Mbambambamba Bekabukeka Njani Jesu?

Kute lonesitfombe saJesu. Akazange sekatsatse titfombe nobe kube khona lobata titfombe takhe ngesikhatsi alapha emhlabeni. Nobe kunjalo, kuwo onkhe lamakhulu eminyaka, abesolo avela etincwadzini tebadvwebi labanyenti.

Liciniso likutsi, labo badvwebi bebangati kutsi bekabukeka njani. Emasiko endzawo, tinkholo, kanye netifiso talabo labadvwetjelwako ngito lebetincuma kutsi labadvwebi bamdvweba njani. Nobe kunjalo, letitfombe tabo nobe loko labakubatile kuye kwaphatamisa imibono lekahle ngaJesu kanye naloko bekakufundzisa.

Labanye badvwebi betitfombe badvweba Jesu anetinwele letindze letiphaphatsekile kanye nentjwebe lendze nobe abukeka adzabukile. Kuletinye titfombe, Jesu uvetwa angunkulunkulu lotungeletwe kukhanya nobe anganabo bungani nalabo lasuke anabo. Letitfombe timchaza kahle yini Jesu? Singayitfolaphi imphendvulo yalombuto? Lenye indlela kungaba kufundza loko lokushiwo liBhayibheli kute sitfole kutsi bekabukeka njani. Lingasisita sibe nembono lokahle ngaJesu.

“WANGILUNGISELELA UMTIMBA”

Lawa ngemavi Jesu lokungenteka wawasho emthantazweni wakhe ngesikhatsi abhajatiswa. (Hebheru 10:5; Matewu 3:13-17) Bewubukeka njani lowo mtimba? Eminyakeni lengaba ngu-30 ngaphambi kwaloko, ingilosi Gabhriyeli yatsi kuMariya: “Utawutetfwala, ubeleke indvodzana . . . iNdvodzana yaNkulunkulu.” (Lukha 1:31, 35) Ngako, Jesu bekete sono, njengobe na-Adamu bekete sono nakadalwa. (Lukha 3:38; 1 Khorinte 15:45) Kufanele kutsi Jesu bekayindvodza lebukeka kahle futsi lekungenteka beyifute emaJuda, njengobe unina Mariya abengumJuda.

Jesu bekanesilevu, njengobe bekulisiko lawo onkhe emaJuda lokuyintfo beyihlukile kumaRoma. Letilevu betiluphawu lwekutfobeka kanye nekuhlonipheka; betingabi tindze futsi betihhulwa kahle, tibukeka. Asingabati kutsi Jesu bekasihhula kahle silevu sakhe futsi netinwele takhe bekatijuba kahle, aphindze atikame kahle. NgemaNaziri kuphela, njengaSamsoni, lebekangatihhuli tinwele tawo.​—Numeri 6:5; Tikhulu 13:5.

Angakabi neminyaka lengu-30 budzala, Jesu bekenta umsebenti wekubata futsi bekete lamathulusi lasetjentiswako esikhatsini setfu. (Makho 6:3) Ngako, kufanele kube Jesu bekanemandla. Ngesikhatsi Jesu acalisa umsebenti wekushumayela “wacosha timvu netinkhomo ethempelini, kanye nalabo lebebatitsengisa. Waphindze wacitsa imali yebashintji betimali, waketula nematafula abo.” (Johane 2:14-17) Loku wakwenta angalekelelwa ngumuntfu futsi bekudzinga kutsi abe nemandla kute akwente. Jesu wasebentisa umtimba lebekawulungiselwe nguNkulunkulu kute afeze umsebenti lebekatfunyelwe wona wekutsi: ‘Nakulamanye emadolobha bekufanele ashumayele tindzaba letimnandzi teMbuso waNkulunkulu, ngobe nguloko lebekatfunyelwe kona.’ (Lukha 4:43) Bekudzinga emandla lamakhulu kuhamba kuyo yonkhe indzawo yase-Palestine ngetinyawo kute ashumayele letindzaba letimnandzi.

“WOTANI KIMI, . . . NGITANIPHUMUTA”

Buso baJesu lobumamatsekako nekungeneka kwakhe ngiko lokwenta bantfu ‘labakhatsele nalabasidvwako’ beta kuye. (Matewu 11:28-30) Lutsandvo kanye nemusa wakhe kwagcizelela kutsi bekatasifeza setsembiso sakhe sekucabula labo lebebalangatelela kufundza kuye. Ngisho nalabancane bebakutsandza kuba naJesu njengoba liBhayibheli litsi: ‘bekabagona bantfwana.’​—Makho 10:13-16.

Nanobe Jesu aphatfwa kabi ngaphambi kwekutsi abulawe, kodvwa bekangasuye umuntfu lohlala advumele. Sibonelo saloku, kutsi Jesu washintja emanti aba liwayini lelimnandzi emshadvweni waseKhana kute ajabulise bantfu. (Johane 2:1-11) Kuleminye imicimbi wafundzisa bantfu tifundvo lebebangeke batikhohlwe.​—Matewu 9:9-13; Johane 12:1-8.

Ngetulu kwako konkhe, inshumayelo yaJesu yenta tilaleli takhe takulangatelela ngekujabula lokukhulu kuphila lokuphakadze. (Johane 11:25, 26; 17:3) Ngalesikhatsi bafundzi bakhe labangu-70 bamcocela ngaloko lebebakutfolile ngalesikhatsi bashumayela, “wagcwala injabulo” futsi watsi: “Jabulani ngenca yekutsi emabito enu abhaliwe ezulwini.”​—Lukha 10:20, 21.

“NINE AKUKAFANELI NIBE NJALO”

Baholi benkholo bangesikhatsi saJesu benta tindlela tekutsi kudvunyiswe bona futsi bagcamise tikhundla tabo. (Numeri 15:38-40; Matewu 23:5-7) Ngalokwehlukile kubo, Jesu wayala bafundzi bakhe kutsi ‘bangatiphakamisi etikwalabanye.’ (Lukha 22:25, 26) Ecinisweni, Jesu wabecwayisa watsi: “Caphelani tati temtsetfo letitsandza kuhamba tembetse tingubo letindze, letifuna kubingelelwa etimakethe.”​—Makho 12:38.

Ngalokwehlukile kuloku, Jesu bekatihlanganisa nebantfu futsi bekangagcami emicimbini. (Johane 7:10, 11) Ngisho nobe anebaphostoli bakhe labetsembekile lebebangu-11 bekungabonakali kutsi yena ngumuphi. Kute Judasi alayele lesicumbi lebesitfukutsele kutsi ngumuphi Jesu, wamcabuza, njengobe ‘abevumelene naso.’​—Makho 14:44, 45.

Nanobe kungatiwa kutsi bekabukeka njani Jesu, kepha kuyacaca kutsi bekangasiko loko badvwebi labatsi abebukeka angiko. Lokubaluleke kakhulu akusiko kutsi bekabukeka kanjani mbambambamba, kepha nguloko lesikwatiko ngaye lamuhla.

“SEKUSELE SIKHASHANA KUTSI LIVE LINGABE LISANGIBONA”

Ngalelo langa lakhuluma ngalo lamavi, Jesu wabulawa futsi wangcwatjwa. (Johane 14:19) Wanikela ngekuphila kwakhe ‘njengenhlawulo yalabanyenti.’ (Matewu 20:28) Ngelilanga lesitsatfu Nkulunkulu “wamvusa angumoya” futsi “wamenta wabonakala” kulabanye bafundzi. (1 Phetro 3:18; Imisebenti 10:40) Bekabukeka njani Jesu nakativeta kubafundzi bakhe ngaleso sikhatsi? Kubonakala shengatsi besekehlukile endleleni lebekabukeka ngayo ngaphambili, ngobe ngisho nebafundzi bakhe lebebasondzelene naye bephuta kubona kutsi nguye. Mariya waseMagdala wacabanga kutsi ngugadzi futsi nebafundzi bakhe lababili lebebasendleleni leya-Emawusi bacabanga kutsi sihambi.​—Lukha 24:13-18; Johane 20:1, 14, 15.

Ngusiphi sitfombe lokufanele sibe naso etingcondvweni tetfu ngaJesu lamuhla? Ngemuva kweminyaka lengetulu kwa-60 Jesu afa, umphostoli Johane wabona imibono ngaJesu. Johane akazange abone umuntfu lofako elugodvweni. Kunaloko wabona “iNkhosi yemakhosi neMbusi webabusi.” LeNkhosi yeMbuso waNkulunkulu, madvutane itawuncoba titsa taNkulunkulu, letifaka ekhatsi emadimoni kanye nebantfu, iphindze iletsele sintfu tibusiso taphakadze.​—Sembulo 19:16; 21:3, 4.