Indlela Nkulunkulu Lanakekela Ngayo Bantfu Labangeva Etindlebeni

Lamuhla, kunebantfu labangeva etindlebeni labangetulu kwa-70 million emhlabeni wonkhe. Lokubuhlungu kutsi bantfu labangeva etindlebeni bavame kuphatfwa kabi, njengobe kuvetwa ngulemibiko lelandzelako:

• “Emhlabeni wonkhe, emalungelo ebantfu labangeva etindlebeni nobe labangeva kahle ayanyatseleka.”​—I-National Association of the Deaf (U.S.).

• “Emaveni lasatfutfuka, bantfu labangeva etindlebeni basemkhatsini webantfu labahlupheka kakhulu emhlabeni wonkhe, futsi kumatima kutsi batfole imfundvo lekahle, imisebenti lekahle kanye nalokunye kwatiswa.”​—I-World Federation of the Deaf.

Nkulunkulu utiva njani ngebantfu labangeva etindlebeni? LiBhayibheli litsini ngabo? BoFakazi BaJehova babasita njani bantfu labangeva etindlebeni lamuhla?

Nkulunkulu Utiva Njani Ngebantfu Labangeva Etindlebeni?

LiBhayibheli liveta kutsi Jehovaa Nkulunkulu uyabakhatselela bantfu labangeva etindlebeni. Akafuni babandlululwe kodvwa ufuna kutsi nabo balutfole lwati loluseBhayibhelini.

UmBhalo: “Ungamcalekisi umuntfu longeva etindlebeni.”​—Levithikhusi 19:14.

UmBhalo: “Nkulunkulu akakhetsi.”​—Imisebenti 10:34.

UmBhalo: “Jesu wahamba . . . , ashumayela tindzaba letimnandzi letimayelana neMbuso.”​—Matewu 9:35.

UmBhalo: Jesu wenta ‘labangeva etindlebeni beva, nalabangakhoni kukhuluma bakhuluma.’​—Makho 7:37.

UmBhalo: Tindlebe “talabangeva tiyawuvuleka.”​—Isaya 35:5.

Lokukushoko: Jehova waphrofetha kutsi bantfu labangeva etindlebeni batawuva.​—Isaya 29:18.

BoFakazi BaJehova Babasita Njani Bantfu Labangeva Etindlebeni Lamuhla?

BoFakazi BaJehova bashumayela umlayeto waNkulunkulu loniketa litsemba kubantfu labangeva etindlebeni emhlabeni wonkhe. Yini lesiyentako kuze sifeze loku? Sikhicita emaBhayibheli kanye nema-video ekudadisha liBhayibheli ngetilwimi tetandla letingetulu kwa-100. Sisita bantfu batfole lwati ngeliBhayibheli siphindze sihlele nemihlangano yebuKhristu yelulwimi lwetandla. Konkhe loku kutfolakala mahhala kulabo labafuna lusito lwaNkulunkulu. Leni? Kungobe Jesu wasiyala watsi: “Niphiwe mahhala, nani phanini mahhala.”​—Matewu 10:8.

Ungatfola tonkhe letintfo lesitikhicitako ku-internet nobe utitsatsele tona ngentfo yakho yebuchwephesha kunati tindzawo letilandzelako:

JW.ORG. Chafata luphawu lwetilwimi lolusetulu kunobe nguliphi likhasi lale-website kuze utfole tintfo letinyenti ngelulwimi lwetandla lolufunako.

JW Library Sign Language app. Tifakele le-app entfweni yakho yebuchwephesha futsi utitsatsele nobe ubukele ema-video elulwimi lwetandla.

Ngutiphi Tintfo Lesitisebentisako Kuze Sifundzise Bantfu NgeliBhayibheli?

LiBhayibheli ngelulwimi lwetandla. Lihumusho Lemhlaba Lomusha LwemiBhalo Lengcwele Ngelulwimi Lwetandla LwaseMelika, beliliBhayibheli lekucala leliphelele lelulwimi lwetandla emhlabeni wonkhe. Lihumusho Lemhlaba Lomusha leliphelele nobe incenye yalo seliyatfolakala ngetilwimi tetandla letinyenti, futsi njalo ngemnyaka kuhlale kwengetwa letinye tilwimi. (Kuze ubone luhla lwetilwimi letitfolakalako nobe ubukele liBhayibheli ku-internet, buka libhokisi lelitsi “Lihumusho Lemhlaba Lomusha Ngelulwimi Lwetandla.”)

• Kuze ufundze ngemsebenti lowentiwako kuze kukhicitwe liBhayibheli ngelulwimi lwetandla bukela i-video letsi Lihumusho Lemhlaba Lomusha Leliphelele Seliyatfolakala Ngelulwimi Lwetandla LwaseMelika.

• Kuze ukujabulele kufundza liBhayibheli, tifakele i-JW Library Sign Language app entfweni yakho yebuchwephesha. Le-app yenta kube melula kutsi utikhetsele emavesi lofuna kuwafundza ngelulwimi lwetandla.

• Dmytro naVita babatali labangeva etindlebeni futsi banebantfwana labevako. Bona indlela umndeni wabo lozuza ngayo ngekubukela liBhayibheli onkhe malanga ngelulwimi lwetandla.

Ema-video lafundzisa ngeliBhayibheli. BoFakazi BaJehova bakhicite ema-video elulwimi lwetandla lasite bantfu bacondza liBhayibheli futsi basebentisa seluleko salo,

• Emshadweni kanye nasemndenini

• Kubantfu labasha

• Kubatfwana

Kudadisha liBhayibheli usitwa ngulotsite. Fundza umlayeto weliBhayibheli ngelulwimi lwetandla usitwa ngulotsite, kutawuya ngawe kutsi ufuna nifundze njani, nitawushesha nobe nifundze kancane kancane. Ungacela bakukhombise kutsi nitawufundza njani.

Jeson Senajonon uhlala ePhilippines. Tfola kutsi kudadisha liBhayibheli nalotsite kumsite njani waba nebuhlobo lobuhle naNkulunkulu.

Mario Antúnez abengumfundisi kulelinye lisontfo eHonduras. Fundza kutsi watitfola njani timphendvulo temibuto yakhe lemayelana neliBhayibheli, njengobe kuchazwe endzabeni yakhe lenesihloko lesitsi, “Nganginemibuzo Eminingi Ngingenazo Izimpendulo,” letfolakala ngesiZulu.

Imihlangano kanye naleminye imibutsano. Sinemabandla kanye nemacembu elulwimi lwetandla emhlabeni wonkhe lapho kuhlangana khona bantfu labangeva etindlebeni kuze bafundze futsi bakhonte Nkulunkulu njalo ngeliviki. Njalo ngemnyaka sihlela imibutsano lemikhulu yekufundza liBhayibheli ngelulwimi lwetandla. Kulemihlangano kanye nakulemibutsano siphindze sihumushele bantfu labangeva etindlebeni futsi labangaboni nasemehlweni (tactile interpreting). Siphindze sente tincwadzi te-braille letitfolakala mahhala.

• Tfola libandla lelidvute nalapho uhlala khona.

• Tfola lokunyenti ngemihlangano yetfu yesifundza neyesigodzi lebakhona njalo ngemnyaka.

• Bani khona emkhosini wetfu lobalulekile wekukhumbula kufa kwaJesu.

José Luis Ayala uhlala eMexico. Watalwa angeva etindlebeni futsi ngekuhamba kwesikhatsi wase akasaboni nasemehlweni. Tfola kutsi wasitwa njani kutsi abe ngumfundzisi weliBhayibheli lophumelelako.