Nanobe Benginemahloni Kakhulu, Ngaba Sitfunywa Selivangeli

Ngatalwa nga-1951 eVienna, e-Austria, Ngiyakhumbula kutsi kulenye inyanga sahambisa bomagazini labangetulu kwa-4 000! Kodvwa ngulabantfu lebebenta siwujabulele kakhulu lomsebenti. Bebamhlonipha Nkulunkulu futsi bafuna kucoca ngeliBhayibhelingatalelwa emndenini longemaKatolika. Benginemahloni, kodvwa bengikholelwa kuNkulunkulu futsi bengivame kuthantaza. Nangineminyaka lengu-9, babe wacala kudadisha liBhayibheli naBoFakazi BaJehova; ngekuhamba kwesikhatsi namake wabese uyalandzela.

Ngekushesha saba yincenye yelibandla laseDöbling, eVienna. Njengemndeni, besenta tintfo letinyenti ndzawonye. Besifundza liBhayibheli futsi silidadisha, siya emihlanganweni yelibandla futsi sivolontiya emihlanganweni yesigodzi. Nangisemncane, babe wangifundzisa kutsi ngimtsandze kakhulu Jehova. Ecinisweni, bekathantazela kutsi mine nasisi wami sibe ngemahlahlandlela. Kodvwa ngaleso sikhatsi lowo bekungasiwo umgomo wami.

KUCALA UMSEBENTI WASIKHATSI SONKHE

Ngabhajatiswa nga-1965, nangineminyaka lengu-14. Nobe kunjalo, bengikutfola kumatima kucoca nebantfu lengingabati nangenta umsebenti wekushumayela. Ngetulu kwaloko bengitibukela phansi, futsi bengikufuna kakhulu kwemukelwa ngulabanye labasebasha. Ngako kungakapheli sikhatsi lesidze ngibhajatisiwe, ngacala kutihlanganisa nalabanye lebebangamkhonti Jehova. Nanobe bengikutsandza kuba nabo, nembeza wami bewungihlupha ngobe bengicitsa sikhatsi nebantfu labangasibo boFakazi. Kodvwa bengite emandla ekushintja. Yini leyangisita?

Ngaleso sikhatsi, lenye intfombatane leneminyaka lengu-16 lokutsiwa nguDorothée, yaba yincenye yelibandla letfu. Yangijabulisa indlela lebeyiwukhutsalele ngayo umsebenti wekushumayela. Bengimdzadlana kunayo, kodvwa bengingayi njalo kuyoshumayela. Ngacabanga ngatsi: ‘Batali bami baboFakazi, kodvwa umndeni wakuboDorothée awusibo boFakazi. Uhlala namake wakhe logulako, kepha uhlale akhona emsebentini wekushumayela!’ Sibonelo sakhe sangikhutsata kutsi ngimentele lokunyenti Jehova. Ngekushesha ngemuva kwaloko, mine naDorothée saba ngemahlahlandlela futsi sasebenta ndzawonye. Sacale saba ngemahlahlandlela lasitako, futsi ngekuhamba kwesikhatsi saba ngulavamile. Umdlandla waDorothée bewutselelwana. Wangisita kutsi ngitfole sifundvo sami sekucala seliBhayibheli. Ngekuhamba kwesikhatsi ngacala kukhululeka kucoca nebantfu emtini ngemuti, etitaladini nakuletinye tindzawo.

Ngemnyaka wekucala ngilihlahlandlela lelivamile, lomunye umzalwane wase-Austria lokutsiwa nguHeinz wefika ebandleni letfu. Wafundza liciniso eCanada ngesikhatsi avakashele bhuti wakhe lebekanguFakazi. Heinz wabelwa ebandleni letfu eVienna kutsi abe lihlahlandlela lelikhetsekile. Ngamtsandza nje ngicala kumbona. Kodvwa bekafuna kuba sitfunywa selivangeli futsi mine bengingafuni. Ngako ngacale ngafihla kutsi ngiyamtsandza. Kodvwa ngekuhamba kwesikhatsi, mine naHeinz sacala kutsandzana, sashada, futsi saba ngemahlahlandlela e-Austria.

UMGOMO WEKUBA SITFUNYWA SELIVANGELI

Heinz bekavame kungitjela ngesifiso sakhe sekuba sitfunywa selivangeli. Nanobe bekangangicindzeteli, bekavame kungibuta imibuto lengenta ngicabange, lenjengalotsi: “Ngenca yekutsi site bantfwana, singamentela yini lokunyenti Jehova?” Ngenca yekutsi nginemahloni, bengesaba kuba sitfunywa selivangeli. Kuliciniso kutsi bengilihlahlandlela, kodvwa bengiva ngatsi ngeke ngikhone kuba sitfunywa selivangeli. Nobe kunjalo, ngesineke, Heinz wachubeka akhuluma ngalomgomo. Waphindze wangikhutsata nekutsi nginganaki kakhulu simo sami kodvwa ngibe nendzaba kakhulu nalabanye bantfu. Leseluleko sakhe sangisita kakhulu.

Kancane kancane ngacala kuba nesifiso sekuba sitfunywa selivangeli, ngako safaka sicelo sekuya eSikolweni saseGileyadi. Nobe kunjalo, inceku yeligatja yasikhutsata kutsi ngicale ngekutfutfukisa siNgisi sami. Ngemuva kweminyaka lemitsatfu ngetama kamatima kutfutfukisa siNgisi sami, samangala nasitfola sabelo sekuya ebandleni lelikhuluma siSerbo-Croatian, eSalzburg, e-Austria. Kwaphela iminyaka lengu-7 sisebenta leyo nsimu, lokufaka ekhatsi umnyaka munye senta umsebenti wekujikeleta. Lolulwimi lwesiSerbo-Croatian belumatima, kodvwa besinetifundvo teliBhayibheli letinyenti.

Nga-1979 sacelwa kutsi “sivakashe” eBulgaria. Umsebenti wekushumayela bewuvinjelwe. Ngako besingashumayeli. Kodvwa besingenisa tincwadzi ngemshosha phansi kulelive kuze titfolwe bodzadze labasihlanu lebebahlala eSofia, lokuyinhlokodolobha. Bengesaba kakhulu, kodvwa Jehova wangisita ngesikhatsi ngenta lomsebenti. Kubona sibindzi salabodzadze kanye nenjabulo lebebanayo ngisho nobe bebangaboshwa, kwanginiketa sibindzi sekwenta konkhe lokusemandleni ami kunobe yini inhlangano yaJehova lengicela kutsi ngiyente.

Ngemuva kwesikhatsi saphindze safaka sicelo sekuya eGileyadi, futsi semukelwa. Besicabanga kutsi sitawuya esikolweni sesiNgisi eMelika. Kodvwa ngaNovember 1981, inhlangano yacalisa emaKlasi aseGileyadi eJalimane, egatjeni lakhona eWiesbaden. Ngenca yekutsi leliklasi belingesiJalimane, kwaba melula kutsi ngikucondze loko bekufundvwa. Besitawabelwa kuphi?

SABELWA EVENI LEBELINEMPHI

Sabelwa eKenya! Nobe kunjalo, ligatja laseKenya lasibuta kutsi singakhona yini kuyosebenta eveni lelingumakhelwane, lokuyi-Uganda. Eminyakeni lengu-10 ngaphambi kwaloko, hulumende wase-Uganda waketulwa ngemasotja lebekaholwa nguJenene Idi Amin. Eminyakeni leyalandzela, kubusa kwakhe ngesandla lesicinile kwenta kutsi kufe bantfu labanyenti kakhulu futsi tigidzi tebantfu tahlupheka. Nga-1979 lohulumende wase-Uganda waphindze waketulwa. Ngako bengingaciniseki kutsi ngiye yini eveni lebelinemphi. Kodvwa iGileyadi beyisifundzise kutsi setsembele kuJehova. Ngako savuma.

Simo besimatima e-Uganda. Heinz wasichaza ngalendlela eNcwadini Yonyaka Ka-2010: “Tintfo letinyenti, . . . letifaka ekhatsi emanti netekuchumana, betingasebenti. . . . Bekuvamile kudutjulwa kwebantfu nebugebengu, ikakhulukati ebusuku. . . . Bonkhe bantfu bebahlala emakhaya, betsemba futsi bathantazela kutsi ngalobo busuku kube bete sivakashi lesifika bangakasimemi.” Nanobe bekunaletinkinga, bazalwane nabodzadze bebanebuhlobo lobuhle naNkulunkulu!

Nga-1982, mine naHeinz sefika eKampala, lokuyinhlokodolobha ye-Uganda. Etinyangeni tekucala letisihlanu, besihlala ekhaya laSam naChristina Waiswa kanye nebantfwana babo labasihlanu netihlobo tabo letine. UMzalwane naDzadze Waiswa kanye nemndeni wabo bebavame kudla kanye ngelilanga, lokwasenta samangala kakhulu kutsi bakhonile kusemukela. Kuleso sikhatsi sihlala nebakaWaiswa, mine naHeinz safundza tifundvo letinyenti letasisita nasititfunywa telivangeli. Sibonelo nje, safundza konga emanti ngekutsi sigeze ngemalitha lambalwa futsi sisebentise emanti ekutiyakata kuze siflashe emthoyi. Nga-1983, mine naHeinz satfola indzawo yekuhlala endzaweni lephephile eKampala.

Besiwujabulela kakhulu umsebenti wekushumayela. Mine naHeinz besidadisha liBhayibheli nebantfu labangaba ngu-10 kuya ku-15 umuntfu amunye. Ngetulu kwaloko, kunyenti lesakufundza kulabantfu besifundza nabo. Sibonelo nje, besiwujabulela umoya wabo lomuhle njengobe baya emihlanganweni yelibandla njalo ngeliviki futsi babuyela emakhaya, bebangakhononi futsi bebahlale bamoyitela.

Nga-1985 nanga-1986, kwaba netimphi letimbili e-Uganda. Besivame kubona bantfwana labangemasotja bahlome ngetibhamu kanye nalapho kuseshwa khona bantfu. Kuleso sikhatsi, besithantazela kucondza nekuhlale sehlise umoya njengobe sifuna bantfu labafuna kwati liciniso. Jehova wayiphendvula imithantazo yetfu. Besivame kukhohlwa kutsi siyesaba ngekushesha nje nasitfola umuntfu lowemukelako umlayeto weMbuso.

Besikujabulela nekushumayela bantfu bakulamanye emave. Sibonelo nje, sahlangana naMurat naDilbar Ibatullin, labashadene baseTatarstan (eCentral Russia) futsi sadadisha nabo liBhayibheli. Murat bekangudokotela. Laba labashadene balemukela liciniso futsi bacala kukhonta Jehova kusukela ngaleso sikhatsi. Ngekuhamba kwesikhatsi, ngajabula kuhlangana nalomunye wesifazane wase-Ukraine lokutsiwa nguTatjana Vileyska, lebekafuna kutibulala. Ngemuva kwekutsi Tatjana sekabhajatisiwe, wabuyela e-Ukraine futsi ngekuhamba kwesikhatsi wahumusha tincwadzi tetfu.a

TINKINGA LETINSHA

Nga-1991 ngesikhatsi mine naHeinz sivakashe e-Austria, sashayelwa ligatja lalapho futsi lasitjela kutsi sesitfole sabelo lesisha sekuya eBulgaria. Ngemuva kwekuphela kwembuso wemakhomanisi eMphumalanga yeYurophu, umsebenti waBoFakazi BaJehova waba semtsetfweni eBulgaria. Njengobe ngike ngasho, mine naHeinz besike sangenisa tincwadzi ngemshoshaphansi kulelive ngesikhatsi umsebenti wetfu uvinjelwe. Kodvwa nyalo bese sitfunyelwa kulo kuze siyoshumayela.

Bazalwane basitjela kutsi singabuyeli e-Uganda. Ngako asizange sibuyele lapho besihlala khona kuze siyopakisha tintfo tetfu nobe sivalelise bangani betfu, saya eBethel eJalimane, satsatsa imoto futsi saya eBulgaria. Sabelwa ecenjini lebelinebamemeteli labangu-20 eSofia.

Sabhekana netinkinga letinsha eBulgaria. Kwekucala, besingalwati lolulwimi. Ngetulu kwaloko, bekunetincwadzi letimbili nje kuphela lebetitfolakala ngesiBulgaria, lokuyincwadzi letsi The Truth That Leads to Eternal Life naletsi Incwadzi Yami Yetindzaba TeliBhayibheli. Besikutfola kumatima nekucalisa tifundvo teliBhayibheli. Ngisho nobe besinaletinkinga, lelicembu letfu lelincane laboFakazi labakhutsele belitfutfuka. Lisontfo lema-Orthodox lakubona loko, futsi kulapho-ke latacala khona tinkinga letinkhulu.

Nga-1994 boFakazi besulwa emabhukwini futsi baphatfwa njengelicembu lelingekho emtsetfweni. Labanye bazalwane baboshwa. Betindzaba basakata emanga lamabi ngatsi, batsi BoFakazi BaJehova abagcini nje ngekubulala bantfwana, kodvwa bakhutsata nalabanye boFakazi kutsi batibulale. Mine naHeinz besikutfola kumatima kushumayela. Besivame kuhlangana nebantfu labatfukutsele labebasitsetsisa, basibitela emaphoyisa futsi bebasijikijela nangetintfo. Bekumatima kutsi tincwadzi tetfu tingene kulelive, bekumatima nekucasha emahhola kuze sibe nemihlangano. Emaphoyisa ake emisa lomunye umhlangano wetfu wesifundza. Mine naHeinz besingakakwetayeli kwenyanywa ngalendlela. Bekungafani nase-Uganda, lapho bantfu bakhona bebalemukela liciniso futsi banebungani! Yini leyasisita kuze sikhone kubhekana nalolushintjo?

Sajabula ngekutihlanganisa nebazalwane nabodzadze bendzawo. Bebajabula ngekutsi sebalitfolile liciniso futsi bebajabula ngelusito lebesibanika lona. Bonkhe bebasondzelene futsi basekelana. Safundza kuloko lokwenteka kutsi singajabula kunobe ngusiphi sabelo nangabe nje sitsandza bantfu.

Kodvwa ngekuhamba kwesikhatsi tintfo taba ncono. Inhlangano yetfu yaphindze yabhaliswa ngalokusemtsetfweni nga-1998, futsi ngekushesha tincwadzi letinyenti besetitfolakala ngesiBulgaria. Kwabese kutsi nga-2004 kwaniketelwa sakhiwo lesisha seligatja. Lamuhla, kunemabandla langu-57 eBulgaria, lanebamemeteli labangu-2 953. Kulomnyaka wemsebenti lowendlulile, bantfu labangu-6 475 bebakhona eSikhumbutweni. Nanobe kwake kwaba nabodzadze labasihlanu eSofia, nyalo sekunemabandla langu-9! Sibone mbamba kutsi ‘lomncane ube yinkhulungwane.’​—Isa. 60:22.

KUBHEKANA NETINKINGA TAMI

Nami ngibe nato tinkinga temphilo. Kuleminyaka, ngimilwe tigadla emtimbeni, lesinye samila enhloko. Kudzingeke kutsi tishiswe futsi ngahlindvwa ema-awa langu-12 eNdiya kuze kususwe letinyenti tato. Ngemuva kwekululamela egatjeni laseNdiya, sabuyela esabelweni setfu eBulgaria.

Ngesikhatsi lesifanako, Heinz wacalwa kugula lokungakavami lokulufuto lokutsiwa yiHuntington. Bekangasakhoni kuhamba, kukhuluma nekulawula emamasela akhe. Njengobe lesifo besiya siba nemandla, beseketsembele kimi kutsi ngimnakekele. Bengihle ngiva ngatsi lesimo singetulu kwemandla ami, futsi bengikhatsateka ngekutsi ngitawukhona yini kuchubeka ngimnakekela. Nobe kunjalo, lomunye umzalwane losemusha lokutsiwa nguBobi bekahlale amema Heinz kutsi bashumayele ndzawonye. Bobi bekangahlazeki ngekutsi Heinz bekangakhoni kukhuluma kahle nobe kulawula emamasela akhe. Bengetsembela kuBobi nangingakhoni kumsita Heinz. Nanobe mine naHeinz sancuma kuba bete bantfwana kulelive laSathane, seva ngatsi Jehova usinikete Bobi kutsi abe yindvodzana yetfu!​—Mak. 10:29, 30.

Heinz bekaphetfwe nangumdlavuza. Lokubuhlungu kutsi indvodza yami lengiyitsandzako yashona nga-2015. Ngativa ngisele ebaleni ngemuva kwekushona kwakhe; bengingakholwa kutsi ushonile. Kodvwa enhlitiyweni yami, usaphila! (Luk. 20:38) Ngivame kuwakhumbula kahle emavi akhe lanemusa neteluleko takhe letilusito njengobe ngisaphila. Ngibonga kakhulu ngeminyaka lesiyicitse ndzawonye sikhonta Jehova.

NGIYAMBONGA JEHOVA NGEKUNGISITA

Jehova ungisitile kuto tonkhe tinkinga tami. Uphindze wangisita kutsi ngincobe emahloni futsi ngibe sitfunywa selivangeli lesitsandza bantfu. (2 Thim. 1:7) Ngiyambonga Jehova ngekutsi mine nasisi wami lomncane sisemsebentini wasikhatsi sonkhe. Lamuhla, yena nendvodza yakhe bajikeleta emabandleni lakhuluma siSerbia eYurophu. Imithantazo yababe layisho eminyakeni leminyenti leyendlulile yaphendvuleka!

Kutidadishela liBhayibheli kungenta ngibe nekuthula kwangekhatsi. Etikhatsini letimatima, ngifundze ‘kujula kakhulu’ emthantazweni njengaJesu. (Luk. 22:44) Lenye indlela imithantazo yami lephendvulwa ngayo lutsandvo nemusa bazalwane nabodzadze labangikhombisa wona ebandleni lengikulo eNadezhda, eSofia. Bavame kungimema kutsi ngicitse sikhatsi nabo futsi bavame kungitjela kutsi bayangitsandza, lokungenta kutsi ngijabule kakhulu.

Ngivame kucabanga ngesikhatsi lapho sekuvuswa labafile. Ngeliso lengcondvo ngibona batali bami beme embikwendlu yakitsi, babahle njengalelilanga bashada. Ngibone nasisi wami alungisa kudla. Ngibone Heinz eme eceleni kwelihhashi lakhe. Titfombe letinjena letiba sengcondvweni yami tingenta ngingacabangi ngetintfo letingivisa buhlungu, futsi ngihlale ngimbonga Jehova.

Nangicabanga ngaloko lokwenteke ekuphileni kwami futsi ngibuka nelikusasa, ngivumelana ngalokuphelele nemavi aDavide lakuTihlabelelo 27:13, 14 latsi: “Ngabe ngikuphi nje kube bengingakholwa kutsi ngitawubona buhle baJehova ngisaphila? Tsemba Jehova; bani nesibindzi futsi ucine. Yebo, tsemba Jehova.”