Indzebe Yemhlaba Ingabenta Babe Munye Mbamba Yini Vele Bantfu?—Litsini LiBhayibheli?

Kulindzeleke kutsi linani lebantfu lelilinganiselwa ku-5 billion libukele imidlalo yendzebe yemhlaba (FIFA World Cup) lecale ngaNovember 20 futsi letawuphela ngaDecember 18, 2022. Bantfu labanyenti babona shengatsi imibutsano yetemidlalo lefana nalona ingafeza lokungetulu kwekumane nje ihlanganise bantfu labatihlwele.

• “Temidlalo tinemandla ekushintja umhlaba. Tinemandla ekukhutsata. Tinemandla ekuhlanganisa bantfu kwendlula nome ngabe yini lenye.”—Nelson Mandela, lobekangumengameli waseNingizimu Afrika.

• “Libhola letinyawo . . . lenta bantfu babe nelitsemba lelifanako, babe nenjabulo lefanako, babe nenshisekelo lefanako, batsandzane futsi babone kutsi kukhona labafana ngako.”—Gianni Infantino, mengameli we-FIFA.a

Imidlalo yendzebe yemhlaba, nome-ke lolunye luhlobo lwetemidlalo kungakhona yini vele kufeza lemigomo lephakeme kangaka? Likhona yini litsemba mayelana nekuthula nebunye?

Umtfombo webunye?

Imidlalo yendzebe yemhlaba yalomnyaka yente bantfu bacabanga lokungetulu nje kwelibhola letinyawo. Ivuse timphikiswano mayelana netinkinga tenhlalo kanye netepolitiki, lokufaka ekhatsi tinkinga letiphatselene nemalungelo ebantfu, buhlanga kanye nekungalingani kwetemnotfo.

Nobe kunjalo, bantfu labanyenti bayakujabulela kubukela imidlalo letintsa emave lehlukahlukene lenjengendzebe yemhlaba. Kodvwa lemidlalo ayikhoni kwenta kutsi kube nebunye lobuhlala njalo njengobe bantfu bafisa. Esikhundleni saloko, esikhatsini lesinyenti lemidlalo yenta kutsi kube netimo liBhayibheli lelitsi betiyoba sibonakaliso sesikhatsi lesibitwa ngekutsi ‘ngemalanga ekugcina’—2 KuThimothi 3:1-5.

Litsemba sibili mayelana nebunye emhlabeni

LiBhayibheli licuketse litsemba sibili lelimayelana nebunye emhlabeni. Letsembisa kutsi bonkhe bantfu emhlabeni batawuba ngephansi kwahulumende wasezulwini lobitwa ngekutsi ‘nguMbuso waNkulunkulu.’—Lukha 4:43; Matewu 6:10.

INkhosi yaloMbuso, Jesu Khristu, itawucinisekisa kutsi kuba nekuthula emhlabeni wonkhe. LiBhayibheli litsi:

• “Bantfu labalungile batawuphumelela, kwandze kuthula.”—Tihlabelelo 72:7.

• “Itawukhulula lohluphekile lokhalela lusito . . . Itawubakhulula ekucindzetelweni nasebudloveni.”—Tihlabelelo 72:12, 14.

Ngisho nalamuhla, timfundziso taJesu setivele tihlanganise tigidzi tebantfu emaveni langu-239. Labantfu bafundze indlela yekuncoba inzondo. Kuze utfole lokwengetiwe, fundza luchungechunge lwetihloko letingephansi kwalesitsi “Singayincoba Inzondo.”