November

Ngesizatfu sekutsi kuncane lesikwatiko ngesimo Jona lebekabhekene naso, singase sicabange kutsi bekangaketsembeki. Jona watfola sicondziso lebesivela kuJehova sekutsi ayomemetela umlayeto wesehlulelo eNinive. Kunekutsi Jona alalele Jehova, wagibela umkhumbi lobewuya lapho bekangakatfunywa khona ngobe ‘bekabalekela Jehova.’ (Jona 1:1-3) Bewungamniketa yini Jona lelinye litfuba lekutsi ente lesabelo? Kungenteka bewungeke. Kodvwa Jehova wasibona sizatfu sekuniketa Jona lelinye litfuba lekwenta lesabelo. (Jona 3:1, 2) Emthantazweni wakhe Jona wativeta kutsi bekangumuntfu lonjani. (Jona 2:1, 2, 9) Kuyacaca kutsi Jona bekathantaza kuJehova tikhatsi letinyenti. Lomunye wemithantazo yakhe lawusho ngesikhatsi asesiswini senhlanti usisita sicondze kutsi Jona bekangasuye nje umuntfu lowabalekela sabelo sakhe. Emavi lawasho akhombisa kutsi bekatfobekile, abonga futsi atimisele kulalela Jehova. Kungako Jehova angazange anake emaphutsa aJona kuphela, kunaloko wawuphendvula umthantazo wakhe futsi wachubeka amsebentisa njengemphrofethi! Kubaluleke kakhulu kutsi lomdzala welibandla anikete seluleko nasekaweve onkhe emaciniso! w20.04 15 ¶4-6

Bafundzi bangelikhulu lekucala bakwemukela loko labakufundziswa futsi betsembela emoyeni longcwele kutsi utabasita kuze balicondze liVi laNkulunkulu. Bacwaninga kuze baciniseke kutsi loko labakufundziswa bekusekelwe emiBhalweni. (Imis. 17:11, 12; Heb. 5:14) Abazange bacinise kukholwa kwabo endleleni lebebativa ngayo nobe etintfweni lebebaticabanga nje kuphela, futsi abazange bakhonte Jehova ngenca yekutsi bebajabula nabanalabanye bazalwane babo. Kunaloko, kukholwa kwabo kwaciniswa ‘lwati lolungulonalona ngaNkulunkulu.’ (Khol. 1:9, 10) Emaciniso laseBhayibhelini akashintji. (Hla. 119:160) Nasi sibonelo, emaciniso laseBhayibhelini akashintji nangabe umuntfu lesikholwa naye asivisa buhlungu nobe enta sono lesikhulu, futsi akashintji nangabe sibhekene netimo letimatima. Ngako-ke, kufanele sikwati konkhe lokufundziswa liBhayibheli futsi siciniseke kutsi kuliciniso. Nangabe sinekukholwa lokucinile kuloko lokufundziswa liBhayibheli, sitawuhlala setsembekile kuJehova ngisho nangetikhatsi letimatima. w20.07 9 ¶6-7

Jesu uyakubona lesikwentela bazalwane labagcotjiwe, futsi kufana nekutsi sentela yena. (Mat. 25:34-40) Indlela leyinhloko yekusekela labagcotjiwe kutsi siwente ngekutimisela umsebenti wekwenta bafundzi Jesu latjela balandzeli bakhe kutsi bawente. (Mat. 28:19, 20) Ngekusitwa ‘nguletinye timvu,’ bomnakaboKhristu bangakhona kufeza umsebenti wekushumayela lowentiwa emhlabeni wonkhe. (Joh. 10:16) Nangabe ungulomunye waletinye timvu, ngaso sonkhe sikhatsi nawushumayela, usuke ukhombisa kutsi uyamtsandza Khristu nabomnakabo. Siphindze sibe bangani baJehova naJesu ngekutsi sinikele ngemali kuze sisekele umsebenti labawucondzisako. (Luk. 16:9) Nasi sibonelo, singawunikelela umsebenti lowentiwa emhlabeni wonkhe, lofaka ekhatsi kusita lapho kuvele tehlakalo temvelo nobe letinye timo letimatima. Singaphindze sinikele kuze kubhadalwe tindleko teliHholwa letfu leMbuso siphindze sisite lesibatiko kutsi badzinga lusito.​—Taga 19:17 w20.04 24 ¶12-13

Kuze kugcwaliseke lesiphrofetho, inkhosi yasenyakatfo ayizange ikhombise kubahlonipha “bonkulunkulu baboyise.” Kanjani? I-Soviet Union beyifuna kususa tinkholo futsi kunyenti lebeyetama kukwenta kuze itisuse. Kuze ifeze lomgomo wayo, ngasekucaleni kwa-1918, hulumende we-Soviet Union watsi tikolwa atifundzise kutsi kute Nkulunkulu. Ngako-ke lenkhosi yasenyakatfo ‘yamhlonipha njani nkulunkulu wetinqaba’? I-Soviet Union yasebentisa imali lenyenti kuze icinise libutfo layo lemphi futsi yakha tikhali letinyenti tembubhiso kuze ibe ngumbuso lonemandla. Inkhosi yasenyakatfo nenkhosi yaseningizimu ase aba netikhali letinemandla kakhulu kuze abulale bantfu labanyenti! Inkhosi yasenyakatfo isebente ndzawonye nenkhosi yaseningizimu kuze tente intfo yinye lebalulekile. ‘Timise sinengiso lesingusona sibanga incitsakalo,’ lokunguMhlabuhlangene.​—Dan. 11:31. w20.05 6-7 ¶16-17

Ngubani longasita kuze kufunwe lesebapholile? Bonkhe bamemeteli ebandleni, lokufaka ekhatsi labadzala, emahlahlandlela, nalabo labanemalunga emndeni lasapholile bangasita kuze kutfolwe labapholile. Unaye yini umngani nobe sihlobo lesingaseti esifundvweni? Uke wahlangana yini nemuntfu lopholile nawenta umsebenti wekushumayela emtini ngemuti nobe nawushumayela etindzaweni tawonkhewonkhe? Nangabe lomuntfu angatsandza kutsi avakashelwe, mtjele kutsi ungajabula kuniketa labadzala belibandla lelisedvute imininingwane yakhe. Lomdzala lokutsiwa nguThomas utsi: “Ngicale ngibute bazalwane nabodzadze labehlukahlukene lokungenteka banelwati mayelana nebantfu labapholile kutsi bahlala kuphi. Ngalesinye sikhatsi, ngibuta bamemeteli kutsi kute yini labamatiko longasayi emihlanganweni. Nangivakashela bazalwane nabodzadze lasebapholile ngiyababuta kutsi banjani bantfwana babo netihlobo tabo. Labanye labapholile bebeta nebantfwana babo emihlanganweni futsi kungenteka labantfwana bake baba bamemeteli. Nabo bangasitwa kuze babuyele kuJehova.” w20.06 24 ¶1; 25 ¶6-7

Kuto tonkhe tidalwa letikhona emhlabeni, bantfu kuphela labanelikhono lekufundza indlela lokufanele batiphatse ngayo ngekukhumbula lokwenteka esikhatsini lesendlulile. Ngesizatfu saloko, singakhona kufundza timiso letikahle tekutiphatsa futsi sishintje nendlela yetfu yekucabanga neyekuphila. (1 Khor. 6:9-11; Khol. 3:9, 10) Ecinisweni, singakhona kucecesha bonembeza betfu kutsi babone umehluko emkhatsini walokuhle nalokubi. (Heb. 5:14) Singafundza kuba nelutsandvo, luvelo nemusa. Singafundza nekulingisisa kulunga kwaJehova. Lenye indlela lesikhombisa ngayo kutsi siyabonga ngelikhono lekukhumbula, kutsi sikhumbule tintfo Jehova lasisite kuto nalasidvudvute kuto esikhatsini lesendlulile. Loku kutasenta siciniseke kutsi utasisita nasesikhatsini lesitako. (Hla. 77:12; 78:4, 7) Lenye indlela kutsi sikhumbule tintfo letinhle labanye bantfu labasentele tona futsi sikhombise kutsi siyabonga nangaloko labasentela kona. Bacwaningi batfole kutsi bantfu lababongako bayajabula. w20.05 23 ¶12-13

Cabanga ngendlela Mosi lativa ngayo ngesikhatsi eme emkhatsini wemadvwala futsi abona kwendlula inkhatimulo yaJehova. I-Insight on the Scriptures itsi, “Loku kungenteka kwaba yintfo lemangalisa kakhulu leyake yabonwa ngumuntfu.” Mosi weva lamavi lalandzelako lakhulunywa yingilosi, latsi: “[Jehova, Jehova], Nkulunkulu lonesihawu nemusa; uyephuta kutfukutsela andze ngemusa nangekwetsembeka, ubentela umusa labatinkhulungwane, atsetselele emaphutsa, nalokubi, netono.” (Eks. 33:17-23; 34:5-7) Kungenteka Mosi bekacabanga ngaloko lobekwenteka njalo nje nakasebentisa libito laJehova, njengobe kusho emavi emBhalo welusuku walamuhla. Nasicabanga ngelibito laJehova, kufanele sizindle ngekutsi Jehova ungumuntfu lonjani. Kufanele sicabange ngebuntfu bakhe lobufaka ekhatsi emandla akhe, kuhlakanipha, kulunga nelutsandvo lwakhe. Kucabanga ngalobuntfu bakhe kutawusenta simhloniphe kakhulu.​—Hla. 77:11-15. w20.06 8-9 ¶3-4

Jesu washo kutsi bafundzi bakhe bebatawubonakala ngekutsi batsandzane. (Joh. 13:34, 35) Kodvwa kuze sibe nekukholwa lokucinile, kunaletinye tintfo lokudzingeka kutsi sitente. Kukholwa kwetfu kufanele kusekelwe ngetulu nje kwelutsandvo emaKhristu lanalo njengobe abantfu baNkulunkulu. Kungani? Asesitsi umzalwane nobe dzadze wenta sono lesikhulu, kungaba ngulomdzala welibandla nobe lihlahlandlela. Kutsiwani nangabe umzalwane nobe dzadze akuvisa buhlungu? Kutsiwani nangabe lomunye aba sihlubuki, bese utsi tsine asilikhulumi liciniso. Nangabe kwenteka tintfo letinjena, utawukhubeka yini bese uyayekela kukhonta Jehova? Yini lesiyifundzako kuloku? Nangabe ukholwa kuNkulunkulu ngenca yaloko bantfu labakwentako hhayi ngenca yekutsi unebuhlobo lobuhle naye, kutawufana nekutsi wakha indlu yakho endzaweni yalomunye umuntfu. Indlela lotiva ngayo ngaJehova nangebantfu bakhe ingakusita kuze ube nekukholwa lokucinile. Kubalulekile nekutsi ulitadishe liBhayibheli, ukucondze loko lofundzako futsi ucwaninge kuze uciniseke kutsi loko lokufundzako ngaJehova kuliciniso.​—Rom. 12:2. w20.07 8 ¶2-3

Tinyenti tintfo letentekako letikhombisa kutsi tingilosi tiyasita kuze kutfolakale lesebapholile labafuna kubuyela kuJehova. (Semb. 14:6) Nasi sibonelo, Silvio wase-Ecuador wathantaza ngalokujulile acela lusito kuze abuyele kuJehova. Asathantaza, kwanconcotsa labadzala lababili emnyango wakhe. Labazalwane bajabula ngekumnika lusito lebekaludzinga. Sitawujabula kakhulu nasisita labapholile kutsi babuyele kuJehova. Naka naku lokushiwo nguSalvador lolihlahlandlela futsi lowenta imetamo kuze asite lesebapholile, utsi: “Ngaletinye tikhatsi, ngijabula kakhulu nangibona labapholile babuyela kuJehova, ngize ngifise nekukhala. Ngiyajabula kusetjentiswa nguJehova kuze ngisite tikhonti takhe tibuyele kuye.” Nangabe ungasayi emihlanganweni yelibandla, ciniseka kutsi Jehova usakutsandza. Jehova ukulindzile futsi utakwemukela nawubuya. w20.06 29 ¶16-18

NjengemFundzisi Lomkhulu, Jehova usinike tibonelo eVini lakhe kuze tisifundzise. (Isa. 30:21) Sifundza ngetindzaba letiseBhayibhelini tebantfu lebebanebuntfu lobujabulisa Nkulunkulu. Siphindze sifundze ngaloko lokwenteka kubantfu labehluleka kukhombisa lobuntfu lobuhle. (Hla. 37:37; 1 Khor. 10:11) Cabanga ngalokwenteka eNkhosini Sawula. Beyitfobekile ngesikhatsi iseyincane. Beyikwati loko lebeyingeke ikhone kukwenta futsi yangabata kwenta imisebenti leminyenti. (1 Sam. 9:21; 10:20-22) Kodvwa ngekuhamba kwesikhatsi, Sawula wacala kutikhukhumeta futsi wenta tintfo lebekungakafaneli atente. Wacala kwenta kanjalo ngemuva kwekutsi abe yinkhosi. Ngalesinye sikhatsi, wehluleka kubeketela ngesikhatsi asemele umphrofethi Samuweli futsi wanikela ngemhlatjelo wekushiswa ngisho nobe bekete lilungelo lekwenta kanjalo. Ngesizatfu saloko, Sawula walahlekelwa ngumusa waJehova futsi walahlekelwa nalilungelo lekuba yinkhosi. (1 Sam. 13:8-14) Sisuke sikhombisa kutsi sihlakaniphile nasifundza kulesibonelo lesisecwayiso futsi sigwema kwenta tintfo lokungakafaneli sitente. w20.08 10 ¶10-11

Kuliciniso kutsi asebentisa Khristu, Jehova usiphe “tipho letibantfu” ebandleni Lakhe. (Ef. 4:8) ‘Letipho letibantfu’ tifaka ekhatsi emalunga eSigungu Lesibusako, basiti beSigungu Lesibusako, emalunga eKomidi yeliGatja, babonisi labajikeletako, bothishela betikolwa letisekelwe eBhayibhelini, labadzala belibandla netinceku letisebentako. Bonkhe labazalwane bamiswe ngumoya longcwele waJehova kutsi banakekele timvu takhe letiligugu futsi bacinise libandla. (1 Phet. 5:2, 3) Bazalwane babekwa ngumoya longcwele kuze bente imisebenti leyehlukene ebandleni. Njengobe emalunga emtimba, lokufaka ekhatsi tandla netinyawo, kusebenta ndzawonye kuze kuzuze umtimba wonkhe, bazalwane lababekwe ngumoya longcwele basebenta kamatima kuze kuzuze lonkhe libandla. Abatifuneli ludvumo. Kunaloko, balwela kucinisa libandla. (1 Thes. 2:6-8) Simbonga kakhulu Jehova ngalabazalwane lababeka tidzingo talabanye tite kucala kunetabo! w20.08 21 ¶5-6

Sizatfu lesisenta sishumayele bantfu kutsi ‘baphetfwe kabi, bahlakatekile’ futsi bakudzinga mbamba kufundza liciniso ngeMbuso. (Mat. 9:36) Jehova ufuna kutsi tonkhe tinhlobo tebantfu titfole lwati lolungulonalona lweliciniso futsi tisindziswe. (1 Thim. 2:4) Kucabanga ngekutsi umsebenti wekushumayela ungasindzisa kuphila kwebantfu kutasisita sifune kushumayela. Sisindzisa kuphila kwebantfu. (Rom. 10:13-15; 1 Thim. 4:16) Kufanele siphindze sibe nemathulusi lakahle ekushumayela futsi kufanele sati kutsi asetjentiswa njani. Jesu wanika bafundzi bakhe ticondziso tekutsi bangabadweba njani bantfu. Wabatjela kutsi baphatse ini, bashumayele kuphi nekutsi bashumayele kanjani. (Mat. 10:5-7; Luk. 10:1-11) Lamuhla, inhlangano yaJehova isinike Emathulusi Ekufundzisa lasebenta kahle kakhulu. Siyafundziswa nekutsi singawasebentisa njani. Lokuceceshwa kusisita kutsi sibe nesibindzi futsi sibe nemakhono lesiwadzingako kuze siphumelele nasenta lomsebenti.​—2 Thim. 2:15. w20.09 4 ¶6-7, 10

Umphostoli Johane wajabula kakhulu ngesikhatsi eva kutsi labo lebekabasitile kuze bafundze liciniso bebachubeka bakhonta Jehova ngekwetsembeka. Bahlangabetana netinkinga letinyenti, futsi Johane wachubeka asebenta kamatima kuze acinise kukholwa kwalamaKhristu letsembekile lebekawatsatsa njengebantfwana. Ngendlela lefanako, natsi siyajabula nangabe bantfwana betfu, kungaba ngulesibatalako nobe lesibafundzise liciniso, batinikela kuJehova futsi bachubeka bamkhonta. (3 Joh. 3) Cishe nga-98 C.E., umoya longcwele waJehova wasita Johane kuze abhale letincwadzi letintsatfu. Injongo yaletincwadzi letintsatfu bekukusita emaKhristu letsembekile kutsi achubeke akholwa kuJesu futsi achubeke ahamba ecinisweni. Johane bekakhatsatekile ngetintfo letimbi lebetentiwa bafundzisi bemanga ebandleni. (1 Joh. 2:18, 19, 26) Labafundzisi bemanga bebatsi bayamati Nkulunkulu, kodvwa bebangayilaleli imiyalo yakhe. w20.07 20 ¶1-3

Siyawukholwa lomlayeto lesiwushumayelako, ngako sifuna kutjela bantfu labanyenti ngawo. Siyatetsemba tetsembiso letiseVini laNkulunkulu. (Hla. 119:42; Isa. 40:8) Sitibonile tiphrofetho teliBhayibheli tigcwaliseka esikhatsini setfu. Sibabonile bantfu bashintja kuphila kwabo ngemuva kwekusebentisa timiso teliBhayibheli. Loku kusenta siciniseke kutsi bantfu kufanele bative letindzaba letimnandzi teMbuso waNkulunkulu. Sinekukholwa kuJehova, longuMtfombo wemlayeto lesiwushumayelako, nakuJesu lonikwe nguJehova lilungelo lekuba yiNkhosi eMbusweni waKhe. Ngisho nobe kungentekani kitsi, Jehova utawuhlale asiphephelo setfu nemandla etfu. (Hla. 46:1-3) Ngetulu kwaloko, siyaciniseka kutsi Jesu ucondzisa umsebenti wekushumayela asezulwini, asebentisa emandla nelilungelo lalinikwe nguJehova. (Mat. 28:18-20) Kukholwa kusenta siciniseke kutsi Jehova utayibusisa imetamo yetfu. w20.09 12 ¶15-17

Ngalesinye sikhatsi bodzadze bangahle badzinge kuvikelwa nangabe babhekene nesimo lesitsite. (Isa. 1:17) Nasi sibonelo, dzadze loshonelwe ngumyeni wakhe nobe lodivosile angahle adzinge umuntfu longamsita amentele tintfo lebetentiwa yindvodza yakhe. Dzadze losakhulile angahle adzinge lusito lwekukhuluma nabodokotela. Nobe dzadze lolihlahlandlela losita kuleminye imisebenti yenhlangano angahle adzinge lotsite longamkhulumela nangabe labanye bamsola ngekutsi akayi ensimini njengalamanye emahlahlandlela. Asesicoce ngesibonelo saJesu. Ngesikhatsi labanye bangaticondzi tintfo lebetentiwa ngulabanye bafati lebebesaba Nkulunkulu, Jesu wabavikela. Sibonelo saloko kutsi wamvikela Mariya ngesikhatsi Mata amsola. (Luk. 10:38-42) Waphindze wamvikela ngesikhatsi labanye bacabanga kutsi wente sincumo lesibi. (Mak. 14:3-9) Jesu wasicondza sizatfu lesenta Mariya wenta loko futsi wambonga. Waphindze waphrofetha kutsi loko lakwentile kutawukhulunywa ngako “nobe ngukuphi lapho letindzaba letimnandzi tishunyayelwa khona emhlabeni wonkhe.” w20.09 24 ¶15-16

Umelusi lokahle bekati kutsi timvu tingalahleka. Nangabe imvu ilahlekile, umelusi bekangayijezisi. Cabanga ngesibonelo Nkulunkulu lasibekela sona nakasita letinye tikhonti takhe letike tamshiya sikhatsi lesitsite. Umphrofethi Jona wasibalekela sabelo sakhe. Nobe kunjalo, Jehova akazange amlahle Jona. Njengemelusi lokahle, Jehova wamsita wamupha emandla kuze akhone kusenta kahle lesabelo sakhe. (Jona 2:7; 3:1, 2) Ngekuhamba kwesikhatsi Nkulunkulu wasebentisa sihlahla semhlafutfo kuze asite Jona acondze kubaluleka kwemphilo yemuntfu. (Jona 4:10, 11) Ngusiphi sifundvo lesisitfolako? Labadzala akukafaneli balahle litsemba ngalasebapholile. Esikhundleni saloko, labadzala kufanele betame kucondza kutsi yini lebangele imvu yakhwesha emhlambini. Nangabe lemvu ibuyela kuJehova, labadzala bayachubeka bayinakekela futsi bayikhombisa kutsi bayayitsandza. w20.06 20-21 ¶10-12

Ngemuva kwekuwa kwe-Soviet Union nga-1991, bantfu baNkulunkulu lebebabuswa ngiyo bakhululeka sikhatsi lesitsite, futsi Danyela watsi lenkhululeko ‘ilusito loluncane.’ Umphumela waba kutsi bakhona kushumayela ngekukhululeka, futsi kwaba nebamemeteli labanyenti kulamave lebekabuswa yi-Soviet Union. Ngemuva kweminyaka leminyenti i-Russia kanye nemave layisekelako yaba yinkhosi yasenyakatfo. Kuze umbuso ube yinkhosi yasenyakatfo nobe ube yinkhosi yaseningizimu, kufanele wente tintfo letintsatfu: (1) kufanele ubuse endzaweni lenebantfu baNkulunkulu, (2) kufanele ukhombise ngetento kutsi usitsa saNkulunkulu nebantfu bakhe, futsi (3) kufanele ubange kubusa nalenye inkhosi. I-Russia kanye netive letiyisekelako ihlasele bantfu baNkulunkulu ngekutsi ivimbe umsebenti wabo wekushumayela, futsi yaphatsa kabuhlungu bazalwane nabodzadze. Letento tayo tikhombisa kutsi iyamenyanya Jehova kanye nebantfu bakhe. Iyachubeka yetama kuba nemandla kunenkhosi yaseningizimu, lokuyi-Britain ne-United States. w20.05 12-13 ¶3-4

Njengobe kufundzisa kufananiswa nekwenta bafundzi, sifuna kufundzisa ngendlela lencono kakhulu. Emhlabeni wonkhe sichuba tifundvo teliBhayibheli nebantfu labatigidzi. Siyakutsandza loko lesikufundzisako lokuseVini laNkulunkulu. Ngenca yaloko, singase sifune kukhuluma sikhatsi lesidze ngako. Nobe kunjalo, ngisho nobe uchuba Sifundvo seSicongesekulindza, Sifundvo SeliBhayibheli Selibandla nobe uchubela umuntfu sifundvo seliBhayibheli, akukafaneli ukhulume kakhulu. Kuze umfundzisi alisebentise kahle liBhayibheli kufanele atibambe, angachazi konkhe lakwatiko ngelivesi nobe ngendzaba letsite leseBhayibhelini. (Joh. 16:12) Cabanga ngekutsi bekunganani lebewukwati ngeliBhayibheli ngesikhatsi ubhajatiswa naloko lokwatiko nyalo. Kungenteka bewati timfundziso letisisekelo kuphela. (Heb. 6:1) Kukutsetse iminyaka leminyenti kwati loku lokwatiko nyalo, ngako ungetami kufundzisa umfundzi lomusha konkhe ngasikhatsi sinye. w20.10 14-15 ¶2-4

Jehova wakhetsela Jesu batali labakahle kakhulu. (Mat. 1:18-23; Luk. 1:26-38) Emavi aMariya lasuka enhlitiyweni labhalwe eBhayibhelini akhombisa kutsi bekamtsandza Jehova neliVi lakhe. (Luk. 1:46-55) Indlela Josefa latilalela ngayo ticondziso taJehova beyikhombisa kutsi uyamtsandza Nkulunkulu futsi ufuna kumjabulisa. (Mat. 1:24) Naka kutsi Jehova akazange akhetsele Jesu batali labanjingile. Umnikelo lowentiwa nguJosefa naMariya ngemuva kwekutalwa kwaJesu, wakhombisa kutsi bebaphuyile. (Luk. 2:24) Kungenteka kutsi bebete imali lenyenti nobe tintfo letinyenti, ikakhulukati ngobe bebanebantfwana labasikhombisa nobe ngetulu. (Mat. 13:55, 56) Jehova wamvikela Jesu kuletinye tintfo lebetiyingoti, kodvwa akazange amvikele kuto tonkhe tinkinga. (Mat. 2:13-15) Sibonelo saloko kutsi Jesu bekanetihlobo letingakholwa letacale tangamkholwa kutsi unguMesiya. (Mak. 3:21; Joh. 7:5) Kungenteka Josefa wafa ngesikhatsi Jesu asemusha futsi loko kwamvisa buhlungu Jesu. w20.10 26-27 ¶4-6

Uke wativa yini unesitunge futsi weva shengatsi kute lokusitako kuze ukhone kubhekana netinkinga takho? Labanyenti bake bativa kanjalo, lokufaka ekhatsi netikhonti taJehova letetsembekile. (1 Khos. 19:14) Nangabe loko kwenteka nakuwe, khumbula setsembiso saJehova lesitsi: “Ngeke ngize ngikushiye, futsi ngeke ngize ngikulahle.” Ngako singasho ngekuciniseka sitsi: “Jehova ungumsiti wami; ngeke ngesabe.” (Heb. 13:5, 6) Umphostoli Pawula wawabhalela emaKhristu lebekahlala eJudiya lamavi, nga-61 C.E. Lamavi akhe asikhumbuta loko lokwashiwo ngumhlabeleli kuTihlabelelo 118:5-7. Njengalomhlabeleli, Pawula bekati kutsi Jehova utamsita ngobe bekamsite tikhatsi letinyenti ngaphambili. Nasi sibonelo, nasekusele iminyaka lemibili ngaphambi kwekutsi abhale incwadzi leya kumaHebheru, Pawula wasindza eluhambweni lwakhe loluyingoti elwandle. (Imis. 27:4, 15, 20) Kulo lonkhe loluhambo, Jehova wasita Pawula ngetindlela letinyenti. w20.11 12 ¶1-2

Kungani kungasiko kuhlakanipha kuhlale sicabanga kutsi kuphila kwetfu bekuncono esikhatsini lesendlulile? Kungobe kungasenta sicabange ngetintfo letinhle kuphela letenteka esikhatsini lesendlulile. Cabanga ngesibonelo sema-Israyeli asendvulo. Ngemuva kwekuphuma eGibhithe, asheshe akhohlwa kutsi kuphila bekumatima kanganani khona. Kunaloko, banaka kudla lokumnandzi lebebakudla. Batsi: “Sesikhumbule eGibhithe lapho sasidla khona inhlanti mahhala, sasidla emaselwa, nemajoti, nashaladi na-anyanisi, negalikhi.” (Num. 11:5) Kodvwa bebakudla “mahhala” yini vele lokudla? Cha. Ema-Israyeli bewaphatfwa kabi futsi ngaleso sikhatsi bewatigcila eGibhithe. (Eks. 1:13, 14; 3:6-9) Nanobe kunjalo, ngekuhamba kwesikhatsi akhohlwa ngalokuphatfwa kabi futsi afisa kubuyela emuva. Akhetsa kunaka tintfo letinhle lebetenteka esikhatsini lesendlulile kunekunaka loko Jehova lebekawentela kona. Jehova akazange ajabule ngalesento sabo.​—Num. 11:10. w20.11 25 ¶5-6

Ngaletinye tikhatsi, singahle sicabange kutsi kuphila kufisha futsi ‘kugcwele tinkinga.’ (Jobe 14:1) Ngaletinye tikhatsi loku kuyasidvumata. Tikhonti taJehova letinyenti lokukhulunywa ngato eBhayibhelini take tativa ngaleyondlela. Letinye taze tafuna nekufa. (1 Khos. 19:2-4; Jobe 3:1-3, 11; 7:15, 16) Kodvwa Jehova longuNkulunkulu lebebametsemba, bekabadvudvuta futsi abacinisa. Loko lokwenteka kubo kwabhalwa kuze sifundze ngako futsi siyadvudvuteka nasikufundza. (Rom. 15:4) Cabanga ngendvodzana yaJakobe lokunguJosefa. Kuphila kwaJosefa kwashintja ngalokuphelele ngesikhashana nje. Besekangasahlali ekhaya nababe wakhe lebekamtsandza. Waba sigcili eGibhithe wasebentela lenye indvodza lebeyingamati Jehova. (Gen. 37:3, 4, 21-28; 39:1) Umfati waPhotifari wabese ucambela Josefa emanga watsi beketama kumdlwengula. Photifari akazange etame kutfola liciniso lalendzaba, kunaloko wavalela Josefa ejele. (Gen. 39:14-20; Hla. 105:17, 18) Siyaciniseka kutsi Josefa bekufanele advumateke! w20.12 16-17 ¶1-4

Jesu watsi leyo yintfo lebaluleke kakhulu lokufanele siyisho nasithantaza. Asho kutsini lamavi lashiwo nguJesu? Kungcwelisa intfo letsite kusho kuyenta ibe ngcwele, futsi ihlanteke. Labanye bangase batibute kutsi, ‘Libito laJehova alisiko ngcwele futsi alikahlanteki yini?’ Kuze siphendvule lombuto, kufanele sicabange ngekutsi libito lifaka ekhatsi ini. Libito akusilo nje ligama lesingalibhala ephepheni nobe silisho ngemlomo. Naka naku lokushiwo liBhayibheli, litsi: “Libito lelihle lincono kunemcebo lomnyenti.” (Taga 22:1; Shu. 7:1) Kungani libito libaluleke kakhulu? Kungobe lifaka ekhatsi lidvumela lemuntfu, naloko bantfu labakucabangako ngemnikati walelo bito. Ngako indlela libito lelibhalwe ngayo nobe lelibitwa ngayo akusiyo lebalulekile, kodvwa lokubaluleke kakhulu nguloko bantfu labakucabangako nababona nobe nabeva lelo bito. Nangabe bantfu bakhuluma emanga ngaJehova, basuke benta labanye kutsi bacabange tintfo letimbi ngaye. Nangabe bantfu babona tintfo letimbi tenteka, basola Nkulunkulu futsi bahlambalate libito lakhe. w20.06 3 ¶5-7

Singakhatsateka kakhulu ngetinkinga lesinato kangangekutsi kube bete lokunye lesicabanga ngako. Nasi sibonelo, singahle sikhatsateke ngekutsi ngeke sibe nemali leyenele yekutsenga tintfo lesitidzingako nobe sikhatsateke ngekutsi sitawugula bese asisakhoni kusebenta nobe silahlekelwe ngumsebenti. Kungenteka sikhatsateke nangekutsi singahle singetsembeki nasilingeka kutsi sephule umtsetfo waNkulunkulu. Madvutane, Sathane utawenta labo labalawulako kutsi bahlasele bantfu baNkulunkulu, ngako singahle sikhatsateke ngekutsi sitawenta njani nangabe labo labasekela Sathane basihlasela. Kungenteka sitibute, ‘Kukabi yini kukhatsateka ngaletintfo?’ Siyati kutsi Jesu watjela balandzeli bakhe watsi: “Ningakhatsateki.” (Mat. 6:25) Jesu bekasho kutsi kufanele kube bete yini lesikhatsateka ngako? Cha! Khumbula kutsi tikhonti taJehova letetsembekile tasesikhatsini lesendlulile betihle tikhatsateka, futsi Jehova wachubeka ajabula ngato. (1 Khos. 19:4) Jesu bekasidvudvuta. Bekangafuni sikhatsateke kakhulu ngekutfola tintfo lesitidzingako kangangekutsi kukhonta kwetfu Jehova kungasabi yintfo lebalulekile ekuphileni kwetfu. w21.01 3 ¶4-5

Indvodza itawulandzisa kuJehova nakuJesu ngendlela lewuphatsa ngayo umndeni wayo. (1 Phet. 3:7) Njengobe ayiNhloko yemndeni wasezulwini nasemhlabeni, Jehova uneligunya lekubeka imitsetfo mayelana nendlela bantfwabakhe lokufanele batiphatse ngayo, futsi uyaciniseka kutsi bayayilalela lemitsetfo. (Isa. 33:22) Njengobe ayinhloko yelibandla lebuKhristu, Jesu unelilungelo lekusibekela imitsetfo futsi aciniseke kutsi siyayilandzela. (Gal. 6:2; Khol. 1:18-20) Njengobe ilingisa sibonelo saJehova naJesu, inhloko yemndeni ineligunya lekwenta tincumo emndenini wayo. (Rom. 7:2; Ef. 6:4) Kodvwa kunetintfo lokungakafaneli itente. Nasi sibonelo, imitsetfo leyibekako kufanele isekelwe eVini laNkulunkulu. (Taga 3:5, 6) Inhloko yemndeni ite ligunya lekubekela labo labangasiyo incenye yemndeni wayo imitsetfo. (Rom. 14:4) Ngisho nobe bantfwana bayo sebakhulile futsi sebahambile ekhaya, bayachubeka bayihlonipha kodvwa abasekho ngephansi kwebunhloko bayo.​—Mat. 19:5. w21.02 2-3 ¶3-5

Lenye indlela inhloko yemndeni lekhombisa ngayo kutsi iyawutsandza umndeni wayo, kutsi iwunikete loko lokudzingako. Nobe kunjalo, kufanele ikhumbule kutsi lokubaluleke kakhulu kutsi isite umndeni wayo ube nebuhlobo lobuhle naJehova. (Mat. 5:3) Ngesikhatsi Jesu abatselwe elugodvweni, bekafuna kuciniseka kutsi Mariya uyanakekelwa. Ngisho nobe bekasebuhlungwini lobukhulu, Jesu wacela umphostoli Johane kutsi anakekele Mariya. (Joh. 19:26, 27) Umzalwane loyinhloko yemndeni kungenteka abe nemisebenti leminyenti lebalulekile. Kufanele awente ngekutimisela umsebenti wekutiphilisa kuze loko kutewuletsa ludvumo kuJehova. (Ef. 6:5, 6; Thit. 2:9, 10) Kungenteka abe naleminye imisebenti ebandleni, njengekunakekela nekukhutsata bazalwane ebandleni nekuhola emsebentini wekushumayela. Ngesikhatsi lesifanako, kubalulekile kutsi ahlale atadisha liBhayibheli nemfati wakhe kanye nebantfwana bakhe. Batakujabulela konkhe lakwentako kuze bahlale baphilile futsi bajabulile, batawujabula nangekutsi uyabasita kutsi bachubeke bakhonta Jehova.​—Ef. 5:28, 29; 6:4. w21.01 12 ¶15, 17

LiBhayibheli likhuluma ngetintfo letingentiwa ngumfati lonelikhono. Sibonelo kutsi uwenta kahle umsebenti wakhe wasekhaya, utsenga umhlaba aphindze awutsengise, ente nelibhizinisi kuze atfole imali. (Taga 31:15, 16, 18) Akasiso sigcili, sona lesite lilungelo lekusho umbono waso. Kunaloko, indvodza yakhe iyametsemba futsi iyayilalela imibono yakhe. (Taga 31:11, 26) Nangabe indvodza iphatsa umfati wayo ngenhlonipho, lomfati utakujabulela kuyilalela. Ngisho nobe Jesu afeza tintfo letinyenti, akacabangi kutsi kulalela Jehova kutamehlisela sitfunti. (1 Khor. 15:28; Fil. 2:5, 6) Ngendlela lefanako, umfati lohlakaniphile lolandzela sibonelo saJesu angeke ative ahlazeka nakalalela indvodza yakhe. Utayisekela indvodza yakhe, hhayi nje kuphela ngobe ayitsandza kodvwa ngobe atsandza Jehova futsi amhlonipha. Umfati longumKhristu angeke ayilalele indvodza yakhe nayimtjela kutsi angalaleli imitsetfo netimiso letiseBhayibhelini. w21.02 11 ¶14-15; 12 ¶19

Kutsandza Nkulunkulu bekuhlale kutisita tinceku takhe kutsi ticinisele natiphatfwa kabi. Nasi sibonelo, ngesikhatsi baphostoli bayalwa yinkantolo lephakeme yemaJuda lebeyinemandla kutsi bayekele kushumayela, kutsandza Nkulunkulu kwabenta kutsi ‘balalele Nkulunkulu njengobe angumbusi kunekutsi balalele bantfu.’ (Imis. 5:29; 1 Joh. 5:3) Kutsandza Nkulunkulu ngalendlela kusita nebazalwane betfu lamuhla kutsi bahlale betsembekile kuNkulunkulu ngisho nobe bohulumende labanelunya nalabanemandla babaphatsa kabi. Kunekutsi loko kusicedze emandla, sikutsatsa njengelilungelo kubeketelela kutondvwa ngulelive. (Imis. 5:41; Rom. 5:4, 5) Kungaba matima kakhulu kubeketelela kuphatfwa kabi nangabe siphikiswa ngumndeni wetfu. Nangabe emalunga emndeni wetfu abona kutsi sifuna kufundza ngaJehova, angahle acabange kutsi siyadukiswa. Lamanye emalunga emndeni wetfu angase acabange kutsi siphambene ingcondvo. (Catsanisa naMakho 3:21.) Kantsi lamanye emalunga emindeni yetfu angaze asihlukubete njengobe asiphikisa. Akukafaneli kusimangalise kuphatfwa ngalendlela. Jesu watsi: “Titsa temuntfu kuyawuba bantfu bemndeni.”​—Mat. 10:36. w21.03 21 ¶6-7

Nangabe uhamba nemmemeteli nakayochuba sifundvo seliBhayibheli, lalelisisa njengobe lona lofundzisako akhuluma nemfundzi. Nawenta njalo, utawukhona kusita ngesikhatsi lesifanele. Kodvwa kufanele ucabange ngaphambi kwekutsi ukhulume. Nasi sibonelo, akukafaneli ukhulume kakhulu, uphazamise lona lofundzisako nakasachazela umfundzi nobe ukhulume ngalenye indzaba leyehlukile kulena lenicoca ngayo. Kodvwa kufanele usebentise emagama lambalwa, umfanekiso nobe umbuto kuze usite ucacise liphuzu lokukhulunywa ngalo. Ngalesinye sikhatsi, ungatfola kutsi kute lokunganani longakusho ngaloku lokucocwa ngako, kodvwa nangabe umncoma umfundzi, ukhombisa nekutsi unendzaba naye loko kungamsita kutsi atfutfuke. Nangabe kungamsita umfundzi, mcocele indlela lowatfola ngayo liciniso, indlela lowancoba ngayo inkinga letsite nobe indlela lobone ngayo sandla saJehova ekuphileni kwakho. (Hla. 78:4, 7) Kungenteka kutsi nguloko umfundzi bekadzinga kukuva. Kungakucinisa kukholwa kwakhe nobe kumkhutsate kutsi achubeke atfutfuka aze abhajatiswe. w21.03 10 ¶9-10

Ngubani lokufanele simdvumise nangabe sitfola imiphumela lemihle emsebentini wekushumayela? Pawula wawuphendvula lombuto ngesikhatsi abhalela libandla laseKhorinte atsi: “Mine ngahlanyela, Apholosi wanisela, kodvwa Nkulunkulu wachubeka akhulisa, kuze loyo lohlanyelako naloyo loniselako bangabi lutfo, kodvwa kube nguNkulunkulu, lokunguye lokhulisako.” (1 Khor. 3:6, 7) Kufanele silingise Pawula ngekutsi ludvumo siluyise kuJehova nangabe sitfola imiphumela lemihle emsebentini wekushumayela. Singakhombisa njani kutsi siyabonga ngelilungelo lekusebenta naNkulunkulu, naKhristu kanye netingilosi? (2 Khor. 6:1) Loko singakwenta ngekutsi sitimisele kutjela bantfu tindzaba letimnandzi teMbuso. Akukafanele sihlanyele liciniso kuphela, kodvwa kufanele silinisele. Nangabe lotsite anesifiso sekufundza, sitawenta imetamo kuze sicoce naye. Njengobe lomuntfu atfutfuka, sitawujabula kubona indlela Jehova latamsita ngayo kuze ashintje indlela lacabanga ngayo nalativa ngayo. w20.05 30 ¶14, 16-18