Hlala Ukulungele Kucala Sifundvo SeliBhayibheli
1. Kuhlanganisani kwenta umsebenti Jesu lasitfuma kutsi siwente kuMatewu 28:19, 20?
1 Jesu wasitfuma kutsi sente ‘bafundzi . . . , futsi sibafundzise.’ (Mat. 28:19, 20) Ngako-ke, sifuna kuhlale sikulungele kucala tifundvo teliBhayibheli, hhayi nje kuphela ngelilanga lelisuke libekelwe kuyawuticela. Lamaphuzu lalandzelako angaba lusito.
2. Bobani lesingacela kubachubela sifundvo seliBhayibheli?
2 Sicele: Nasichubeka sicela tifundvo teliBhayibheli, sitawuba nematfuba lamanyenti ekutitfola. (Shu. 11:6) Sewuyetamile yini indlela lecondzile yekwenta njalo? Emalunga alelinye libandla lase-United States etama kamatima kwenta loku inyanga yonkhe. Ajabula kakhulu lapho acalisa tifundvo teliBhayibheli letinsha letingu-42. Akukafaneli ucabange kutsi bantfu labanenshisekelo lokhuluma nabo bayati kutsi ufisa kufundza nabo liBhayibheli. Nawuphindze ubuyela, kungani ungaceli kufundza nabo? Kute inkinga nangabe bangavumi. Ungachubeka utfutfukisa inshisekelo yabo. Sewubabutile yini bomakhelwane bakho, tihlobo, losebenta nabo, kanye nalofundza nabo kutsi bangatsandza yini kufundza nawe liBhayibheli? Ungabuta netifundvo takho teliBhayibheli kutsi bakhona yini bangani nobe tihlobo tabo letingatsandza kuchutjelwa sifundvo seliBhayibheli.
3. Yini lengasisita ekucaliseni tifundvo teliBhayibheli, futsi singayisebentisa nini?
3 Lokungakusita: Lipheshana lelitsi Ungatsandza Yini Kwati Liciniso? lilusito kakhulu ekucaliseni tifundvo teliBhayibheli. Ungaliniketa banikati bemakhaya ngisho nobe batemukela nobe bangatemukeli letinye tincwadzi. Singalisebentisa nasisebenta insimi yemabhizinisi, yasemgwacweni, nasishumayela ngekubhala tincwadzi, kanye nalapho sibuyela kulabo lesicoce nabo. Lingashiywa nasemakhaya lapho kungenamuntfu khona. Kungani ungaliphatsi nawugibele tincola tekutfutsa sive, nawuyotsenga, nalapho usemsebentini? Likhasi lelingemuva lichaza kafishane luhlelo lwetfu lwesifundvo seliBhayibheli bese likhulumela incwadzi letsi Lokufundziswa LiBhayibheli.
4. Singalisebentisa njani lipheshana lelitsi Kwati Liciniso kute sicalise sifundvo?
4 Ngemuva kwekuniketa umuntfu lelipheshana, ungamkhombisa imibuto lesekhasini lekucala bese uyambuta, “Ngumuphi umbuto longatsandza kutfola imphendvulo yawo kucala?” Cocani ngemphendvulo lekulelipheshana, bese ufundza nobe ukhulumela likhasi lelingemuva lelichaza luhlelo lwekuchuba sifundvo seliBhayibheli. Ungamkhombisa kutsi kwatiswa lokwengetiwe kutfolakala kuphi encwadzini letsi Lokufundziswa LiBhayibheli. Mnikete lencwadzi, bese uhlela kubuyela kute nichubeke.
5. Kungani kufanele sihlale sikulungele kucala tifundvo teliBhayibheli?
5 Ensimini yetfu basekhona labalangatelela kufundza loko liBhayibheli lelikufundzisako mbambambamba. Ngekuhlale sikulungele kucala tifundvo teliBhayibheli, sitawuba nematfuba lengetiwe ekutibonela injabulo yekusita labanye kutsi bete endleleni leya ekuphileni.—Mat. 7:13, 14.