Kuswelakala Kwekudla Emhlabeni Wonkhe Kubangwa Yimphi Kanye Nekushintja Kwesimo Selitulu—Litsini LiBhayibheli?

Imphi lese-Ukraine kanye nekushintja kwesimo selitulu kuyachubeka kubanga kuswelakala kwekudla emhlabeni wonkhe. Lesimo sibi kakhulu emaveni laphuyile lapho kumatima khona kutsi bantfu batfole kudla lokwenele.

• “Kukhicitwa kwekudla kanye nekutfolakala kwako kuphatanyiswa timphi, kugucuka kwesimo selitulu, kwenyuka kwentsengo yagesi kanye nalokunye.”​—António Guterres, lowengamele inhlangano yaMhlabuhlangene, July 17, 2023.

• “Tati titsi njengobe iRussia ivimba i-Ukraine utsi itfumele kudla lokutinhlavu emhlabeni wonkhe, loku kutawubanga kwenyuka kwentsengo yekudla emaveni laphuyile, ikakhulukati eNyakatfo ye-Afrika kanye naseMiddle East.”​—I-Atalayar.com, July 23, 2023.

Cabanga ngaloko liBhayibheli lelikushoko ngekuswelakala kwekudla kanye nelikusasa.

LiBhayibheli laphrofetha ngekuswelakala kwekudla

• Jesu watsi: “Sive sitawuvukela lesinye sive, nembuso uvukele lomunye umbuso, futsi kutawuba khona indlala.”​—Matewu 24:7.

• Incwadzi yeliBhayibheli yeSembulo ichaza bagibeli bemahhashi labane labangekwemfanekiso. Lomunye walabagibeli umelela imphi. Ulandzelwa ngulomunye lomelela indlala nobe sikhatsi lapho khona kudla kutawuba sesilinganisweni, nobe kudule kakhulu. LomBhalo utsi: “Ngabona lihhashi lelimnyama; lobekaligibele bekaphetse sikali esandleni sakhe. Ngeva lobekunjengelivi . . . kutsi: ‘Ilitha yakolo ngadenariyo, nemalitha lamatsatfu ebhali ngadenariyo.’”​—Sembulo 6:5, 6.

Letiphrofetho letimayelana nekuswelakala kwekudla tiyagcwaliseka esikhatsini salamuhla, lokusikhatsi liBhayibheli lelisibita ngekutsi ‘ngemalanga ekugcina.’ (2 KuThimothi 3:1) Kuze ufundze lokunyenti ‘ngalamalanga ekugcina’ kanye nebagibeli bemahhashi labane lokukhulunywa ngabo encwadzini yeSembulo, bukela i-video letsi Kusukela Nga-1914, Tintfo Tashintja Emhlabeni futsi ufundze nesihloko lesitsi “Bobani Labagibeli Bemahhashi Labane?”

Lingasisita njani liBhayibheli?

• LiBhayibheli lineteluleko lesingatisebentisa letingasisita sibhekane netimo letimatima letifaka ekhatsi kwenyuka kwentsengo yekudla nobe kuswelakala kwekudla. Fundza ngetibonelo taloko esihlokweni lesitsi “Indlela Ongaphila Ngayo Ngokuncane,” lesitfolakala ngesiZulu.

• LiBhayibheli liphindze lisinikete litsemba lekutsi tintfo titawuba ncono. Lisetsembisa kutsi kutawuba nesikhatsi lapho khona “kutawuba nenala yekudla emhlabeni” futsi wonkhe umuntfu utawuba nekudla lokwenele. (Tihlabelelo 72:16) Kuze ufundze lokunyenti ngalesetsembiso selikusasa nekutsi yini lengakwenta usetsembe, fundza sihloko lesitsi “Litsemba Sibili Ngelikusasa Lelihle.”