Ciniseka Kutsi Ulitfolile Liciniso

1. Kungani bantfu labanyenti badidekile?

TINYENTI tinkholo lamuhla letitsi tebuKhristu futsi letitsi tikhonta Nkulunkulu ngendlela layemukelako. Kungako bantfu labanyenti badidekile! Bayatibuta: “Kunenkholo yinye yini yeliciniso, nobe tonkhe tinkholo tiyamjabulisa Nkulunkulu?” Siciniseka mbamba yini kutsi sifundzisa liciniso nekutsi indlela BoFakazi BaJehova labakhonta ngayo Jehova lamuhla ngiyo kuphela lemjabulisako? Kungenteka yini kutsi siciniseke ngaloko? Ase sicoce nganabu bufakazi.

2. Ngekusho kwembhalo wa-1 KubaseThesalonika 1:5, yini leyenta umphostoli Pawula waciniseka kutsi ulitfolile liciniso?

² Umphostoli Pawula bekaciniseka mbamba kutsi ulitfolile liciniso. (Fundza 1 KubaseThesalonika 1:5.) Akazange akukholelwe loko ngenca nje yekutsi bekumenta ative ajabulile. Pawula bekangumfundzi lokhutsele weliVi laNkulunkulu. Bekakholelwa kutsi “yonkhe imiBhalo iphefumulelwe nguNkulunkulu.” (2 Thim. 3:16) Yini layifundza? Pawula watfola bufakazi lobucinile emiBhalweni bekutsi Jesu bekanguMesiya lowetsenjisiwe, lokubufakazi baholi benkholo yemaJuda labakhetsa kungabunaki. Bebatsi bafundzisa bantfu liciniso ngaNkulunkulu kepha bebenta tintfo latenyanyako. (Thit. 1:16) Ngalokwehlukile kubo, Pawula akazange akhetse kutsi ngutiphi tincenye teliVi laNkulunkulu bekatawutikholelwa. Bekatimisele ngekufundzisa nangekusebentisa “konkhe lokuyintsandvo yaNkulunkulu.”—Imis. 20:27.

3. Kuze siciniseke kutsi silitfolile liciniso, kudzingeka sibe nato tonkhe yini timphendvulo temibuto lesinayo? (Buka nelibhokisi lelitsi “Imisebenti YaJehova Nemicabango Yakhe ‘Kunyenti Kakhulu Kutsi Ungakubala.’”)

³ Labanye bacabanga kutsi inkholo yeliciniso kufanele ikhone kuphendvula yonkhe imibuto, ngisho naleyo lengaphendvulwa eBhayibhelini. Kunengcondvo yini loko? Cabanga ngesibonelo saPawula. Wakhutsata emaKhristu labekanye nawo kutsi ‘aciniseke ngato tonkhe tintfo,’ kodvwa wavuma kutsi tinyenti tintfo naye lebekangaticondzi. (1 Thes. 5:21) Wabhala watsi: “Sati incenye,” futsi wengeta watsi: “Sibona kalufifi ngesibuko sensimbi.” (1 Khor. 13:9, 12) Pawula bekangaticondzi tonkhe tintfo; futsi nakitsi kunjalo. Kodvwa bekawacondza emaciniso lasisekelo lamayelana naJehova. Loko bekakwati bekumenta aciniseke kutsi ulitfolile liciniso!

4. Yini lesingayenta kuze siciniseke kutsi silitfolile liciniso, futsi yini lesitayifundza mayelana nemaKhristu eliciniso?

⁴ Lokunye lesingakwenta kuze siciniseke kutsi silitfolile liciniso, kutsi sicatsanise indlela Jesu bekakhonta ngayo Nkulunkulu naloko lokwentiwa BoFakazi BaJehova lamuhla. Kulesihloko, sitawubona kutsi emaKhristu eliciniso (1) awatikhonti tithico, (2) ahlonipha libito laJehova, (3) atsandza liciniso, nekutsi (4) atsandzana kakhulu.

ASITIKHONTI TITHICO

5. Yini lesingayifundza kuJesu mayelana nendlela lekahle yekukhonta Nkulunkulu, futsi singakusebentisa njani loko lasifundzisa kona?

⁵ Ngenca yekutsi Jesu bekamtsandza kakhulu Jehova, wakhonta yena kuphela ngesikhatsi asezulwini nangesikhatsi asemhlabeni. (Luk. 4:8) Wafundzisa bafundzi bakhe kutsi nabo bente njalo. Jesu nebafundzi bakhe labetsembekile abazange batisebentise tithico nabakhonta Nkulunkulu. Nkulunkulu unguMoya, ngako kute lokufana naye lokungentiwa ngumuntfu! (Isa. 46:5) Kodvwa kutsiwani ngekwakha titfombe tebantfu lokucatjangwa kutsi bangcwele futsi kuthantazwe kuto? Emyalweni wesibili kuleMitsetfo Lelishumi, Jehova watsi: “Ungatenteli sithico nobe umfanekiso wanobe yini lesemazulwini, nobe lesemhlabeni . . . Ungakukhotsameli.” (Eks. 20:4, 5) Lamavi acacile kulabo labafuna kujabulisa Nkulunkulu.

6. Nguyiphi indlela yekukhonta Nkulunkulu BoFakazi BaJehova labayilandzelako lamuhla?

⁶ Bantfu labadadisha umlandvo batsi ngesikhatsi sebaphostoli, emaKhristu bekakhonta Nkulunkulu kuphela. Nasi sibonelo, lenye incwadzi yemlandvo itsi lamaKhristu “bekangeke awemukele” umbono wekutsi kube netithico endzaweni yekukhontela Nkulunkulu. Lamuhla, BoFakazi BaJehova benta njengobe bekwenta lamaKhristu ekucala. Asithantazi etitfombeni tebantfu lokutsiwa bangcwele nobe etingilosini; asithantazi ngisho nakuJesu. Asiyishayeli ifulegi indesheni nobe sente nobe yini lenye letawenta ngatsi sikhonta hulumende. Ngisho nobe kungentekani, sitimisele kulalela emavi aJesu latsi: “Kufanele ukhotsamele Jehova Nkulunkulu wakho.”—Mat. 4:10.

7. Ngumuphi umehluko lomkhulu emkhatsini waBoFakazi BaJehova naletinye tinkholo?

⁷ Lamuhla, bantfu labanyenti balandzela baholi benkholo labadvumile. Babatsandza kakhulu kangangekutsi bacishe babakhonte. Bantfu labanyenti baya emasontfweni abo, batsenge tincwadzi tabo, babanikelele ngemali lenyenti nobe banikelele tinhlangano labatisekelako. Labanye bakukholwa konkhe labakushoko. Asiciniseki kutsi bangajabula kangaka yini nabangabona Jesu kunendlela labajabula ngayo nababona labaholi babo benkholo! Kodvwa labo labakhonta Nkulunkulu ngendlela lekahle ababalandzeli bantfu. Nanobe sibahlonipha labo labaholako, siyakwemukela loko Jesu lakufundzisa ngesikhatsi atsi: “Nine nibazalwane.” (Mat. 23:8-10) Asibakhonti bantfu, ngisho nobe babaholi benkholo nobe babaholi bepolitiki, futsi asibasekeli. Ngetulu kwaloko, asitingeneli tepolitiki futsi asitihlanganisi nalelive. Kuko konkhe loku, sehluke kakhulu kuto tonkhe tinkholo letitsi tebuKhristu.—Joh. 18:36.

SIHLONIPHA LIBITO LAJEHOVA

8. Sati njani kutsi Jehova ufuna libito lakhe likhatinyuliswe futsi latiwe ngibo bonkhe bantfu?

⁸ Ngalelinye lilanga, Jesu wathantaza watsi: “Babe, khatimulisa libito lakho.” Jehova waphendvula lomthantazo ngelivi lelikhulu asezulwini, etsembisa kutsi utalikhatimulisa libito lakhe. (Joh. 12:28) Ngesikhatsi Jesu ashumayela, wakhatimulisa libito laBabe wakhe. (Joh. 17:26) Ngako emaKhristu eliciniso akutsatsa njengelilungelo kusebentisa libito laNkulunkulu futsi alitjele labanye.

9. EmaKhristu ekucala akhombisa njani kutsi ayalihlonipha libito laNkulunkulu?

⁹ Ngekushesha ngemuva kwekutsi kusungulwe libandla lebuKhristu, Jehova wabemukela “bantfu betive kuze emkhatsini wabo akhetse bantfu labatawubitwa ngelibito lakhe.” (Imis. 15:14) LamaKhristu bekakutsatsa njengelilungelo kusebentisa libito laNkulunkulu nekulitjela labanye. Baphostoli nebafundzi basebentisa libito laNkulunkulu ngesikhatsi bashumayela nalapho babhala tincwadzi teliBhayibheli.b Bakhombisa kutsi bekungibo kuphela lebebatjela labanye ngelibito laNkulunkulu.—Imis. 2:14, 21.

10. Ngubuphi bufakazi bekutsi BoFakazi BaJehova ngibo kuphela labatjela labanye ngelibito laNkulunkulu?

¹⁰ BoFakazi BaJehova ngibo kuphela yini labatjela labanye ngelibito laNkulunkulu? Ase sibuke bufakazi. Lamuhla, baholi benkholo labanyenti bente konkhe labangakwenta kuze bafihle kutsi Nkulunkulu unelibito. Balikhiphile libito laNkulunkulu emaBhayibhelini abo futsi ngaletinye tikhatsi balile kutsi lisetjentiswe emasontfweni abo.c Kuyacaca kutsi BoFakazi BaJehova kuphela labakhombisa kutsi bayalihlonipha libito laNkulunkulu. Sitjela labanye ngelibito laNkulunkulu kwendlula nobe ngabe nguliphi lelinye licembu lenkholo! Senta konkhe lokusemandleni etfu kuze sente loko lokushiwo libito letfu lelitsi BoFakazi BaJehova. (Isa. 43:10-12) Sikhicite emakhophi langetulu kwetigidzi letingu-240 eLihumusho Lemhlaba Lomusha LemiBhalo Lengcwele, lelibuyisele libito laNkulunkulu lapho labanye bahumushi beliBhayibheli balikhiphe khona. Sikhicita tincwadzi letisekelwe eBhayibhelini ngetilwimi letingetulu kwa-1 000, futsi letisebentisa libito laNkulunkulu!

SIYALITSANDZA LICINISO

11. EmaKhristu ekucala akhombisa njani kutsi ayalitsandza liciniso?

¹¹ Jesu bekalitsandza liciniso, lokuliciniso ngaNkulunkulu nangetinjongo takhe. Bekaphila ngekuvumelana naleliciniso, futsi walitjela nalabanye. (Joh. 18:37) Nebalandzeli bakhe bebalitsandza kakhulu liciniso. (Joh. 4:23, 24) Ecinisweni, umphostoli Phetro watsi buKhristu ‘buyindlela yeliciniso.’ (2 Phet. 2:2) Ngenca yekutsi emaKhristu ekucala bekalitsandza kakhulu liciniso, atala timfundziso tenkholo, emasiko kanye nemibono yebantfu lebeyingavumelani neliciniso. (Khol. 2:8) Ngendlela lefanako, lamuhla emaKhristu eliciniso etama kamatima ‘kuchubeka ahamba ecinisweni,’ loko akwenta ngekusekela tinkholelo tawo kanye nendlela laphila ngayo eVini laJehova.—3 Joh. 3, 4.

12. Yini leyentekako nangabe Sigungu LeSibusako sibona kutsi kufanele sente lushintjo endleleni lesilicondza ngayo liciniso lelitsite, futsi kungani senta lolushintjo?

¹² BoFakazi BaJehova abasho kutsi bahlale bakucondza konkhe lokuseBhayibhelini. Ngaletinye tikhatsi bawentile emaphutsa endleleni labachaza ngayo timfundziso teliBhayibheli nobe endleleni labahlela ngayo libandla. Loko akukafaneli kusimangalise. LiBhayibheli likwenta kucace kutsi bantfu baNkulunkulu batawacondza kancono emaciniso njengobe sikhatsi sihamba. (Khol. 1:9, 10) Jehova usembulela kancane kancane liciniso, futsi kufanele silindze ngesineke kuze kube ngulapho silicondza kancono. (Taga 4:18) Nangabe Sigungu LeSibusako sibona kutsi kudzingeka sishintje endleleni lesicondza ngayo nobe lesenta ngayo lokutsite, silwenta ngekushesha lolushintjo. Emasontfo lamanyenti enta lushintjo kuze ajabulise emalunga awo nobe kuze atsandvwe live, kodvwa inhlangano yaJehova yenta lushintjo kuze isisite sisondzelane naNkulunkulu futsi silandzele sibonelo saJesu sekukhonta Nkulunkulu ngendlela lekahle. (Jak. 4:4) Nasenta lushintjo, asilwenti ngobe imibono yebantfu balelive seyishintjile, kodvwa silwenta ngobe sesiyicondza kancono imiBhalo. Siyalitsandza liciniso!—1 Thes. 2:3, 4.

SITSANDZANA KAKHULU

13. Ngubuphi buntfu lobubalulekile lobubonakala kumaKhristu eliciniso, futsi BoFakazi BaJehova babukhombisa njani lamuhla?

¹³ EmaKhristu ekucala bekatiwa ngebuntfu lobunyenti lobuhle, kodvwa lebebuhamba embili bekulutsandvo. Jesu watsi: “Nangabe nitsandzana, bonkhe batawukwati kutsi nibafundzi bami.” (Joh. 13:34, 35) Lamuhla, BoFakazi BaJehova emhlabeni wonkhe bayatsandzana futsi banebunye. Asifani naletinye tinkholo ngobe sinjengemndeni, ngisho nobe sivela emaveni lehlukene futsi sinemasiko langafani. Loku sikubona emihlanganweni yetfu yelibandla, yesigodzi neyesifundza. Lobufakazi buyasicinisekisa kutsi sikhonta Jehova ngendlela layemukelako.

14. Ngekusho kwembhalo waKubaseKholose 3:12-14, nguyiphi indlela lesingakhombisa ngayo kutsi sitsandzana kakhulu?

¹⁴ ImiBhalo isikhutsata kutsi ‘sitsandzane kakhulu.’ (1 Phet. 4:8) Lenye indlela lesikhombisa ngayo kutsi siyatsandzana kutsi sicolelane futsi sibeketelelane. Siphindze sifune ematfuba ekupha labanye ebandleni futsi sibemukele emakhaya etfu, loko sikwenta ngisho nakulabo labasiphetse kabi. (Fundza KubaseKholose 3:12-14.) Nangabe sitsandzana ngalendlela, sikhombisa kutsi singemaKhristu eliciniso.

“KUKHOLWA KUNYE”

15. Ngutiphi letinye tindlela lesisilandzela ngato sibonelo semaKhristu ekucala sekukhonta Nkulunkulu?

¹⁵ Kunaletinye tindlela lesisilandzela ngato sibonelo semaKhristu ekucala endleleni lebekakhonta ngayo Nkulunkulu. Nasi sibonelo, sihleleke ngendlela emaKhristu ekucala bekahleleke ngayo, sinebabonisi betigodzi, labadzala bemabandla, netinceku letisebentako. (Fil. 1:1; Thit. 1:5) NjengalamaKhristu ekucala, sihlonipha umbono waJehova lomayelana nekuya ecansini kanye nemshado, loko Nkulunkulu lakushoko ngekusebentisa ingati futsi sivikela libandla kulabo labangafuni kulalela imitsetfo yaNkulunkulu.—Imis. 15:28, 29; 1 Khor. 5:11-13; 6:9, 10; Heb. 13:4.

16. Yini lesiyifundza emavini laKubase-Efesu 4:4-6?

¹⁶ Jesu watsi labanyenti bebatawutsi babafundzi bakhe kodvwa akusibo bonkhe lebebatawube bacinisile. (Mat. 7:21-23) ImiBhalo iphindze isitjele kutsi ngemalanga ekugcina labanyenti ‘bebatobonakala shengatsi bayamhlonipha Nkulunkulu.’ (2 Thim. 3:1, 5) Kodvwa liBhayibheli likwenta kucace kutsi ‘yinye inkholo’ leyemukelwa nguNkulunkulu.—Fundza Kubase-Efesu 4:4-6.

17. Bobani lamuhla labalandzela Jesu futsi labasenkholweni yeliciniso?

¹⁷ Bobani labasenkholweni yeliciniso lamuhla? Sesibubonile bufakazi. Sesiyibonile indlela Jesu lakhonta ngayo Nkulunkulu naloko bekwentiwa ngemaKhristu ekucala. Yinye imphendvulo lesinayo—BoFakazi BaJehova. Sinelilungelo lelikhulu lekuba bantfu baJehova nelekwati liciniso ngaye nangetinjongo takhe! Shengatsi singachubeka siciniseka kutsi silitfolile liciniso.