Kucolelwa Kwetono Isengakabi Khona Inhlawulo

Inhlawulo yaJesu layikhipha ngengati yakhe ikuphela kwendlela lesingacolelwa ngayo tono tetfu. (Ef. 1:7) Nobe kunjalo, liBhayibheli litsi: “Nkulunkulu . . . uyabeketela futsi uyatitsetselela tono letentiwe esikhatsini lesengcile,” lokusho tono letentiwa ngaphambi kwekutsi Jesu abe yinhlawulo. (Rom. 3:25) Jehova bekangaticolela njani tono ngaphambi kwekutsi kukhishwe inhlawulo futsi ngesikhatsi lesifanako achubeke anguNkulunkulu lolungile?

Ngesikhatsi Jehova ancuma kutsi kutawuba “nentalelwane” letawusindzisa bantfu labanekukholwa kuye, besekufana nekutsi sewuvele uyikhiphile inhlawulo. (Gen. 3:15; 22:18) Nkulunkulu bekaciniseka mbamba kutsi ngesikhatsi sakhe lesifanele iNdvodzana yakhe lekuphela kwayo beyitawunikela ngekuphila kwayo ngekutitsandzela kuze ibe yinhlawulo. (Gal. 4:4; Heb. 10:7-10) Ngesikhatsi Jesu alamhlabeni, Jehova wamnika ligunya lekucolela tono ngaphambi kwekutsi kukhishwe inhlawulo. Jesu wacolela tono talabo lebebanekukholwa ngobe bekati kutsi inhlawulo yakhe beyitawenta kutsi bantfu bacolelwe tono tabo.—Mat. 9:2-6.