Ngubani Umsunguli Wenkholo YaboFakazi BaJehova?

Inhlangano yaboFakazi BaJehova yesikhatsi sanyalo icale ekupheleni kwelikhulu lesi-19 leminyaka. Ngaleso sikhatsi, licembu lelincane lebafundzi beliBhayibheli lebelihlala ePittsburgh, ePennsylvania, eMelika, lacala kuhlolisisa liBhayibheli nekulihlatiya. Bacatsanisa timfundziso temasontfo naloko lokufundziswa liBhayibheli. Lacala kushicilela labelikufundza etincwadzini, emaphephandzabeni nakumagazini Sicongosekulindza—Lesimemetela UMbuso WaJehova.

Kulelicembu lebafundzi beliBhayibheli labetsembekile, bekunendvodza libito layo kunguCharles Taze Russell. Nanobe bekungu-Russell lobekacondzisa emsebentini wekufundzisa ngeliBhayibheli ngaleso sikhatsi futsi angumhleli we-Sicongosekulindza, akusuye longumsunguli walenkholo. Umgomo waRussell nalabanye Bafundzi BeliBhayibheli, njengobe lelicembu belibitwa kanjalo ngaleso sikhatsi, bekukusekela timfundziso taJesu Khristu nekwenta loko lebekwentiwa libandla lemaKhristu ekucala. Njengobe kunguJesu uMsunguli weBuKhristu, simtsatsa njengemsunguli wenhlangano yetfu.—Kholose 1:18-20.