Iminyaka Lengu-50 Singemahlahlandlela Edvute Ne-Arctic Circle

SIKHULELE epulazini enyakatfo ye-Ostrobothnia, eFinland, futsi emndenini wetfu sibantfwana labalishumi. IMphi Yelive Yesibili yasitsintsa kakhulu njengobe sikhula. Ngisho nobe besihlala khashane nalapho kuliwa khona, imiphumela yayo yasicindzetela kakhulu. Ngesikhatsi emadolobha ladvute natsi i-Oulu neKalajoki bawabhomba, sabona umbala lobovu esibhakabhakeni ebusuku. Batali betfu batsi nababona kuchamuka tindiza temphi basitjela kutsi siyobhaca. Ngako ngesikhatsi umnaketfu lomdzala Tauno, asicocela ngemhlaba lolipharadisi lote kungalungi, kwasijabulisa kakhulu loko.

Ngesikhatsi Tauno aneminyaka lengu-14 budzala, wafundza emaciniso eliBhayibheli etincwadzini teBafundzi BeliBhayibheli. Nakucala iMphi Yelive Yesibili, wala kuya emphini ngesizatfu sanembeza wakhe loceceshwe liBhayibheli, wase ufakwa ejele. Lapho, waphatfwa kabuhlungu. Kodvwa loko kwasicinisa sincumo sakhe sekukhonta Jehova, futsi ngemuva kwekukhishwa kwakhe ejele wawushisekela kakhulu umsebenti wekushumayela. Sibonelo lesihle semnaketfu sasikhutsata kutsi siye emihlanganweni yaboFakazi lebeyibanjelwa endzaweni ledvute natsi. Besiphindze siye nasemihlanganweni yabo lemikhulu, ngisho nobe loko bekudzinga sente imetamo yekubeka imali yekuya khona. Epulazini lakitsi, besihlanyela anyanisi, sikhe emagungumence siphindze sitfungele bomakhelwane betfu timphahla. Njengobe besinemisebenti leminyenti, besingakhoni kuya emihlanganweni sonkhe, ngako bekudzingeka sishintjane.

Liciniso lesalifundza ngaJehova nangetinjongo takhe lakhulisa lutsandvo lwetfu ngaye, futsi sancuma nekunikela kuphila kwetfu kuye. Nga-1947, sobabili sakhombisa kutinikela kwetfu ngekutsi sibhajatiswe—Annikki abeneminyaka lengu-15, budzala, Aili yena abeneminyaka lengu-17, budzala. Dzadzewetfu lomdzala Saimi, wabhajatiswa ngawo lowo mnyaka. Besiphindze sifundze liBhayibheli nalomunye sisi wetfu lomdzala Linnea, labesashadile ngaleso sikhatsi. Yena nemndeni wakhe baba boFakazi BaJehova. Ngemuva kwekubhajatiswa kwetfu, satibekela umgomo wekuba ngemahlahlandlela, sihle siba ngemahlahlandlela esikhashana (nobe lasitako).

KUNGENELA UMSEBENTI WASIKHATSI SONKHE

Nga-1955, satfutsela edolobheni laseKemi, lelisenyakatfo. Ngisho nobe sobabili besisebenta, besisolo sifuna kuba ngemahlahlandlela kodvwa sesaba kutsi sitatinakekela ngani. Sabona kutsi kuncono sicale sitibekele imali. Ngulapho-ke sacoca khona nalodzadze lolihlahlandlela lesikhulume ngaye ekucaleni. Loko kwasisita sabona kutsi kukhonta Jehova sikhatsi sonkhe akuyi ngetintfo lesinato nobe kusekelwa ngimindeni yetfu. Intfo lebaluleke kakhulu kutsi setsembele kuBabe wetfu wasezulwini.

Ngaleso sikhatsi, besinemali leyenele kutsi singatinakekela tinyanga letimbili. Ngako ngaMay 1957, safaka sicelo sekuba ngemahlahlandlela ePello, lokulidolobha laseLapland ngenhla kwe-Arctic Circle. Ngemuva kwetinyanga letimbili, besisolo sinayo yonkhe lemali lebesitibekele yona, ngako safaka sicelo sekuphindze sibe ngemahlahlandlela letinye tinyanga letimbili. Ngemuva kwaleto tinyanga letimbili, besisolo sinayo lemali iphelele. Nyalo besesiciniseka kutsi Jehova angasinakekela. Njengobe sekuphele iminyaka lengu-50 singemahlahlandlela, solo sisenayo lemali lesatibekela yona. Nasibuka emuva, siva shengatsi Jehova abebambe tandla tetfu atsi: ‘Ningesabi, ngitanisita.’—Isa. 41:13.

Nga-1958, umbonisi wetfu wesifundza wasikhutsata kutsi sitfutsele eSodankylä, eLapland kute sibe ngemahlahlandlela lakhetsekile kuleyo ndzawo. Ngaleso sikhatsi, kuleyo ndzawo bekunamunye Fakazi, kungudzadze. Watfola emaciniso ngendlela lemangalisako. Indvodzana yakhe yahamba nalabanye bafundzi baya enhlokodolobha yaseFinland iHelsinki. Njengobe ahamba nalelicembu edolobheni, lomunye dzadze lokhulile wanika lomfana Sicongosekulindza, njengobe abehamba emuva, wase umcela kutsi afike ayinike unina wakhe. Lomfana wenta njalo, futsi ngekushesha lomake walibona liciniso.

Sacasha likamelo lelingenhla kwefemu yekusaha tihlahla. Nemihlangano besiyibambela lapho. Ekucaleni, bekuba ngitsi sobabili nalodzadze wakulendzawo nendvodzakati yakhe. Besifundza ndzawonye konkhe lobekufanele kwentiwe kulelo viki. Ngekuhamba kwesikhatsi, kwefika lenye indvodza lebeyifundza liBhayibheli naboFakazi kute itewusebenta kulefemu. Yona nemndeni wayo bacala kutihlanganisa nalelicembu letfu. Ngekuhamba kwesikhatsi, lendvodza nemfati wayo babhajatiswa. Lomzalwane besekunguye locondzisa imihlangano. Ngetulu kwaloko, lamanye emadvodza labesebenta kulefemu acala kuta esifundvweni futsi alemukela liciniso. Ngemuva kweminyaka, lelicembu letfu lakhula laze laba libandla.

TIMO LETIYINSAYEYA

Kuhamba libanga lelidze kute siyewushumayela kwaba yinsayeya. Ehlobo, besihamba ngetinyawo, sihle sigibela emabhayisikili ngisho nesikebhe kute sifune bantfu endzaweni yakitsi. Emabhayisikili etfu aba lusito lolukhulu. Besiphindze siwasebentise nasiya emihlanganweni lemikhulu nalapho sivakashela batali betfu, labebahlala khashane nalapho sitfutsele khona. Ebusika, besivuka ekuseni kute sigibele ibhasi leya kulenye indzawo lekuleso sifundza, nasifika kuleyo ndzawo sente umsebenti wemuti nemuti. Nasesiyihambe yonkhe leyo ndzawo, besiya kulenye. Bekunelichwa lelinyenti futsi nemigwaco ingabonakali kahle. Besivame kuhamba lapho kwendlule khona emahhashi ladvonsa tinkalishi. Ngaletinye tikhatsi lelichwa belivala indlela lapho kwendlule labanye bantfu khona. Ekucaleni kwentfwasahlobo lelichwa belicala kuncibilika kube manti futsi kungabi melula kuhamba kulo.

Kubandza nekuba khona kwelichwa kwasifundzisa kugcoka sifutfumale. Besigcoka emasokisi lentiwe ngeboya siphindze sigcoke nalamanye lamabili nobe lamatsatfu ngetulu kwawo, bese sifaka nemabhudze lamadze. Nobe kunjalo, lelichwa belingena kulamabhudze. Nasifika emtini lesitawungena kuwo, besiwakhumula bese sikhipha lelichwa lelingene kuwo. Nemphetfo wemajazi etfu asebusika bewuba manti njengobe sihamba kulelichwa. Nakuba makhata kakhulu, bewuvele ugongobaliswe ngemakhata ucine njengensimbi. Lomunye make lesefika kakhe, watsi: “Ninekukholwa sibili, ngobe nitinikele ngekutitsandzela kute nihambe kulesimo selitulu lesibi kangaka.” Kute sifike kulomuti wakhe besihambe emakhilomitha langetulu kwa-11.

Ngesizatfu sekutsi besihamba libanga lelidze, ngaletinye tikhatsi besilala emitini yebantfu labahlala kuleyo ndzawo. Nasekucala kuba mnyama, besicela indzawo yekuhlala. Imiti yabo beyingekho ezingeni lelisetulu, kodvwa bantfu labahlala kuyo bebanemusa futsi babatsandza bantfu ngobe bebangagcini ngekusinika indzawo yekulala kodvwa bebasipha nekudla. Ngaletinye tikhatsi, bebasinika sikhumba setinyamatane nobe selibhele kute silale kuso. Kantsi ngalamanye emalanga, besilala etindlini letinhle kakhulu. Sibonelo saloku kutsi lomunye make lonendlu lenkhulu wasingenisa endlini yetivakashi lesesitezi lenembhedze lomuhle futsi lolungiswe kahle. Etikhatsini letinyenti, besicoca ngeliBhayibheli nemnikati wemuti lize liyewushona. Kulomunye umuti sakhandza bantfu labashadene, futsi basivumela kutsi silale kulenye incenye yelikamelo nabo labebalala kulo. Sacoca nabo ngemiBhalo kwate kwaba sentsatsakusa. Lendvodza nemfati wayo bebashintjana kusibuta imibuto.

UMSEBENTI LOZUZISAKO

ILapland iyindzawo lenhle, futsi buhle bayo buyehluka kuye ngesikhatsi semnyaka. Nobe kunjalo, kitsi intfo lebeyiyinhle kakhulu, bekubantfu labebajabulela kwati Jehova. Emkhatsini webantfu lesabashumayela, bekunebantfu labasebenta kujuba tihlahla, labebete eLapland kute bahlale sikhashana. Ngaletinye tikhatsi, besitikhandza singene endlini legcwele emadvodza. Lamadvodza abewemukela kahle umlayeto weliBhayibheli futsi atsatse netincwadzi.

Kunyenti kakhulu lokuhlangenwe nako lesakujabulela. Ngalelinye lilanga, liwashi lasesiteshini semabhasi belisembili ngemizuzu lesihlanu, ngako ibhasi yasishiya. Sancuma kutsi sigibele ibhasi leya kulenye indzawo. Besingakaze sisebente kuleyo ndzawo. Emtini wekucala lesangena kuwo, satfola lomunye make losemusha lowatsi kitsi: “Naze nafika mantfombatana, bengisolo nginilindzile.” Besisolo sifundza liBhayibheli nadzadze wakhe. Lomake losemusha abecele dzadze wakhe kutsi asitjele simvakashele ngalo lelo langa. Kodvwa besingakawutfoli lomlayeto. Sacala kufundza naye netihlobo takhe letibomakhelwane. Ngekushesha ngemuva kwaloko, sabahlanganisa bonkhe sabenta sifundvo sinye futsi baba licembu lelikhulu. Kusukela lapho, labanyenti kulomndeni babe boFakazi BaJehova.

Nga-1965, satfunyelwa ebandleni laseKuusamo, lesikulo nyalo futsi lingentasi kwe-Arctic Circle. Ngaleso sikhatsi, lelibandla belinebamemeteli labambalwa. Ekucaleni, insimu yetfu beyibonakala ingatseli. Bantfu bebatsandza kakhulu inkholo futsi basiphikisa. Nobe kunjalo, labanye bebalihlonipha liBhayibheli, futsi loko kwasisita sakhona kucoca nabo. Kancane kancane, setama kubati labantfu, futsi cishe ngeminyaka lemibili besekumelula kucalisa tifundvo teliBhayibheli.

SISACHUBEKA NEMSEBENTI WEKUSHUMAYELA

Nyalo sesite emandla ekuhamba lilanga lonkhe sishumayela, kodvwa siyaya ensimini ngalamanye emalanga. Kushumayela tindzaba letimnandzi kulensimu yetfu lenkhulu kwaba melula ngesikhatsi umshana wetfu akhutsata Aili kutsi atfole tincwadzi tekushayela nga-1987 aneminyaka lengu-56 budzala. Sasitakala nangalesikhatsi kwakhiwa liHholwa leMbuso futsi satfutsela endlini leseceleni kwalo.

Intfutfuko lesiyibonile isijabulisa kakhulu. Ngesikhatsi sicala kuba ngemahlahlandlela enyakatfo yeFinland, bekunebamemeteli labambalwa labebasetindzaweni letehlukehlukene. Nyalo sekunemabandla lamanyenti lakha sifundza. Kuhlale kwenteka emihlanganweni lemincane nalemikhulu kutsi umuntfu afike atetfule kitsi asibute kutsi sisamkhumbula yini. Kulokunye, basitjela kutsi ngesikhatsi basebancane besichuba sifundvo seliBhayibheli emitini yakubo. Inhlanyelo lesayihlanyela eminyakeni leminyenti itsele titselo.—1 Khor. 3:6.

Nga-2008, sihlanganise iminyaka lengu-50 singemahlahlandlela lakhetsekile. Sibonga Jehova ngekutsi sikhonile kukhutsatana kute sibeketele kulomsebenti wakhe loligugu. Besiphila imphilo lemelula, kodvwa asizange seswele lutfo. (Hla. 23:1) Bekungakafaneli sesabe kuba ngemahlahlandlela kusukela ekucaleni. Siyajabula ngobe kuyo yonkhe leminyaka, Jehova usicinisile ngekuvumelana nesetsembiso sakhe lesiku-Isaya 41:10: “Ngitakucinisa ngikusite, ngiyakukubamba ngesandla sami sekudla lesilungile.”