Secwayiso Ngebungoti Bekusebentisa Tekuchumana Kubantfu Labasha—Litsini LiBhayibheli?

NgaMay 23, 2023, sisebenti lesisesikhundleni lesisetulu kutemphilo e-United States secwayise bantfu ngemiphumela lemibi bantfu labasha labanyenti lababhekana nayo ngenca yekusebentisa tinkhundla tekuchumana.

• “Ngisho nobe tinkhundla tekuchumana tingaba lusito kulabanye bantfwana nebantfu labasha, kunebufakazi lobunyenti bekutsi letinkhundla tekuchumana tingalimata tingcondvo tebantfwana nebantfu labasha futsi tibeke kuphila kwabo engotini.”—I-Social Media and Youth Mental Health: The U.S. Surgeon General’s Advisory, 2023.

Le-advisory yaveta imiphumela yeluhlolo lesenta sikhatsateke.

• Bantfu labasha labaneminyaka lesuka ku-12 kuya ku-15 “labacitsa sikhatsi lesingaba ngetulu kwema-awa lamatsatfu etinkhundleni tekuchumana njalo ngelilanga babhekene nengoti lephindvwe kabili yekulimala kwengcondvo, lokufaka ekhatsi timphawu tekucindzeteleka kanye nekukhatsateka.”

• Lapho bantfu labasha labaneminyaka lengu-14, “basebentisa kakhulu tinkhundla tekuchumana, abakhoni kulala kahle, bayahlukunyetwa kuletinkhundla, abayitsandzi indlela lababukeka ngayo, batikhandza batintfo letingenamsebenti walutfo futsi babanjwa kucindzeteleka. Loku kuvamise kwenteka kakhulu emantfombataneni kunasebafaneni.”

Batali bangabavikela njani bantfwana babo kuletingoti? LiBhayibheli lisiniketa teluleko lesingatisebentisa.

Lokungentiwa batali

Kwati lokwentiwa ngumntfwanakho. Njengobe ungumtali, cabanga ngetingoti tekusebentisa tekuchumana bese uyancuma kutsi umntfwanakho angatisebentisa yini nobe cha.

• Simiso seliBhayibheli: “Cecesha umntfwana ngendlela lokufanele aphile ngayo.”—Taga 22:6.

• Kuze utfole lokunyenti fundza sihloko lesitsi “Should My Child Use Social Media?,” lesitfolakala ngesiNgisi.

Nangabe umvumela umntfwanakho kutsi asebentise tekuchumana, caphela tingoti langahle abhekane nato futsi ukwati loko lokwentiwa ngumntfwanakho kuletinkhundla. Kanjani?

Vikela umntfwanakho etintfweni letingamlimata. Cecesha umntfwanakho kutsi akhone kubona futsi abalekele tintfo letingamlimata.

• Simiso seliBhayibheli: “Bugwadla nayo yonkhe inhlobo yekungcola kanye nebukhali akungaphatfwa ngisho nekuphatfwa emkhatsini wenu, . . . kanjalo nekutiphatsa lokulihlazo, inkhulumo lengenangcondvo, nekuhhalatisa lokwenyanyekako.”—Kubase-Efesu 5:3, 4.

• Kuze utfole longakwenta, fundza sihloko lesitsi “Teaching Your Teenager Social Media Safety,” lesitfolakala ngesiNgisi.

Beka imincele. Sibonelo nje, beka imitsetfo yekutsi tingasetjentiswa nini tinkhundla tekuchumana futsi tingasetjentiswa sikhatsi lesingakanani.

• Simiso seliBhayibheli: “Caphelisisani kutsi indlela lenihamba ngayo . . . ifana neyebantfu labahlakaniphile, nisisebentise kahle sikhatsi senu.”—Kubase-Efesu 5:15, 16.

• Sebentisa umdvwebo wabopopayi lonesihloko lesitsi Hlakanipha Nawusebentisa Tekuchumana kuze usite umntfwanakho abone kutsi kudzingeke ngani kutsi kubekwe imincele.