Kufanele Yini Kutsi Inkholo Ingenele Tindzaba Tepolitiki?

Emhlabeni wonkhe, bantfu labanyenti labatsi babalandzeli baKhristu bangene shi etindzabeni tepolitiki. Labanye bazama kwenta inkholo yabo kanye nendlela yabo yekuphila kutsi yatiwe ngekutsi basekele bantfu labatsite nobe emacembu etepolitiki. Ngalokufanako, nabosopolitiki bahle basebentisa tintfo letikhatsata bantfu kuze batobasekela. Kuvamile kutsi baholi betinkholo bafune tikhundla kutepolitiki nobe kubohulumende. Kulamanye emave, lisontfo “lebuKhristu” lingatfola sikhundla lesikhetsekile sekuba lisontfo lesive.

Wena ucabangani? Kufanele yini kutsi balandzeli baJesu Khristu bangenele tepolitiki? Imphendvulo ungayitfola ngekutsi ubuke sibonelo saJesu. Watsi: “Nginentele sibonelo kuze nani nente njengobe ngentile.” (Johane 13:15) Nakutiwa etindzabeni tepolitiki, ngusiphi sibonelo Jesu lasibekela sona?

Jesu watingenela yini tindzaba tepolitiki?

Cha. Jesu akazange atingenele tindzaba tepolitiki talelive.

Jesu akazange afune sikhundla kutepolitiki. Ngesikhatsi Sathane Develi amnika “yonkhe imibuso yemhlaba,” Jesu akazange avume kubusa bohulumende bebantfu. (Matewu 4:8-10)a Ngalelinye lilanga, ngesikhatsi bantfu babona buntfu baJesu lobebungamenta kutsi abe ngumholi lokahle, bazama kumenta kutsi angenele tepolitiki. LiBhayibheli litsi: “Jesu wesuka waya entsabeni ayedvwa ngobe bekati kutsi besebeta batewumbamba kuze bambeke abe yinkhosi.” (Johane 6:15) Jesu akazange avumelane naloko bekufunwa ngulabantfu. Kunaloko, wala kungenela tepolitiki.

Jesu akazange atsatse luhlangotsi etindzabeni tepolitiki. Sibonelo saloko nje, ngesikhatsi saJesu, emaJuda bekakuzonda kukhokha umtselo kuhulumende wemaRoma futsi bekawutsatsa njengemtfwalo. Nabetama kwenta Jesu kutsi atsatse luhlangotsi kulendzaba, akazange aphikisane nabo ngekutsi kufanele bawukhokhe yini lomtselo nobe cha. Watsi kubo: “Nikani Khesari lokukwakhe, kodvwa ninike Nkulunkulu lokukwakhe.” (Makho 12:13-17) Jesu akazange alutsatse luhlangotsi kulendzaba kodvwa wabatjela kutsi kufanele bawukhokhe lomtselo lebewufunwa nguhulumende wemaRoma lebewumelelwa nguKhesari. Ngesikhatsi lesifanako, waveta kutsi bohulumende kufanele balalelwe ngelizinga lelitsite. Umuntfu akukafaneli anikete hulumende loko lokukwaNkulunkulu, lokufaka ekhatsi kutinikela kanye nekukhonta.—Matewu 4:10; 22:37, 38.

Jesu wasekela hulumende wasezulwini lokunguMbuso waNkulunkulu. (Lukha 4:43) Jesu akazange atingenele tepolitiki ngobe bekati kutsi imibuso yebantfu angeke ikufeze loko Nkulunkulu lakufunako ngemhlaba, kodvwa kungafezwa kuphela nguMbuso waNkulunkulu. (Matewu 6:10) Bekati kutsi uMbuso waNkulunkulu angeke ubuse kanye nalabohulumende bebantfu kodvwa utawubusa esikhundleni sabo.—Danyela 2:44.

EmaKhristu angelikhulu lekucala atingenela yini tindzaba tepolitiki?

Cha. Balandzeli baJesu balalela lomyalo lotsi “ningabi yincenye yelive.” (Johane 15:19) Balandzela sibonelo sakhe futsi bangatingeneli tindzaba tepolotiki yalelive. (Johane 17:16; 18:36) Kunekutsi bangenele tindzaba tepolitiki talelive benta umsebenti Jesu bekatsite bawente, lokukushumayela kanye nekufundzisa ngeMbuso waNkulunkulu.—Matewu 28:18-20; Imisebenti 10:42.

EmaKhristu angelikhulu lekucala bekenta kulalela Nkulunkulu kute kucala ekuphileni kwawo, kodvwa bekati nekutsi kufanele abahloniphe nalabo labasemagunyeni. (Imisebenti 5:29; 1 Phetro 2:13, 17) Bebalalela imitsetfo baphindze bakhokhe nemtselo. (KubaseRoma 13:1, 7) Nanobe bebangatingeneli tepolitiki, kodvwa bebalutfola lusito loluvela kuhulumende kanye nakuvikeleka ngalokusemtsetfweni.—Imisebenti 25:10, 11; KubaseFiliphi 1:7.

Kungalutsatsi luhlangotsi kwemaKhristu esikhatsi salamuhla

LiBhayibheli likhombisa ngalokucacile kutsi Jesu nobe balandzeli bakhe bekucala abazange batingenele tepolitiki. Ngenca yalesosizatfu, emaKhristu laBoFakazi BaJehova emhlabeni wonkhe akalutsatsi luhlangotsi etindzabeni tepolitiki. NjengemaKhristu angelikhulu lekucala, nabo benta umsebenti Jesu latsi wentiwe, lokukushumayela “tindzaba letimnandzi teMbuso.”—Matewu 24:14.