Nakanjani! Bubi Butawuphela

NKULUNKULU usinikete liVi lakhe leliphefumulelwe lelisisho ngalokutse ngco sizatfu sekutsi bantfu bente tintfo letimbi. Uphindze wasiniketa inkhululeko yekutikhetsela nelikhono lekutibamba, kute asente sikwati kubalekela kwenta tintfo letimbi. (Dutheronomi 30:15, 16, 19) Ngako-ke, kungaba kuhle kutsi sinakisise imikhuba lemibi lokungenteka sibe nayo futsi sitsatse tinyatselo tekuyilungisa. Ekugcineni, kubalekela kwetfu kwenta lokubi kutawuletsela tsine injabulo kanye nalabanye bantfu.—Tihlabelelo 1:1.

Nobe kunjalo, tsine nome singetama kanjani kubalekela kwenta lokubi, bantfu labasemhlabeni lesiphila kuwo bayachubeka benta tintfo letimbi. LiBhayibheli liyecwayiswa: “Khumbulani naku: Emalangeni ekugcina kuyawufika tikhatsi letimatima.” Kute licacise kutsi yini leyawubangela ‘letikhatsi tibe matima,’ liBhayibheli lichubeka litsi: “Bantfu bayawutitsandza, batsandze imali, batigcabhe, batigabatise, balulate Nkulunkulu ngenhlamba. Bayawuba ngulabangalaleli batali babo, bangabongi, babete bungcwele, babete lutsandvo, bangatsetselelani. Bayawuba tinyoka, bangatitsibi, babe nebulwane, batondze lokuhle, batsengise ngalabanye bantfu, babe nemawala, bakhukhumukiswe kutatisa, batsandze kutijabulisa kunekutsi babe ngulabatsandza Nkulunkulu. Bayawuba nesimo sekumesaba Nkulunkulu, kodvwa babe bawaphika emandla ako; labo-ke ubakhweshele.”—2 Thimothi 3:1-5.

Cishe uyibonile inkhulumo letsi “emalanga ekugcina” kulomBhalo losiphrofetho lolapha ngenhla. Kusho kutsini loku kuwe? Inkhulumo letsi “emalanga ekugcina,” bantfu labanyenti batsi isho kutsi intfo letsite seyitawuphela. Kungaba yini loko? Naka kutsi yini Nkulunkulu layetsembisako eVini lakhe.

Bantfu lababi batawubhujiswa ngalokuphelele.

“Emuva kwesikhashana benti balokubi bayawunyamalala, uyakutsi uyabafuna bangabe basatfolakala. Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.”—TIHLABELELO 37:10, 11.

“Simakadze [Jehova] uyabalondvolota bonkhe labamtsandzako, kepha lababi bonkhe uyawubabhubhisa.”—TIHLABELELO 145:20.

Angeke kusaba khona kucindzeteleka.

“Iyawumkhulula loyibitako, naloweswele, nalomphofu, nalote umsiti. Ikhulula kuphila kwalabo labasekubandzetelweni nasebudloveni.”—TIHLABELELO 72:12, 14.

“Nendalo ngalelinye lilanga iyawukhululwa kulobugcili bekubola, ibe nesabelo kulenkhululeko nebukhosi bebantfwana baNkulunkulu.”—ROMA 8:21.

Bantfu batawutfola konkhe labakudzingako ekuphileni.

“Bonkhe bantfu bayawuhlala ngekuthula ngulowo nalowo esivinini sakhe nasemikhiweni yakhe, kubete lobesabisako.”—MIKHA 4:4.

“Bantfu bayakwakha tindlu, bahlale kuto, bayawuhlanyela tivini, badle titselo tato. Bangeke baphindze bakhe tindlu, bese kuhlala labanye bantfu kuto, nome bahlanyele, bese kudla labanye. Ngobe njengemalanga esihlahla ayawuba njalo-ke nemalanga ebantfu bami. Labakhetsiwe bami bayawutijabulisa sikhatsi lesidze ngemisebenti yetandla tabo.”—ISAYA 65:21, 22.

Kulunga kuyawuhamba embili.

“Pho Nkulunkulu utakwehlulwa yini kubevela labahluphekile labakhetsiwe bakhe, labakhala kuye imini nebusuku . . . ? Nginitjela kutsi uyawubevela ngekushesha.”—LUKHA 18:7, 8.

“Ngobe Simakadze uyakutsandza kwenta tintfo ngendlela lefanele, angeke abayekele labangcwele bakhe. Labalungile bayawulondvoloteka phakadze naphakadze.”—TIHLABELELO 37:28.

Bugovu butawutsatselwa sikhundla kulunga.

“Tive temhlaba tifundza kulunga.”—ISAYA 26:9.

“Kepha ngesitsembiso sakhe silindzele emazulu lamasha, nemhlaba lomusha, lapho kubusela khona kulunga.”—2 PHETRO 3:13.

Ngisho Nanyalo—Bantfu Bayashintja

Letetsembiso tiyasijabulisa sonkhe. Kodvwa yini lesenta siciniseke kutsi titawugcwaliseka? Ecinisweni, kusembikwetfu loko lokusenta sitsi letetsembiso taNkulunkulu titawugcwaliseka. Yini lesibangela sitsi letetsembiso titawugcwaliseka? Kuliciniso kutsi lamuhla emhlabeni kunetigidzi tebantfu letijabulela imiphumela yekutsi tiyekele bugovu, kutiphatsa lokubi kanye nebudlova, tafuna kuba bantfu labetsembekile labanekuthula nemusa. Lamuhla boFakazi BaJehova labangetulu kwetigidzi letisikhombisa, basicumbi sebazalwane bemhlaba wonkhe labakhonile kulwisana nekwehlukana lokubangelwa libala lesikhumba, luhlanga, buve, tembusave kanye nesimo selive. Konkhe loku kuye kwabangela kutondzana lokunyenti, budlova kanye nekubulawa kwebantfu emlandvweni wekuphila.a Tonkhe letingucuko letentekako lapha emhlabeni lamuhla, tisenta sibe sebaleni sizatfu sekutsi setsembele etetsembisweni taNkulunkulu kutsi titawugcwaliseka ngelizinga leliphakeme.

Ngako-ke, yini lena letawubangela kutsi kube nalolushintjo? Imphendvulo yalombuto itfolakala esetsembisweni seliBhayibheli lesabhalwa ngumphrofethi Isaya. Wabhala watsi:

“Imphisi iyawuhlalisana nelizinyane lemvu, ingwe iyawulala ndzawonye nembuti; linkhonyane, nelibhubesi lelincane, nenkhomo lekhuluphele kuyawuhlala ndzawonye; konkhe kuyakweluswa ngumntfwana lomncane. . . . Nelibhubesi lidle tjani njengenkhabi. Luswane luyawudlala ngasemgodzini wemfeti, kutsi nemntfwana lomncane afake sandla sakhe emgodzini welibululu. Kungeke kulimate futsi kungeke kubulale nome ngangukuphi entsabeni yami lengcwele ngobe umhlaba uyawugcwala kwati Simakadze njengobe nemanti agcwalisa lwandle.”—Isaya 11:6-9.

Lesiphrofetho simane nje sikhuluma ngesikhatsi lapho tilwane tiyawuhlala ngekuthula nebantfu yini? Cha, kukhona lokunye lokungetulu kwaloku lesikhuluma ngako. Naka kutsi incenye yekugcina yalelivesi itsi yini leyobangela loloshintjo: “Umhlaba uyawugcwala kwati Simakadze.” Kwati Nkulunkulu kuyayishintja yini indlela tilwane letitiphatsa ngayo? Cha, akuyishintji. Kodvwa kwati Nkulunkulu, kungabashintja bantfu. Lesiphrofetho sikhuluma ngekutsi labo lokungenteka kutsi bake baba nemkhuba wekutiphatsa lofanana newetilwane, batawuyekela loyo mkhuba futsi bacale kukhombisa timfanelo tebuKhristu ngesizatfu sekutsi batawube sebafundza futsi basebentisa loko lokufundziswa liBhayibheli.

Ase ucabange nga-Pedro.b Abecabanga kutsi ulwela kulunga ngalesikhatsi ajoyina inhlangano yemaphekula. Ngemuva kwekuba sekaceceshiwe, watjelwa kutsi achumise tindzawo temaphoyisa tekuhlala. Asetama nje kwenta emalungiselelo ekwenta njalo, waboshwa. Pedro wabhadla ejele tinyanga letingu-18, lapho achubeka khona nebuphekula. Ngalesikhatsi Pedro asejele, umfati wakhe wacala kufundza liBhayibheli naboFakazi BaJehova. Pedro watsi nakakhululwa ejele, naye wacala kufundza liBhayibheli. Loko lakufundza ngaNkulunkulu Jehova kwamenta wenta lushintjo lolukhulu endleleni labenta ngayo tintfo ngisho nasemphilweni. Pedro utsi: “Ngiyambonga Jehova ngekutsi ngalesikhatsi ngiseliphekula, kute ngisho namunye umuntfu lengake ngambulala. Nyalo ngisebentisa inkemba yemoya waNkulunkulu, liBhayibheli kute ngendlulisele kubantfu umlayeto longuwo sibili wekuthula nekulunga—tindzaba letinhle teMbuso waNkulunkulu.” Waphindze wavakashela letindzawo temaphoyisa tekuhlala labefuna kutichumisa kute ayewutjela labo bantfu umlayeto wekuthula aphindze abatjele nangelive lelitawube selite budlova.

Emandla liVi laNkulunkulu lelinawo kubantfu, enta sibe nekukholwa esetsembisweni saNkulunkulu sekutsi bubi butawuphela nakanjani. Kuliciniso kutsi bantfu angeke bachubeke benta lokubi kuze kube phakadze, batawushintja. Ngekushesha Jehova utamsusa umphembi webubi, Sathane Develi. LiBhayibheli litsi: “Umhlaba wonkhe ungephansi kwemandla aLomubi.” (1 Johane 5:19) Kodvwa ngekushesha utawubhujiswa. Kutawuphindze kubhujiswe nalabo ngenkhani labangafuni kuyekela kwenta tintfo letimbi. Kutawujabulisa kakhulu kuphila ngaleso sikhatsi!

Yini lokufanele ngamunye wetfu ayente kuze atfole letibusiso? Khumbula kutsi ‘lwati ngaJehova’ ngilo lelenta kutsi bantfu lamuhla bashintje futsi ngilo lelitawuletsa lushintjo esikhatsini lesitako emhlabeni wonkhe. Ngekutsi utfole lwati lolwenabile lweBhayibheli futsi ulusebentise njengobe kwenta Pedro, nawe ungaba nelilukuluku lekuphila emhlabeni ‘lonekulunga.’ (2 Phetro 3:13) Ngako-ke, sikuncenga kutsi ungaphotisi maseko kodvwa usebentise lesikhatsi lesisele kute utfole lwati ngaNkulunkulu nangaJesu Khristu, ngobe loko kungakwenta utfole kuphila lokuphakadze.—Johane 17:3.

[Imibhalo lengentansi]

[Emavi lacashuniwe lasekhasini 9]

Nawe ungaba nelilukuluku lekuphila emhlabeni ‘lonekulunga.’—2 PHETRO 3:13