Sondzela KuNkulunkulu
Usiphe Inkhululeko Yekutikhetsela
BATALI kufanele babe sibonelo lesihle kubantfwana babo. Kuba ngumtali losibonelo kungasita umntfwana kutsi abe netimfanelo letiligugu futsi akwati nekwenta tincumo letihlakaniphile ekuphileni kwakhe. Lokuvisa buhlungu kutsi batali labanyenti abasiso sibonelo lesihle kubantfwana babo. Loku kusho kutsi labantfwana angeke yini baphumelele ekuphileni? Imphendvulo siyitfola emavini laliciniso futsi lesingawetsemba. Nkulunkulu Jehova uphe umuntfu ngamunye sipho sekutikhetsela. Ase sicabangele loko lokwenteka kuHezekiya lokutfolakala ku-2 Emakhosi 18:1-7.
Hezekiya ‘abengumsa wa-Ahazi inkhosi yakaJuda.’ (Livesi 1) Ahazi wakhweshisa bantfu ekukhonteni Jehova ngendlela lehlobile. Lenkhosi lembi yachubeka ikhonta Bhali futsi yenta imihlatjelo yebantfu. Yaze yabulala nebanakaboHezekiya lokungenteka abe munye nobe ngetulu kwaloko. Ahazi wavala iminyango yelithempeli waphindze “wakha emalati kuwo onkhe emakona etitaladi eJerusalema.” ‘Watfukutselisa Jehova.’ (2 Tikhronike 28:3, 24, 25) Kuyacaca kutsi Hezekiya abenababe lomubi kakhulu. Loku kusho kutsi Hezekiya naye abengawenta yini emaphutsa lentiwa ngubabe wakhe?
Ngemuva kwekubekwa kwakhe njengenkhosi, ngekushesha Hezekiya watibonakalisa kutsi ngeke avumele sibonelo sababe wakhe lesibi sikhombise kutsi utawuba ngumuntfu lonjani. Hezekiya “wenta lokuhle emehlweni aSimakadze.” (Livesi 3) Abetsembele kuJehova futsi “kute nayinye inkhosi leyaba njengaye kuwo onkhe emakhosi akaJuda.” (Livesi 5) Emnyakeni wekucala wekubusa kwayo, lenkhosi lencane yacala kabusha kukhonta kweliciniso lokwaholela ekutseni kubhidlitwe tonkhe letindzawo lebekukhontelwa kuto titfombe. Iminyango yelithempeli yavulwa, nekukhonta lokuhlobile kwabuyiselwa. (Livesi 4; 2 Tikhronike 29:1-3, 27-31) Hezekiya “wabambelela kuSimakadze . . . , Simakadze waba naye.”—Emavesi 6, 7.
Yini leyasita Hezekiya wangalandzeli sibonelo lesibi sababe wakhe? Kungenteka yini kutsi kwaba ngumake wakhe Abiya—lesati lokumbalwa ngaye—lowaba sibonelo lesihle endvodzaneni yakhe? Sibonelo lesihle sa-Isaya lowacala kuphrofetha Hezekiya asengakatalwa, saba nayo yini incenye lenhle kulenkhosi lencane?a LiBhayibheli alisho. Nobe kunjalo, naku lesiciniseka ngako: Hezekiya wakhetsa kuphila imphilo leyehlukile kuleyo lebeyiphilwa ngubabe wakhe.
Sibonelo saHezekiya siyabakhutsata labo lababa nebumatima lobunyenti ngalesikhatsi basakhula ngesizatfu sekutsi batali babo abazange babe sibonelo lesihle. Loko lesekwentekile angeke sikushintje; angeke sikwati kususa bonkhe buhlungu lesabhekana nabo. Kodvwa loku akusho kutsi angeke siphumelele ekuphileni. Singatentela tincumo letingasiholela ekutseni sibe nelikusasa lelijabulisako. NjengaHezekiya, natsi singakhetsa kumtsandza Nkulunkulu weliciniso Jehova, siphindze simkhonte. Sincumo lesinjalo siphumela ekutfoleni imphilo leyenetisako kwanyalo futsi singasiholela ekuphileni lokuphakadze eveni laNkulunkulu lelisha. (2 Phetro 3:13; Sembulo 21:3, 4) Siyajabula ngaNkulunkulu lonelutsandvo lophe umuntfu nemuntfu sipho lesiligugu—inkhululeko yekutikhetsela!
[Umbhalo longentansi]
a Isaya wacala kuphrofetha cishe kusukela nga-778 B.C.E. kwaze kwaba ngu-732 B.C.E. Hezekiya wacala kubusa nga-745 B.C.E., aneminyaka lengu-25 budzala.