yekutsi Jehova ute sono, uyacabangela futsi usiphatsa ngemusa. Nobe kunjalo, kungenteka kube matima kulalela lomyalo wesibili. Leni? Ngenca yekutsi bazalwane nabodzadzewetfu lababomakhelwane betfu labasedvute, banesono. Ngalesinye sikhatsi bangase bente tintfo letikhombisa kutsi abasikhatsaleli futsi letikhombisa kutsi bete umusa. Jehova bekati kutsi sitawubhekana nalenkinga, ngako waphefumulela labanye babhali beliBhayibheli kutsi babhale teluleko leticondzile ngekutsi kungani kufanele sibatsandze labanye nekutsi singakukhombisa njani loko. Lomunye walababhali bekungumphostili Johane.​—1 Joh. 3:11, 12. w21.01 8 ¶1-2

Ngisho nobe sinesikhashana nobe sesinesikhatsi lesidze sikhonta Jehova, kufanele sitibute kutsi, ‘Ngiyalwisana yini nemachinga aSathane ekwehlukanisa inhlitiyo yami?’ Asesitsi ubona sitfombe ku-TV nobe ku-internet lesingakwenta ucabange ngekutiphatsa lokubi. Yini loyentako? Kungaba melula kucabanga kutsi lesitfombe nobe le-movie ayikukhutsati kutiphatsa lokubi. Kodvwa ingaba yintfo Sathane layisebentisako kuze ehlukanise inhlitiyo yakho. Lesitfombe singafana nelizembe lelisentjentiswa ngumuntfu kuze ahlakate sigodvo lesikhulu. Lomuntfu ucale akabhe lolugodvo, futsi njengobe achubeka alukabha, lolugodvo lubese lwehlukana ekhatsi. Titfombe letikhutsata kutiphatsa lokubi tingafana yini nalelizembe? Kubuka letintfo letingabonakala shengatsi atisiyo ingoti, ngekuhamba kwesikhatsi tingasibangela kutsi sone kuJehova. Ngako ungavumeli tintfo letingakafaneli kutsi tingene enhlitiyweni yakho. Hlale uhlose intfo yinye kuze uhloniphe libito laJehova. w20.06 11-12 ¶14-15

Kufanele sichubeke sibasita futsi sibakhutsata lesebapholile. Njengendvodzana yelulahleko lesemfanekisweni waJesu, lesebapholile kungenteka bayesaba. (Luk. 15:17-24) Ngesizatfu sekutsi bebaseveni laSathane kungenteka sebete buhlobo lobucinile naJehova. Sifuna kubasita bacinise kukholwa kwabo kuJehova. Emfanekisweni wemvu lelahlekile, Jesu washo kutsi lomelusi ubeka lemvu emahlombe akhe bese uyibuyisela emhlambini. Lomelusi usuke asebentise sikhatsi sakhe nemandla akhe kuze atfole lemvu. Uyati kutsi lemvu idzinga lusito ngobe angeke ikhone kutihambela ibuyele emhlambini, ngako uyayetfwala. (Luk. 15:4, 5) Kungase kudzingeke sikhatsi nemandla etfu kuze sikhone kusita labapholile bakhone kumelana netinkinga letibenta bangakhoni kukhonta Jehova. Singabasita lasebapholile kutsi bacinise buhlobo babo naJehova sisebentisa liVi lakhe, tincwadzi lesitilungiselelwa yinhlangano futsi bangasitwa nangumoya longcwele waJehova. Nangabe ucelwa kutsi ufundzele umuntfu lopholile, kufanele usijabulele lesabelo. w20.06 28 ¶14-15

Kufanele sitsandzane kuze sikhombise kutsi singemaKhristu eliciniso. Kodvwa sidzinga ‘nelwati lolungulonalona nekucondza lokuphelele.’ (Fil. 1:9) Nasingenti njalo sitawungenwa “ngiyo yonkhe imimoya yetimfundziso tekuyenga kwebantfu” lokufaka ekhatsi tetihlubuki. (Ef. 4:14) Ngesikhatsi bafundzi labanyenti bayekela kulandzela Jesu ngelikhulu lekucala, Phetro wakhombisa kukholwa lokucinile ngesikhatsi atsi ‘Jesu unemavi ekuphila lokuphakadze.’ (Joh. 6:67, 68) Ngisho nobe Phetro bekangakucondzi konkhe ngaleso sikhatsi, wahlala etsembekile ngobe bekalati liciniso ngaKhristu. Nawe ungakwetsemba loko lokufundziswa liBhayibheli. Nawenta njalo, kukholwa kwakho kutawuhlale kucinile ngisho nobe kungentekani, futsi utawukhona nekucinisa kukholwa kwalabanye.​—2 Joh. 1, 2. w20.07 8 ¶2; 13 ¶18

Kuze sisite bazalwane nabodzadzewetfu kutsi bahlale ecinisweni, kufanele sibavele. (1 Joh. 3:10, 11, 16, 17) Kufanele singagcini nje ngekutsandzana nangabe tintfo tihamba kahle, kodvwa kufanele sitsandzane ngisho nalapho kuvela tinkinga. Nasi sibonelo, kukhona yini lomatiko loshonelwe sihlobo sakhe futsi lodzinga kudvudvutwa nome kusitwa? Uke weva yini kutsi bazalwane betfu balahlekelwe tintfo tabo letinyenti ngenca yetehlakalo temvelo futsi badzinga lusito kuze bakhe kabusha emaHholwa abo eMbuso nobe emakhaya abo? Sikhombisa kutsi sibatsandza kakhulu bazalwane betfu nekutsi siyabavela ngaloko lesikushoko nalesikwentako. Silingisa Babe wetfu losezulwini futsi lonelutsandvo nangabe sibatsandza labanye. (1 Joh. 4:7, 8) Lenye indlela lesikhombisa ngayo lutsandvo kutsi sicolelane. Nasi sibonelo, lomunye umuntfu angasivisa buhlungu kodvwa bese uyacolisa. Sitawube sikhombisa lutsandvo nangabe simcolela futsi singacabangi ngaloko lasente kona.​—Khol. 3:13. w20.07 24 ¶14-15

Wonkhe umuntfu lotawube avusiwe utawuba nemfundzisi wakhe yini lotamfundzisa njengobe senta lamuhla nasifundzisa bantfu liBhayibheli? Labo labatawuvuswa kucala batakuya emabandleni yini kuze baceceshelwe kufundzisa labo labatawuvuswa emvakwabo? Kutawudzingeka silindze kuze sibone. Siyati kutsi ngasekupheleni Kwekubusa KwaKhristu Kweminyaka Leyinkhulungwane, “umhlaba uyawugcwala kwati [Jehova.]” (Isa. 11:9) Sitawuba nemsebenti lomnyenti lojabulisako kuleminyaka leyinkulungwane! Ngesikhatsi Sekubusa KwaKhristu Kweminyaka Leyinkhulungwane, bonkhe bantfu kutawudzingeka bente lushintjo ekuphileni kwabo kuze bajabulise Jehova. Kutawudzingeka babe neluvelo kuze basite labo labatawube bavusiwe kutsi bente lushintjo ekuphileni kwabo futsi baphile ngetimiso taJehova. (1 Phet. 3:8) Siyaciniseka kutsi labo labatawuvuswa batawusondzelana nebantfu baJehova labatfobekile futsi labatawube ‘basebentela kusindziswa kwabo.’​—Fil. 2:12. w20.08 16 ¶6-7

Nasilalela seluleko lesiphefumulelwe semphostoli Pawula futsi sihlola tento tetfu, sitawubona kutsi sinetipho nemakhono langafani. Nasi sibonelo, lomdzala welibandla angase abebete likhono lekubeka tinkhulumo, kodvwa abe nelikhono lelihle lekwenta bafundzi. Kungenteka angahleleki njengalabanye labadzala ebandleni, kodvwa abe nemusa nelutsandvo futsi nebazalwane bakhululeke kucela lusito kuye. Nobe angaba nemoya lomuhle wekwemukela tihambi. (Heb. 13:2, 16) Nasitati tipho tetfu, sitawujabula ngaloko lesikwentela libandla, futsi angeke sibe nemona ngebazalwane labanetipho letingafani netetfu. Ngisho nobe sinamuphi umsebenti ebandleni, sonkhe kufanele sibe nesifiso sekutfutfukisa umsebenti lesiwentela Jehova nemakhono etfu. w20.08 24 ¶16-18

Inkhulumo lebalulekile lebeyinesihloko lesitsi “Sicumbi Lesikhulu,” yabekwa ngumzalwane J. F. Rutherford nga-1935 emhlanganweni lomkhulu lobewuseWashington, D.C., e-U.S.A. Enkhulumeni yakhe, Umzalwane Rutherford wachaza kutsi bobani labakha “sicumbi lesikhulu,” lokukhulunywa ngaso kuSembulo 7:9. Kuze kube nguleso sikhatsi, Bafundzi BeliBhayibheli bebacabanga kutsi lesicumbi lesikhulu bekulicembu lebantfu lebelitakuya ezulwini, kodvwa lebeletsembeke kancane kunalabagcotjiwe. Umzalwane Rutherford wachaza asebentisa imiBhalo kutsi lesicumbi lesikhulu besingakakhetfwa kutsi siyophila ezulwini, kodvwa besinguletinye timvu taKhristu lebetitawusindza ngemuva ‘kwekuhlupheka lokukhulu’ futsi tiphile phakadze emhlabeni. (Semb. 7:14) Jesu wetsembisa watsi: “Nginaletinye timvu letingasito takulesibaya; nato kufanele ngitiletse, titalilalela livi lami, futsi titawuba ngumhlambi munye, tibe nemelusi munye.” (Joh. 10:16) Laba labanjengetimvu, BoFakazi BaJehova labetsembekile, labanelitsemba lekuphila phakadze emhlabeni loliPharadisi.​—Mat. 25:31-33, 46. w21.01 14 ¶1-2

Kufanele sitilawule nangabe sifuna kubeketela futsi siwucedze umsebenti wetfu. (Mat. 28:19, 20) Asitalwa sinelikhono lekutilawula. Ngalokuvamile, siyatsandza kujubela nasenta tintfo. Kodvwa ngaletinye tikhatsi letinye tintfo letibalulekile tidzinga kutsi singatidoji, ngako kudzingeka sifundze kutibamba. Sidzinga lusito kuze siticeceshe kutsi sente tintfo lokungaba matima kutenta. Jehova uyasisita asebentisa umoya wakhe longcwele. (Gal. 5:22, 23) Umphostoli Pawula bekakhona kutilawula. Kodvwa watsi kufanele ‘awucindzetele’ umtimba wakhe kuze ente lokulungile. (1 Khor. 9:25-27) Wakhutsata labanye kutsi batilawule futsi bente tonkhe tintfo “ngendlela lefanele nangekuhleleka.” (1 Khor. 14:40) Kufanele sisebente kamatima kuze sichubeke sikhonta Jehova, futsi loko kufaka ekhatsi kushumayela njalo nekufundzisa ngetindzaba letimnandzi.​—Imis. 2:46. w20.09 6-7 ¶15-17

Emaveni lamanyenti lamuhla sishumayela ngekukhululeka. Uhlala kulelinye yini lalawo mave? Nangabe kunjalo, tibute: ‘Ngiyisebentisa njani lenkhululeko?’ Leti tikhatsi letijabulisako kubantfu baJehova ngobe bamatasa benta umsebenti wekushumayela nekufundzisa ngelizinga lelikhulu. Kunyenti lesingakwenta kulomsebenti. Ungasisebentisa njani kahle sikhatsi sekuthula? (2 Thim. 4:2) Buka timo takho nobe telilunga lemndeni wakho ubone kutsi tiyakuvumela yini kutsi wente lokwengetiwe emsebentini wekushumayela, mhlawumbe uze ube lihlahlandlela. Nyalo akusiso sikhatsi sekufuna kunjinga ngobe loko lesinako ngeke sendlule nako ngesikhatsi sekuhlupheka lokukhulu. (Taga 11:4; Mat. 6:31-33; 1 Joh. 2:15-17) Bamemeteli labanyenti bafundze lulwimi lolusha kuze basite labanye kutsi bafundze ngaJehova. Inhlangano yaJehova inemathulusi lamanyenti lasisita kutsi sishumayele ngetilwimi letingetulu kwa-1 000! w20.09 16 ¶9-11

Lisotja lelikahle ngulelitsembekile. Lilwa kamatima kuze livikele umuntfu lelimtsandzako nobe intfo leligugu. Pawula wakhutsata Thimothi kutsi atinikele kuNkulunkulu, lokusho kunamatsela kuNkulunkulu ngekwetsembeka. (1 Thim. 4:7) Nangabe simtsandza kakhulu Nkulunkulu futsi sitinikele kuye, sitawuba nesifiso lesikhulu sekubambisisa liciniso. (1 Thim. 4:8-10; 6:6) Lisotja lelikahle kufanele liphindze liticeceshe kuze lilungele imphi. Thimothi bekahlale anebuhlobo lobuhle naNkulunkulu ngobe walalela seluleko saNkulunkulu sekutsi abalekele tifiso letimbi, waba nebuntfu lobuhle futsi watihlanganisa nalamanye emaKhristu. (2 Thim. 2:22) Loko bekudzinga kutsi aticeceshe kuze ente lokulungile. Sidzinga kuticecesha kutsi sente lokulungile kuze sincobe tifiso letimbi. (Rom. 7:21-25) Ngetulu kwaloko, sidzinga kuticecesha kuze sikhumule buntfu lobudzala futsi sigcoke buntfu lobusha. (Ef. 4:22, 24) Ngemuva kwekuba nelilanga lelidze, ngalesinye sikhatsi kungadzingeka sitihudvule kuze siye emihlanganweni yelibandla.​—Heb. 10:24, 25. w20.09 28 ¶9-11

Kufanele sibeketele nasisita umfundzi kutsi atfutfuke kuze agcine abhajatisiwe. Kodvwa kufanele sihlole kutsi unaso yini sifiso sekukhonta Jehova Nkulunkulu. Lomfundzi uyakhombisa yini kutsi uyetama kulalela imiyalo yaJesu? Nobe umane nje ufuna kufundza tintfo letinsha eBhayibhelini? Hlale uhlola kutfutfuka kwemfundzi. Nasi sibonelo, uyayiveta yini indlela lativa ngayo ngaJehova? Uyathantaza yini kuJehova? (Hla. 116:1, 2) Uyakutsandza yini kufundza liBhayibheli? (Hla. 119:97) Uba khona njalo yini emihlanganweni yelibandla? (Hla. 22:22) Ulwentile yini lushintjo endleleni laphila ngayo? Uyawucocela yini umndeni wakhe nobe bangani bakhe loko lakufundzako? (Hla. 9:1) Lokubaluleke kakhulu, uyafuna yini kuba nguFakazi waJehova? (Hla. 40:8) Nangabe lomfundzi angayikhombisi intfutfuko kuletintfo lesesikhulume ngato, ngekuhlakanipha, yetama kutfola kutsi kungani bese ucoca naye ngemusa kepha ungamfihleli lutfo. w20.10 18 ¶14-15

Babe waJesu losezulwini uhlale enta tincumo letikahle futsi nebatali bakhe balamhlabeni bebenta tincumo letihlakaniphile. Kodvwa njengobe Jesu akhula, kwadzingeka kutsi naye atentele takhe tincumo. (Gal. 6:5) Njengatsi sonkhe, naye bekanelilungelo lekutikhetsela. Bekangakhetsa kwenta loko lokufunwa nguye. Kodvwa wakhetsa kulondvolota buhlobo lobuhle naJehova. Ngesikhatsi Jesu afundza ngaloko Jehova labefuna akwente, wakhetsa kwenta intsandvo yaJehova. (Joh. 6:38) Bekati kutsi bekatawutondvwa bantfu labanyenti futsi kucabanga ngaloko bekumvisa buhlungu. Nobe kunjalo, wakhetsa kulalela Jehova. Ngesikhatsi Jesu abhajatiswa nga-29 C.E, intfo lebeyibaluleke kakhulu kuye bekukwenta loko Jehova lakufunako. (Heb. 10:5-7) Ngisho nangesikhatsi afa elugodvweni, wachubeka atimisele kwenta intsandvo yaBabe wakhe.​—Joh. 19:30. w20.10 29 ¶12; 30 ¶15

Bakhona yini bazalwane nabodzadze lobatiko ebandleni lokulo labacindzetelekile ngenca yekutsi bayagula nobe banaletinye tinkinga? Kungenteka labanye bashonelwe ngumuntfu labamtsandzako. Nangabe siva kutsi kukhona lodzinga lusito, singacela Jehova asisite sisho emavi latamdvudvuta nobe simentele lokutsite. Kungenteka emavi etfu nobe sento setfu kube sikhutsatako lesidzingwa ngumzalwane nobe dzadzewetfu. (1 Phet. 4:10) Siyati kutsi kufanele sibe nesibindzi ngobe Jehova unatsi. Uyasisita asebentisa Jesu netingilosi. Nangabe kuhambisana nenjongo yakhe, Jehova angasisita asebentisa bantfu labasemagunyeni. Njengobe kuke kwenteka kulabanyenti betfu, Jehova usebentisa umoya wakhe longcwele kuze ente lamanye emaKhristu kutsi asisite. Ngako, njengemphostoli Pawula, sinesizatfu lesihle sekuwasho ngekuciniseka lamavi latsi: “Jehova ungumsiti wami; ngeke ngesabe. Umuntfu angangentani?”​—Heb. 13:6. w20.11 17 ¶19-20

Baphostoli bebaciniseka kutsi Jehova unabo. Bekabanike emandla ekwenta timangaliso. (Imis. 5:12-16; 6:8) Kodvwa lamuhla, Jehova akasiniketi emandla ekwenta timangaliso. Nobe kunjalo, asebentisa liVi lakhe, Jehova uyasicinisekisa kutsi nangabe sihlushwa ngenca yekulunga uyajabula ngatsi futsi nemoya wakhe unatsi. (1 Phet. 3:14; 4:14) Kunekutsi sikhatsateke kakhulu ngekutsi sitawenta njani nasiphikiswa esikhatsini lesitako, kufanele sente konkhe lesingakwenta kuze sicinise indlela lesimetsemba ngayo Jehova kutsi utasisekela futsi asisindzise. Kufanele sisetsembe setsembiso saJesu lesitsi: “Ngitaninika loko lenitakusho ngiphindze ngininike nekuhlakanipha, futsi bonkhe labaniphikisako ngeke bakhone kumelana nani nobe kuniphikisa.” Jesu wasetsembisa watsi: “Ngekucinisela kwenu, nitawusindzisa kuphila kwenu.” (Luk. 21:12-19) Jehova ugcina ngisho nemininingwane lemincane engcondvweni yakhe yetikhonti letife tetsembekile. Ngalemininingwane lanayo, Jehova utawukhona kutivusa. w21.01 4 ¶12

Umphostoli Pawula bekangasiye wekucala kukhuluma ngekuvuswa kwalabafile. NaJobe wakhuluma ngako. Bekaciniseka kutsi Nkulunkulu utamkhumbula futsi amvuse ekufeni. (Jobe 14:7-10, 12-15) “Kuvuswa kwalabafile” kuyincenye ‘yetimfundziso letisisekelo’ temaKhristu. (Heb. 6:1, 2) Loko Pawula lakusho ngekuvuswa kwalabafile kubhalwe ku-1 KubaseKhorinte sehluko 15. Loko lakubhala kungenteka kwawakhutsata emaKhristu ekucala. Lesehluko singasikhutsata natsi futsi sicinise litsemba lesesinesikhatsi lesidze sinalo. Kuvuswa kwaJesu kusenta siciniseke kutsi tihlobo tetfu letifile titawuvuswa. Kuvuswa kwaJesu Khristu kwaba yincenye yetindzaba letimnandzi Pawula latibhalela baseKhorinte. (1 Khor. 15:1, 2) Ecinisweni, watsi nangabe umKhristu angakholelwa kutsi Jesu wavuswa, kukholwa kwakhe kulite.​—1 Khor. 15:17. w20.12 2 ¶2-4

Yini leyasita umphostoli Phetro? Wakhumbula kutsi Jesu wake wathantaza amcelela kutsi kukholwa kwakhe kungapheli. Jehova wawuphendvula lomthantazo losuka enhlitiyweni. Ngekuhamba kwesikhatsi, Jesu wabonakala kuPhetro kuze amkhutsate. (Luk. 22:32; 24:33, 34; 1 Khor. 15:5) Jesu waphindze wabonakala kubo bonkhe baphostoli ngemuva kwekutsi badwebe busuku bonkhe kodvwa bangabambi lutfo. Ngaleso sikhatsi Jesu waniketa Phetro litfuba lekumtjela kutsi umtsandza kanganani. Jesu wamcolela umngani wakhe lamtsandzako futsi wamnika umsebenti lomnyenti. (Joh. 21:15-17) Indlela Jesu lamphatsa ngayo Phetro ikhombisa kutsi unemusa njengaBabe wakhe. Ngako nasenta emaphutsa akukafanele sicabange kutsi Jehova ngeke asicolele. Khumbula kutsi Sathane ufuna sicabange loko. Kufanele sicabangisise ngendlela Jehova lasitsandza ngayo nendlela lacondza ngayo kwakheka kwetfu, nekutsi ufuna kusicolela. Kufanele simlingise nangabe labanye benta tintfo letisivisa buhlungu.​—Hla. 103:13, 14. w20.12 20-21 ¶17-19

Singafundza etibonelweni talabo labehluleka kuba nesibindzi futsi betsembele kuJehova. Kufundza etibonelweni tabo kutasisita kutsi singawenti emaphutsa labawenta. Asa wetsembela kuJehova ngesikhatsi anetinkinga. Kodvwa ngekuhamba kwesikhatsi wehluleka kwetsembela kuNkulunkulu kuze amsite, kunaloko wetama kuticatululela yena tinkinga takhe. (2 Khr. 16:1-3, 12) Lisu la-Asa lekucela emaSiriya kutsi amsite kungenteka lacale labonakala liphumelela. Kodvwa Juda waba nekuthula kwesikhashana. Jehova wamtjela asebentisa umphrofethi watsi: “Ngobe wetsembele enkhosini yaseSiriya wangetsembeli kuJehova Nkulunkulu wakho, libutfo lenkhosi yaseSiriya seliphunyukile esandleni sakho.” (2 Khr. 16:7) Kufanele singacabangi kutsi singakhona kuticatululela tsine tinkinga tetfu kunekutsi sicele Jehova asisite asebentisa liVi lakhe. Ngisho nobe kufanele sente sincumo ngekushesha kufanele setsembele kuJehova futsi utasisita kutsi sente sincumo lesikahle. w21.01 6 ¶13-15

Lamuhla, bantfu labanyenti balambile ngenca yekutsi bete imali leyenele yekutsenga kudla labakudzingako nobe ngenca yetinkinga letibangelwa timphi. Labanye bayaboshwa ngenca yekukholwa kwabo. Nobe kunjalo, sicumbi lesikhulu siyajabula ngobe siyati kutsi ngemuva kwekusindza ekubhujisweni kwalelive lelibi, sitawuhlale sinekudla lokunyenti futsi sitawucondziswa nguJehova. Nakubhujiswa lelive laSathane, sicumbi lesikhulu ngeke sikutfole “kushisa lokuhlabako” kwentfukutselo yaJehova latayitfululela etiveni. Nasekuphelile kuhlupheka lokukhulu, Jesu utawucondzisa laba labasindzile abayise ‘emantini ekuphila [lokuphakadze].’ (Semb. 7:17) Cabanga nje: Sicumbi lesikhulu sinelitsemba lelihle. Emkhatsini wetigidzigidzi tebantfu labake baphila, emalunga aso kungenteka angafi! (Joh. 11:26) Letinye timvu tibonga Jehova naJesu ngelitsemba lelihle letinalo! w21.01 16-17 ¶11-12

Ngebusuku bekugcina ngaphambi kwekutsi afe, Jesu bekacabanga ngato tonkhe tinkinga bafundzi bakhe bebatawubhekana nato. Ngenca yekutsi bekabatsandza bafundzi bakhe, Jesu wacela Babe wakhe kutsi ‘abavikele ngenca yalomubi.’ (Joh. 17:14, 15) Jesu bekati kutsi ngemuva kwekutsi sekabuyele ezulwini, Sathane Develi bekatawuchubeka alwa nalabo labafuna kukhonta Jehova. Ngako bantfu baJehova bebatawudzinga kuvikelwa. Lamuhla sikudzinga kakhulu kuvikelwa nguJehova. Sathane ucoshiwe ezulwini, ‘utfukutsele kakhulu.’ (Semb. 12:12) Wente labanye bantfu bacabanga kutsi nabasiphatsa kabi basuke “bentela Nkulunkulu umsebenti longcwele.” (Joh. 16:2) Labanye labangakholelwa kuNkulunkulu basiphatsa kabi ngobe sehlukile kubantfu balelive. Kunobe ngukuphi, asesabi. Kungani? Imphendvulo siyitfola kulombhalo welusuku lwalamuhla. w21.03 26 ¶1, 3

Konkhe Jehova lakwentako, ukwenta ngobe asitsandza. Ukhombisa kutsi uyasitsandza ngekunakekela tonkhe tidzingo tetfu. Ngenca yekutsi uyasitsandza, Jehova wasilungiselela inhlawulo. NaJesu usitsandza kakhulu kangangekutsi wanikela ngekuphila kwakhe ngenca yetfu. (Joh. 3:16; 15:13) Kute lokungenta kutsi Jehova naJesu bangabatsandzi labo labatsembekile kubo. (Joh. 13:1; Rom. 8:35) Ngendlela lefanako, konkhe lokwentiwa yinhloko yemndeni kufanele ikwente ngobe inelutsandvo. Kungani loko kubalulekile? Umphostoli Johane watsi: “Loyo longamtsandzi umzalwane wakhe lambonile [lilunga lemndeni], ngeke amtsandze Nkulunkulu langakamboni.” (1 Joh. 4:11, 20) Indvodza lewutsandzako umndeni wayo futsi lefuna kulingisa Jehova naJesu itawusita umndeni wayo kutsi ube nebuhlobo lobuhle naJehova, iwente utive uvikelekile futsi iwunakekele. (1 Thim. 5:8) Itawufundzisa bantfwana bayo futsi ibekhute. Itawuchubeka ifundza kwenta tincumo letitawudvumisa Jehova futsi tisite nemndeni wayo. w21.02 5 ¶12-13

Babe wetfu lonelutsandvo uyatati tintfo letimbi letenteke kitsi letingasenta sitive singesilutfo. Uyabubona nebuntfu betfu lobuhle ngisho nobe tsine singacabangi kutsi sinabo lobo buntfu. (1 Joh. 3:19, 20) Kungenteka umuntfu wetama kamatima kuyekela kwenta intfo lembi kodvwa kungenteka aphindze ente liphutsa lelifanako futsi advumateke. Kuliciniso kutsi sitiva sinelicala nangabe sente sono. (2 Khor. 7:10) Nobe kunjalo, akukafanele sive buhlungu kakhulu ngemaphutsa lesiwente esikhatsini lesendlulile, size sicabange sitsi: ‘Vele mine ngisehluleki. Jehova ngeke angicolele.’ Kucabanga lokufana naloku akusilo liciniso, futsi kungasenta siyekele kukhonta Jehova. Kunaloko, ‘lungisa indzaba’ naJehova ngekutsi uthantaze kuye futsi umcele akucolele. (Isa. 1:18) Nakayibona indlela lotisola ngayo, utakucolela. Lokunye longakwenta kutsi ucoce nalabadzala belibandla. Ngemusa, batakusita kutsi uphindze ube nebuhlobo lobuhle naJehova.​—Jak. 5:14, 15. w20.12 23 ¶5-6

Jesu bekabahlonipha bafati. Akazange alingise baFarasi lebebacabanga kutsi bafati abakabaluleki kunemadvodza. BaFarisi bebangakhulumi nebafati embikwebantfu futsi bebangakhulumi nabo ngemiBhalo. Kodvwa Jesu wakhuluma nemadvodza nebafati ngemaciniso laseBhayibhelini. (Luk. 10:38, 39, 42) Waphindze wahamba nebafati nakayoshumayela. (Luk. 8:1-3) Wabaniketa nemsebenti wekutjela baphostoli kutsi sewuvusiwe. (Joh. 20:16-18) Umphostoli Pawula wakhumbuta Thimothi kutsi ahloniphe bafati. Wavuma nekutsi ngumake waThimothi nagogo wakhe labacale bafundzisa Thimothi “imibhalo lengcwele.” (2 Thim. 1:5; 3:14, 15) Pawula wabasho ngemagama bodzadze ngesikhatsi abhala incwadzi yakhe lebeyiya kumaKhristu aseRoma. Pawula wawunaka umsebenti lobewentiwa ngulabodzadze futsi wababonga ngawo.​—Rom. 16:1-4, 6, 12; Fil. 4:3. w21.02 15 ¶5-6