Batali Yelusani Bantfwana Benu

1, 2. (a) Ngumiphi leminye yemitfwalo umelusi waka-Israyeli labenayo? (b) Batali bafana njani nebelusi?

BELUSI baka-Israyeli wasendvulo bebaphila imphilo lematima. Bebangagcini nje ngekubeketelela kushisa nemakhata, kodvwa bekudzingeka bavikele imihlambi yabo etilwaneni letiyingoti nakubantfu lebebangatibulala. Belusi bebatihlola njalo timvu tabo futsi banakekele nome ngutiphi letigulako nome letilimele. Bebawanaka kakhulu emazinyane ngobe abebutsakatsaka futsi ete emandla njengetimvu letindzala.​—Gen. 33:13.

² Ngandlela tsite batali labangemaKhristu bafana nebelusi futsi baveta buntfu lobubaluleke kakhulu belusi labanabo. Banemtfwalo wekukhulisa bantfwana “ngekubayala nangesicondziso saJehova.” (Ef. 6:4) Umelula yini lomtfwalo labanawo? Cha! Bantfwana babhekene nekuhlaselwa timfundziso letisakatwa nguSathane kanye netifiso tabo tesono. (2 Thim. 2:22; 1 Joh. 2:16) Nangabe unebantfwana, ungabasita njani? Ase sicabange ngetintfo letintsatfu longatenta kute weluse bantfwana bakho​—kubati, kubondla nekubacondzisa.

BATI BANTFWANA BAKHO

3. Kusho kutsini kutsi batali kufanele ‘basati simo’ sebantfwana babo?

³ Umelusi lokahle uyihlola ngekucophelela imvu ngayinye kute aciniseke kutsi iphilile. Ngemcondvo longumfanekiso, nawe ungenta lokufanako kubantfwana bakho. LiBhayibheli litsi: ‘Sati kahle simo semhlambi wakho.’ (Taga 27:23, NW.) Kuze wente njalo, kudzingeka ucabangisise ngetento tebantfwana bakho, ngemicabango yabo nangendlela labativa ngayo. Ungakwenta njani loko? Lenye indlela lehamba embili kutsi uhlale ukhulumisana nabo.

4, 5. (a) Ngutiphi tintfo letisebentako letingasita bantfwana bative bakhululekile kukhuluma nebatali babo? (Buka sitfombe lesisekucaleni kwalesihloko.) (b) Yini loyentile kute bantfwana bakho bakutfole kumelula kukhuluma nawe?

⁴ Labanye batali batfole kutsi kukhulumisana nebantfwana babo kuba matima kakhulu nangabe sebaseminyakeni yekutfomba, ngobe labantfwana bavame kutehlukanisa futsi bative bangakhululeki kuveta imiva nemicabango yabo. Nangabe kunjalo kubantfwana bakho, yini longayenta? Esikhundleni sekubaphocelela kutsi bakhulume nawe sikhatsi lesidze nangetindzaba letijulile, yetama kukhulumisana nabo ngetikhatsi lapho nisuke nikhululeke khona. (Dut. 6:6, 7) Kungase kudzingeke wente imetamo lemikhulu kuze nente tintfo ndzawonye. Mhlawumbe ungelula nabo tinyawo, uhambe nabo ngemoto, udlale nabo nobe nente umsebenti lotsite wasekhaya. Tikhatsi letinjalo tingenta kutsi bantfwana bakho bative bakhululekile futsi bakulungele kukhuluma.

⁵ Kutsiwani nangabe umntfwana wakho solo angakhululeki kukhuluma? Ungetama lenye indlela. Nasi sibonelo: Kunekutsi ubute indvodzakati yakho kutsi lihambe njani lilanga layo, ungayicocela ngekutsi lakho belinjani. Kungenteka nayo ichaze lokwentekile elangeni layo. Kuze utfole indlela umntfwana wakho layitsatsa ngayo indzaba letsite, mbute imibuto lengakacondzani naye. Ungambuta kutsi umngani wakhe utiva njani ngaleyo ndzaba. Ngemuva kwaloko ungambuta kutsi ngusiphi seluleko labekangasinika lomngani wakhe.

6. Kusho kutsini kuhlale ukulungele kukhuluma kanye nekungeneka?

⁶ Kuliciniso kutsi kuze bantfwana bakho bakhululeke kukhuluma nawe, kufanele babone kutsi uhlale ukulungele kukhuluma futsi uyangeneka. Nangabe batali bahlale babonakala bamatasatasa, bantfwana babo labaseminyakeni yekutfomba kungenteka bangabatjeli tinkinga tabo. Ungakhombisa njani kutsi uyangeneka? Kudzingeka wente lokungetulu kwekumane nje utsi: “Ungakhuluma nami nome kunini.” Bantfwana bakho kufanele babone kutsi ngeke utibukele phansi tinkinga labanato nobe ubatfukutselele. Batali labanyenti babeka sibonelo lesihle kulendzaba. Kayla loneminyaka lelishumi nemfica budzala, utsi: “Ngingakhuluma nababe wami nganome yini. Akangiphatamisi nangikhuluma futsi akangehluleli, umane nje angilalele. Ngemuva kwaloko unginika seluleko lesihle ngaso sonkhe sikhatsi.”

7. (a) Ngumuphi umbono lokahle umtali langawuveta endzabeni yekutsandzana? (b) Kungenteka njani kutsi batali batitfole sebacansula bantfwana babo bangakahlosi?

⁷ Ngisho nalapho ukhuluma ngetindzaba letimatima​—njengendzaba yekutsandzana—​caphela kutsi ungahlali ubanika teluleko uze ukhohlwe kubafundzisa indlela lekahle yekubhekana naleso simo. Ase sifanekise: Ase sitsi uya endzaweni yekudlela futsi nawufika kuyo utfole kutsi luhla lwalokudliwako ngalelo langa lugcwele tecwayiso letimayelana nekudla lokunashevu. Akungabateki kutsi ungayishiya leyo ndzawo uhambe uyewufuna lenye. Nebantfwana bakho bangenta lokufanako nangabe batawutsi nabeta kuwe batewucela seluleko bese ubanika luhla lwetecwayiso. (Fundza Kholose 3:21.) Esikhundleni saloko yetama kulinganisela. Lomunye dzadze losemusha lokutsiwa ngu-Emily watsi: “Nangabe batali bami bakhuluma nami ngekutsandzana, abakwenti kubonakale kuyintfo lembi. Bavame kugcizelela injabulo leba khona ngekwati umuntfu lotsite nekutfola longashada naye. Loko kungenta ngitive ngikhululekile kukhuluma nabo ngalendzaba. Ecinisweni ngifuna kutsi bati nganobe ngubani lengitsandzana naye kunekutsi ngibafihlele.”

8, 9. (a) Ngutiphi tinzuzo letitfolakala ngekulalela bantfwana bakho ngaphandle kwekubaphatamisa? (b) Ngumiphi imiphumela lemihle loyitfole ngekulalela bantfwana bakho?

⁸ Ngekuvumelana naloko lokwashiwo nguKayla, ungakhombisa kutsi uyangeneka ngekutsi ubalalele ngesineke bantfwana bakho. (Fundza Jakobe 1:19.) Lomunye make lokutsiwa nguKatia lokhulisa umntfwana wakhe ayedvwa uyavuma: “Esikhatsini lesendlulile, bengiyicansukela kakhulu indvodzakati yami. Bengingayiniki ngisho nelitfuba lekutsi icedze loko lebeyisuke ikusho. Ngaletinye tikhatsi bengidzinwe kakhulu kutsi ngingayilalela nobe ngingafuni nje kuphatanyiswa. Njengobe nyalo sengikushintjile kuphila kwami, nendvodzakati yami seyishintjile. Seyibambisana nami kancono kunakucala.”

⁹ Lomunye babe lokutsiwa nguRonald wahlangabetana nesimo lesifanako endvodzakatini yakhe leseminyakeni yekutfomba. Utsi: “Ngesikhatsi ingitjela kutsi itsandzana nalomunye umfana esikolweni, ngacale ngatfukutsela kakhulu. Kodvwa nangicabanga ngendlela Jehova labeketela ngayo futsi aticabangele ngayo tinceku takhe, ngabona kuncono kutsi nginike indvodzakati yami litfuba lekuchaza indlela letiva ngayo ngaphambi kwekutsi ngiyeluleke. Ngiyajabula ngekutsi ngakwenta loko! Kwaba kwekucala kutsi ngicondze imiva yayo. Yatsi nayicedza, ngakutfola kumelula kukhuluma nayo ngelutsandvo. Kwangimangalisa kutsi yasemukela kahle seluleko sami. Yangitjela kutsi itimisele kushintja kutiphatsa kwayo.” Kuhlale ukhulumisana nebantfwana bakho kungakusita kutsi uyicondze kahle imicabango nemiva yabo. Loko kutawenta kutsi ukhone kuba lusito lolukhulu kubo nabenta tincumo ekuphileni kwabo.a

YONDLA BANTFWANA BAKHO

10, 11. Ungabasita njani bantfwana bakho kutsi bangaphambuki endleleni?

¹⁰ Umelusi lokahle uyati kutsi lenye imvu yakhe ingalahlekelana nemhlambi. Kungenteka imvu ikhangwe tjani lebubona edvute bese iphindze ibona lobunye khashanyana, ekugcineni iduke emhlanjini. Ngendlela lefanako, umntfwana angaphambuka kancane kancane ahambe ngendlela leyingoti, futsi alingwe bangani lababi nobe kutijabulisa lokungakalungi. (Taga 13:20) Yini longayenta kute usivimbele simo lesinjengaleso?

¹¹ Nawufundzisa bantfwana bakho, tsatsa sinyatselo ngekushesha nangabe ubona kutsi kunetintfo lababutsakatsaka kuto. Yetama kucinisa buntfu babo bebuKhristu lokungenteka kutsi badzinga kusitwa kubo. (2 Phet. 1:5-8) Kukhonta kwemndeni lokuchutjwa njalo kusikhatsi lesikahle kakhulu sekwenta loko. Nawuchaza lelilungiselelo, uMsebenti WeMbuso wa-October 2008 watsi: “Tinhloko temndeni tikhutsatwa kutsi tiyitfwale imitfwalo letiyinikwe nguJehova kuze ticiniseke kutsi kuneluhlelo lwemndeni loluzuzisako lwekutadisha liBhayibheli njalo.” Ulisebentisa kahle yini lelilungiselelo lelutsandvo kuze weluse bantfwana bakho? Ciniseka kutsi bayayijabulela imetamo yakho yekubeka tintfo letiphatselene naNkulunkulu kucala ekuphileni kwakho.​—Mat. 5:3; Fil. 1:10.

12. (a) Bantfu labasha bazuze njani ekukhonteni kwemndeni lokuchutjwa njalo? (Hlanganisa nelibhokisi lelitsi “Bayakujabulela.”) (b) Wena uzuze njani ekukhonteni kwemndeni?

¹² Cabanga ngaloko Carissa loseminyakeni yekutfomba lakusho ngendlela Kukhonta Kwemndeni lokuwuzuzise ngayo umndeni wakubo. Utsi: “Kuyangijabulisa kutsi sonkhe siba ndzawonye futsi sicocisane. Nasenta njalo sisuke sicinisa buhlobo betfu futsi siba netintfo letinyenti lesitawuhlale sitikhumbula. Babe wami akapholoti eluhlelweni lwetfu lweKukhonta Kwemndeni. Kuyangikhutsata kubona kutsi ukutsatsa njengalokubalulekile, futsi loko kwenta kutsi nami ngikutsatse njengalokubalulekile. Kuphindze kungente ngibe netizatfu letinyenti tekumhlonipha njengobe angubabe wami nenhloko yemndeni.” Dzadze losemusha lokutsiwa nguBrittney watsi: “Kukhonta Kwemndeni kungente ngasondzelana nebatali bami. Kungenta ngibone kutsi bayafuna kuva ngetinkinga lenginato futsi bangikhatsalela mbamba. Kusisita kutsi sibe ngumndeni lobambene nalonebunye.” Kuyacaca-ke kutsi kufundzisa bantfwana bakho ngaNkulunkulu, ikakhulukati ngeluhlelo lwekukhonta kwemndeni, kuyindlela lebalulekile yekuba ngumelusi lokahle.b

CONDZISA BANTFWANA BAKHO

13. Umntfwana angakhutsateka njani kutsi akhonte Jehova?

¹³ Umelusi lokahle usebentisa indvuku kute acondzise futsi avikele umhlambi wakhe. Lomunye wemigomo yakhe leyinhloko kutsi acondzise timvu “edlelweni lelihle.” (Hez. 34:13, 14) Njengobe ungumtali, ute yini umgomo lofanako? Ufuna kucondzisa bantfwana bakho kute bakhonte Jehova. Ufuna kutsi bantfwana bakho bative ngendlela umhlabeli lativa ngayo nakabhala atsi: “Nkulunkulu wami, kujabula kwami kusekwenteni intsandvo yakho, imiyalo yakho isenhlitiyweni yami.” (Hla. 40:8) Bantfu labasha labativa ngendlela lefanako batawufuna kunikela kuphila kwabo kuJehova futsi babhajatiswe. Kufanele batsatse lesinyatselo nasebavutfwe ngalokwenele kute bente lesincumo futsi babe nesifiso lesicotfo sekukhonta Jehova.

14, 15. (a) Kufanele ube yini umgomo webatali labangemaKhristu? (b) Yini lengabangela umntfwana loseminyakeni yekutfomba kutsi akungabate kukholwa kweliciniso?

¹⁴ Kutsiwani-ke nangabe bantfwana bakho bangatfutfuki ebuhlotjeni babo naNkulunkulu, mhlawumbe baze bangabate kukholwa kwabo? Lwela kunamatselisa kubo lutsandvo ngaJehova Nkulunkulu nekutsi bajabulele loko lakwentile. (Semb. 4:11) Nasebakwati kwenta loko, batawukhona kutentela sincumo sekukhonta Nkulunkulu.

¹⁵ Yini longayenta nangabe bantfwana bakho bakhombisa kungabata? Ungabelusa njani futsi ubasite babone kutsi kukhonta Jehova kunguyona ndlela lencono kakhulu yekuphila futsi kutawubenta batfole injabulo lehlala njalo? Yetama kutfola loko lokubabangela kutsi bangabate. Nasi sibonelo: Indvodzana yakho ayivumelani yini netimfundziso teliBhayibheli nobe imane nje yeswele sibindzi sekumelela letimfundziso kubontsanga yayo? Indvodzakati yakho ikungabata mbamba yini kuhlakanipha kwetimiso taNkulunkulu nobe imane nje itiva inesitunge futsi inganakwa?

16, 17. Ngutiphi tindlela batali labangasita ngato bantfwana babo kute bente liciniso libe labo?

¹⁶ Ngisho nome kungusiphi sizatfu lesenta umntfwana wakho angabate, ungamsita kutsi akuncobe kungabata. Njani? Lenye yetindlela letiphumelelako batali labanyenti labayisebentisako kute batfole loko bantfwana babo labakucabangako, kutsi babute imibuto lenjengekutsi: “Utiva njani ngekuba ngumKhristu? Ngekubuka kwakho, ngutiphi tinzuzo lotitfolako? Yini lokudzingeka uyidzele? Tinzuzo lotitfolako nyalo naleto lotatitfola esikhatsini lesitako tinyenti yini kunaloko lokudzelako? Njani?” Ecinisweni kufanele uyibute kahle lemibuto, ube nemusa nelutsandvo, kungabi shengatsi nisenkantolo. Njengobe nisacoca, ungakhuluma nangembhalo waMakho 10:29, 30. Labanye bantfu labasebasha bangatsandza kubhala loko labakucabangako basebentisa tinhlu letimbili—lunye lube lwaloko labatakudzela lolunye lube lwaloko labatakuzuza. Kubona loluhla labalubhalile kungakwenta uyibone inkinga futsi ubasite kute batfole sisombululo. Nangabe kufanele sifundze incwadzi letsi Lokufundziswa LiBhayibheli naletsi “Elutsandvweni LwaNkulunkulu” nebantfu labatsandza kufundza liBhayibheli, kufanele sitifundze kakhulu kangakanani-ke nebantfwana betfu? Uyakwenta yini loko?

¹⁷ Njengobe sikhatsi sichubeka, bantfwana bakho kutawudzingeka batentele sincumo sekutsi ngubani labatamkhonta. Ungacabangi kutsi kutawuvele nje kutentakalele kutsi bakhetse inkholo yakho. Kufanele bente liciniso libe labo. (Taga 3:1, 2) Nangabe ubona kutsi umntfwana wakho unenkinga yekwenta loko, kungani ningacaleli phansi nibuke timfundziso letisisekelo? Msite kutsi acabangisise ngalemibuto letsi: “Ngati njani kutsi Nkulunkulu ukhona? Yini lengenta ngiciniseke kutsi Jehova Nkulunkulu ungikhatsalela mbamba? Kungani ngikholwa kutsi timiso taJehova tentelwe kuzuzisa mine?” Bani ngumelusi lomuhle ngekusita bantfwana bakho ngesineke kuze babone kutsi kukhonta Jehova kuyindlela lencono kakhulu yekuphila.c​—Rom. 12:2.

18. Batali bangamlingisa njani Jehova, longuMelusi Lomkhulu?

¹⁸ Onkhe emaKhristu eliciniso afuna kuba balingisi beMelusi Lomkhulu. (Ef. 5:1; 1 Phet. 2:25) Batali kufanele basati simo semhlambi wabo, lokubantfwana babo labaligugu, futsi kufanele bente konkhe labangakwenta kute babacondzise etibusisweni labatibekelwe nguJehova. Ngako-ke, yelusani bantfwabenu ngekuchubeka nibakhulisa ngendlela yeliciniso.