UMLANDVO WEKUPHILA

Ngavikeleka Ngobe Bengetsembele KuJehova

ILANDZISWA NGU-ISRAEL ITAJOBI

BANTFU nabangibuta ngalokwenteke ekuphileni kwami, ngivame kutsi: “Ngifana neliputumende esandleni saJehova!” Ngisuke ngisho kutsi njengobe ngitsatsa liputumende lami nangiya nobe ngukuphi langifuna kuya khona, ngifuna Jehova nenhlangano yakhe bente lokufanako kimi, ngifuna bangicondzise kutsi ngiye kuphi nekutsi ngiye nini. Ngemukele tabelo lebetilukhuni futsi ngaletinye tikhatsi betiyingoti. Kodvwa ngifundzile kutsi kwetsembela kuJehova kusivikelo mbamba.

KUCALA IMPHILO YEKWETSEMBELA KUJEHOVA

Ngatalwa nga-1948 endzaweni lencane lengaseningizimu yeNigeria. Ngaleso sikhatsi, babe lomncane Moustapha, nabhuti wami lomdzala Wahabi, babhajatiswa baba BoFakazi BaJehova. Nangineminyaka lengu-9, babe washona futsi ngeva buhlungu kakhulu. Wahabi wangitjela kutsi bengitawuphindze ngimbone babe nasekuvuswa labafile. Lamavi ladvudvutako angenta ngadadisha liBhayibheli. Ngabhajatiswa nga-1963. Bobhuti bami labatsatfu nabo babese bayabhajatiswa.

Nga-1965, ngahamba ngayohlala nebhuti wami lomdzala Wilson eLagos, futsi ngakujabulela kuba nemahlahlandlela lavamile ebandleni lase-Igbobi. Injabulo yabo nekukhutsala kwabo kwangikhutsata, futsi nami ngaba lihlahlandlela ngaJanuary 1968.

Lomunye umzalwane lebekasebenta eBethel, lokutsiwa ngu-Albert Olugbebi, wahlela kuba nemhlangano lokhetsekile natsi tsine lesisebasha lebewumayelana nesidzingo semahlahlandlela lakhetsekile enyakatfo yeNigeria. Solo ngisakukhumbula loko uMzalwane Olugbebi lakusho, watsi: “Nisebasha, futsi ninaso sikhatsi nemandla leningakupha Jehova. Kunyenti leningakwenta!” Bengifuna kuba njengemphrofethi Isaya futsi ngiye lapho Jehova atsi angiye khona, ngako ngafaka sicelo.—Isa. 6:8.

NgaMay 1968, nganikwa sabelo sekuba lihlahlandlela lelikhetsekile edolobheni laseKano, enyakatfo yeNigeria. Loku kwenteka ngesikhatsi semphi lebitwa ngekutsi yiBiafran leyacala nga-1967 kuya ku-1970. Lemphi yabangela kuhlupheka lokukhulu enyakatfo yeNigeria futsi kwafa bantfu labanyenti, yaze yefika nasemphumalanga yeNigeria. Lomunye umzalwane lobekahlose lokuhle wangincenga kutsi ngingayi. Kodvwa ngatsi: “Ngiyabonga ngekungikhatsalela. Kodvwa nangabe Jehova afuna ngisente lesabelo, ngiyaciniseka kutsi utawuba nami.”

Libalave lelikhombisa inshonalanga ye-Africa, futsi kulo kunetindzawo lapho Israel Itajobi ahlala khona: eConakry, eGuinea; eSierra Leone; eNiamey, eNiger; eKano, e-Orisunbare, naseLagos, eNigeria.

KWETSEMBELA KUJEHOVA ENDZAWENI LEKE YABA NEMPHI

Simo besibuhlungu kakhulu eKano. Lemphi beyilitsintse kakhulu lelidolobha lelikhulu. Nasishumayela, besihle sibona tidvumbu talabo lababulewe kulemphi. Nanobe bekunemabandla lambalwa eKano, bazalwane labanyenti bebabalekile. Kwasala bamemeteli labangephansi kwa-15 futsi bebesaba, badvumatekile. Labazalwane nabodzadze bajabula kakhulu nakufika emahlahlandlela lakhetsekile lasitfupha. Safike sabakhutsata futsi bativa bancono. Sabasita baphindze baba neluhlelo lwekukhonta Nkulunkulu, futsi saphindze sacala kutfumela umbiko neli-oda letincwadzi egatjeni.

Mine nalamahlahlandlela lakhetsekile sacala kufundza lulwimi lwesiHausa. Bantfu nabeva umlayeto weMbuso ngelulwimi lwabo, labanyenti bebalalela. Nobe kunjalo, emalunga enkholo lebeyinemalunga lamanyenti kulesifundza awazange awutsandze umsebenti wetfu wekushumayela, ngako kwadzingeka kutsi sihlale sicaphile. Ngalelinye lilanga, mine nalebengishumayela naye sacoshwa ngulenye indvodza lebeyiphetse umukhwa. Kodvwa lokuhle kutsi sayishiya ngematubane! Nanobe lendzawo beyiyingoti, kodvwa Jehova ‘wasivikela’ futsi linani lebamemeteli lacala kukhula. (Hla. 4:8) Lamuhla kunebamemeteli labangetulu kwa-500 emabandleni langu-11 eKano.

KUPHIKISWA ENIGER

Ngilihlahlandlela lelikhetsekile eNiamey, eNiger

Ngemuva kwekuba seKano tinyanga letimbalwa, nga-August 1968, ngatfunyelwa eNiamey, lokuyinhlokodolobha yeNiger ngikanye nalamanye emahlahlandlela lakhetsekile lamabili. Ngekushesha satibonela kutsi iNiger, lesenshonalanga ye-Africa, ingulenye yetindzawo letishisa kakhulu emhlabeni. Ngetulu kwekubeketelela kushisa, kwadzingeka sifundze lulwimi lwalelive, lokusiFulentji. Nanobe loko bekumatima, setsembela kuJehova futsi sacala kushumayela enhlokodolobha sikanye nebamemeteli labambalwa lebebahlala lapho. Kungakapheli sikhatsi lesingakanani, cishe bonkhe bantfu lebebakwati kufundza eNiamey besebayitfolile incwadzi yekudadisha liBhayibheli letsi The Truth That Leads to Eternal Life. Bantfu bebaze bete kutosifuna kuze batfole lencwadzi!

Ngekushesha sabona kutsi tiphatsimandla atibatsandzi BoFakazi BaJehova. NgaJuly 1969, saba nemhlangano wesigodzi wekucala ngca kulelive futsi bekunebantfu labangaba ngu-20. Besikubuke ngalabovu kubhajatiswa kwebamemeteli lababili labasha. Kodvwa ngelilanga lekucala lalomhlangano, kwefika emaphoyisa emisa loluhlelo. Atsatsa lamahlahlandlela lakhetsekile nembonisi wesigodzi aya nabo esiteshini semaphoyisa. Ngemuva kwekusiphenya ngemibuto, atsi asibuye ngelilanga lelilandzelako. Sabona kutsi sitawuba senkingeni, ngako sahlela kutsi inkhulumo yelubhabhatiso ibe sekhaya futsi sabhabhatisa labamemeteli ngasense emfuleni.

Ngemuva kwemaviki lambalwa, hulumende wacosha mine nalamanye emahlahlandlela lakhetsekile lasihlanu. Sanikwa ema-awa langu-48 ekuphuma siphele kulelive, futsi kwadzingeka sitibonele kutsi sihamba ngani. Salalela futsi saya ehhovisi leligatja eNigeria, lapho satfola khona tabelo letinsha.

Ngacelwa kutsi ngiye e-Orisunbare, eNigeria futsi ngajabulela umsebenti wekushumayela nelicembu lebamemeteli labambalwa lebebahlala lapho. Kodvwa ngemuva kwetinyanga letisitfupha, lihhovisi leligatja langicela kutsi ngibuyele ngedvwa eNiger. Ngacale ngamangala futsi ngesaba, kodvwa ngabese ngiyakulangatelela kuphindze ngibone bazalwane baseNiger!

Ngabuyela eNiamey. Ngelilanga lesibili ngifikile, lomunye somabhizinisi waseNigeria wabona kutsi nginguFakazi futsi wacala kungibuta imibuto ngeliBhayibheli. Ngadadisha naye liBhayibheli, futsi ngemuva kwekutsi sekayekele kubhema nekunatsa kakhulu tjwala, wabhajatiswa. Ngakujabulela kushumayela nebazalwane nabodzadze etindzaweni letehlukene taseNiger nekubona bantfu bemukela liciniso. Nangifika kwekucala kulelive, bekunaboFakazi labangu-31; kodvwa ngatsi nangihamba bese bangu-69.

“KUTE LOKUNGANANI LESIKWATIKO NGEMSEBENTI WEMBUSO EGUINEA”

Ngasekupheleni kwa-1977, ngabuyela eNigeria kuze ngiyoceceshwa. Ngemuva kwemaviki lamatsatfu ngiceceshwa, umchumanisi weKomidi Yeligatja lokunguMalcolm Vigo, watsi angifundze incwadzi lebuya egatjeni laseSierra Leone. Bazalwane bebafuna umzalwane lolihlahlandlela, longakashadi, lophile kahle futsi lokhuluma siNgisi nesiFulentji kuze ayojikeleta eGuinea. UMzalwane Vigo watsi bengiceceshelwa kwenta lesabelo. Wagcizelela kutsi lesabelo besilukhuni. Watsi: “Cabangisisa ngaphambi kwekutsi usemukele.” Ngamphendvula ngekushesha ngatsi: “Njengobe kunguJehova longitfumako, ngitawukuya.”

Ngaya eSierra Leone futsi ngahlangana nebazalwane ehhovisini leligatja. Lelinye lilunga leKomidi Yeligatja latsi: “Kute lokungakanani lesikwatiko ngemsebenti weMbuso eGuinea.” Nanobe leligatja belinakekela umsebenti wekushumayela eGuinea, belingakhoni kuchumana nebamemeteli ngenca yesimo lesishubile setepolitiki kulelive. Ligatja letama tikhatsi letinyenti kutfumela umzalwane kulelive, kodvwa belingakhoni. Ngako ngacelwa kutsi ngiye enhlokodolobha yeGuinea, eConakry, kute ngetame kutfola imvume yekuhlala kulelive.

“Njengobe kunguJehova longitfumako, ngitawukuya”

Nangifika eConakry, ngaya kumbhasada waseNigeria. Ngamtjela ngesifiso wami sekushumayela eGuinea. Wangikhutsata kutsi ngingahlali ngobe ngitotifaka engotini yekuboshwa nobe kwenteke lokubi kakhulu kunaloko. Watsi: “Buyela eNigeria ushumayele khona,” futsi ngamphendvula ngatsi: “Ngitimisele kuhlala lana.” Ngako wabhalela indvuna lebuke kuhlala kwebantfu eGuinea wayicela kutsi ingisite, futsi yangisita.

Ngemuva kwesikhashana, ngabuyela ehhovisini leligatja eSierra Leone futsi ngatjela bazalwane sincumo salendvuna. Labazalwane bamemeta ngenjabulo nabeva kutsi Jehova uluphumelelisile loluhambo lwami. Ngayitfola imvume yekuhlala eGuinea!

Israel ujabulile futsi utfwele tintfo takhe. — Ngisemsebentini wekujikeleta eSierra Leone

Kusukela nga-1978 kuya ku-1989, ngajikeleta eGuinea, eSierra Leone, futsi bengihle ngibambela umbonisi wesigodzi eLiberia. Ekucaleni bengigulela futsi. Loku bekuhle kwenteka nangisetindzaweni letisemaphandleni. Kodvwa bazalwane bebenta konkhe labangakwenta kuze bangimikise esibhedlela.

Ngalelinye lilanga ngagula kakhulu nginamalaleveva netilo. Nasengiphilile, ngeva kutsi bazalwane bebabonisana ngekutsi batangingcwaba kuphi! Nanobe ngacishe ngafa, angizange ngikucabange kushiya sabelo sami. Nanyalo solo ngiyaciniseka kutsi kuvikeleka mbamba nalokuhlala njalo kuvela kuNkulunkulu longasivusa ekufeni.

MINE NEMKAMI SETSEMBELA KUJEHOVA

Israel naDorcas ngelilanga labo lemshado. — Ngelilanga letfu lemshado nga-1988

Nga-1988, ngahlangana naDorcas, dzadze lebekalihlahlandlela, atfobekile futsi amtsandza kakhulu Jehova. Sashada, futsi sachubeka senta umsebenti wekujikeleta. Dorcas ukhombisile kutsi ungumfati lonelutsandvo nalotidzelako. Besihamba emakhilomitha langaba ngu-25 sisuka kulelinye libandla siya kulelinye setfwele imitfwalo yetfu. Nasiya emabandleni lakhashane, besisebentisa nobe ngukuphi kwekuhamba lesingakutfola kuze sihambe emigwacweni leneludzaka netigodzi.

Dorcas unesibindzi kakhulu. Sibonelo nje, ngaletinye tikhatsi bekudzingeka sewele imifula legcwele tingwenya. Ngalesinye sikhatsi kwadzingeka sihambe emalanga lasihlanu, futsi bekufanele sewele umfula ngesikebhe ngobe tebetebe bekephukile. Watsi Dorcas naketama kwehla kulesikebhe, wagcumukela emantini lashonako. Sobabili besingakwati kubhukusha futsi bekunetingwenya kulomfula. Lokuhle kutsi lamanye emajaha angena amkhipha. Kwaphela sikhatsi sihle sibhudza ngaloku, kodvwa sachubeka esabelweni setfu.

BoJahgift na-Eric basebancane futsi beme embikweliHholwa leMbuso. — Bantfwana betfu, lokunguJahgift na-Eric babe tipho letivela kuJehova

Ngasekucaleni kwa-1992, samangala kakhulu kutfola kutsi Dorcas bekakhulelwe. Kwadzingeka sente sincumo sekutsi sitawuchubeka yini singemahlahlandlela lakhetsekile? Sacabanga satsi: “Jehova usiphe sipho!” Ngako sancuma kwetsa indvodzakati yetfu ngekutsi nguJahgift. Ngemuva kweminyaka lemine kwalandzela umnakabo lokungu-Eric. Bobabili bantfwana betfu babe sipho lesivela kuJehova. Jahgift usebente sikhatsi lesitsite ehhovisini lekuhumusha eConakry, kantsi Eric uyinceku lesebentako.

Israel naDorcas beme nendvodzana yabo Eric, kanye nendvodzakati yabo Jahgift, embikweliHholwa leMbuso.

Nanobe kwadzingeka kutsi Dorcas ayekele kuba lihlahlandlela lelikhetsekile, wachubeka alihlahlandlela lelivamile ngisho nobe bekakhulisa bantfwana betfu. Ngekusitwa nguJehova, ngachubeka ngisemsebentini wasikhatsi sonkhe. Ngemuva kwekutsi bantfwana betfu sebakhulile, Dorcas waphindze waba lihlahlandlela lelikhetsekile. Nyalo sobabili sititfunywa telivangeli eConakry.

UMTFOMBO WESIVIKELO SIBILI

Bengihlale ngiya nobe ngukuphi lapho Jehova atsi angiye khona. Mine nemkami besihlale sisibona sivikelo sakhe nesibusiso sakhe. Kwetsembela kuJehova kusente sangakhatsateki njengebantfu labanyenti labetsembele etintfweni labanato. Mine naDorcas sikubone kuloko lokwenteke kitsi kutsi uMtfombo wekuvikeleka mbamba nguJehova “Nkulunkulu wensindziso yetfu.” (1 Khr. 16:35) Ngiyaciniseka kutsi Jehova utawuvikela kuphila kwabo bonkhe labo labetsembele kuye, ‘akuvikele njengemuntfu lovikela tintfo letiligugu letifakwe esikhwameni.’—1 Sam. 25:29.