Umsebenti WaBoFakazi BaJehova Usekelwa Njani Ngekwetimali?

Umsebenti wetfu usekelwa ngeminikelo leyentiwa boFakazi BaJehova labasemhlabeni wonkhe.a Kuba nemabhokisi emnikelo etindzaweni tetfu tekukhontela, kuphindze kube naletinye tindlela tekunikela letitfolakala kule-website encenyeni letsi Donations. Tikhona naletinye tindlela umuntfu langatisebentisa kuze anikelele umsebenti wemhlaba wonkhe, tidzingo telibandla nobe kokubili.

BoFakazi BaJehova abakukhokhi kwelishumi. Abakalelwa kutsi banikele ngamalini nobe banikele ngencenye letsite yemali labayiholako. (2 KubaseKhorinte 9:7) Kute lipulete lemnikelo nobe imali loyikhokhako kuze ungene emihlanganweni yetfu, futsi kute imali loyikhokhako kuze ubhajatiswe, ungcwatjwe, ushadiswe nobe wentelwe leminye nje imisebenti yenkholo. Asiyakhi imali ngekutsi sibhake kuze sitsengise, sitsengise letinye tintfo, sibe nemidlalo yekuncintisana, nobe letinye nje tintfo letifana naleti, futsi asihambi sicela iminikelo. Imininingwane yalabanikelako igcinwa iyimfihlo. (Matewu 6:2-4) Ema-websites etfu kanye netincwadzi tetfu akukhangisi ngalokutsite lokungasenta sibhadalwe.

Onkhe emabandla aBoFakazi BaJehova etfula umbiko wetimali njalo ngenyanga, futsi wonkhe muntfu uvumelekile kutsi abekhona kuyo. Emarekhodi etimali elibandla ngalinye ahlolwa njalo kuze kucinisekiswe kutsi iminikelo isetjentiswa kahle.​—2 KubaseKhorinte 8:20, 21.

Tindlela Tekunikela

• Emabhokisi emnikelo: Ungafaka umnikelo wakho nobe lisheke emabhokisini emnikelo lasemaHholweni eMbuso, emaHholweni emhlangano kanye nakuletinye tindzawo lapho kubanjelwe khona imihlangano yetfu.

• Iminikelo leyentiwa nge-internet: Emaveni lamanyenti ungasebentisa incenye letsi “Donate to Jehovah’s Witnesses” kuze unikele usebentisa ema-credit card, ema-debit card, ema-bank transfers, kanye naletinye tindlela tebuchwephesha.b Labanye BoFakazi ‘babekela eceleni lokutsite’ njalo ngenyanga ngekutsi bahlele kutsi kutsatfwe imali letsite kusebentjentiswa letindlela tebuchwephesha letibalwe lapha ngenhla.​—1 KubaseKhorinte 16:2.

  

• Kupha lokuhlelwe kusenesikhatsi: Letinye tindlela tekunikela tidzinga kuhlelwa kusenesikhatsi nobe tidzinge kutsi kukhulunyiswane nebameli. Lokuhlela kungakusita kutsi utisebentise kahle tinzuzo temtselo eveni lokulo. Bantfu labanyenti basitakele ngekwati kabanti ngetipho labangatipha lotsite nabasaphila, nobe tiniketwe loyo lamkhetsile nasekafile. Kuze utfole lokunyenti, sicela uchumane nelihhovisi leligatja laBoFakazi BaJehova lelidvutane nawe nawufuna kunikela usebentisa letindlela letilandzelako:

  • bank accounts

  • insurance and retirement plans

  • real estate

  • stocks and bonds

  • wills and trusts

Kuze utfole lokunyenti ngetindlela tekunikela longatisebentisa endzaweni yakini, buka incenye letsi “Donate to Jehovah’s Witnesses” kule-website.