Kulandzelana Kwetikhatsi Netentakalo LetiseBhayibhelini Kuvetani Nga-1914?

Lokushiwo liBhayibheli

Kulandzelana kwetikhatsi netentakalo letiseBhayibhelini kuveta kutsi uMbuso waNkulunkulu wacala kubusa ezulwini nga-1914. Loku kuvela kulesiphrofetho lesikuDanyela sehluko 4.

Sikhuluma ngani lesiphrofetho. Nkulunkulu wabangela iNkhosi Nebukhadnezari yaseBhabhulona kutsi iphuphe ngesihlahla lesikhulu lesajutjwa. Siphunti saso sentiwa kutsi singakhuli kuze kwendlule “tikhatsi letingu-7,” ngemuva kwaloko besitawuphindze sikhule.​—Danyela 4:1, 10-16.

Kugcwaliseka kwekucala kwalesiphrofetho. Lesihlahla lesikhulu besimelela iNkhosi Nebukhadnezari. (Danyela 4:20-22) ‘Wajutjwa’ ngalokungumfanekiso ngekutsi ahanjelwa yingcondvo kwesikhashana futsi angasabi yinkhosi iminyaka lengu-7. (Danyela 4:25) Ngesikhatsi Nkulunkulu amphilisa, Nebukhadnezari waphindze waba yinkhosi futsi wavuma kutsi nguNkulunkulu umbusi.​—Danyela 4:34-36.

Bufakazi bekutsi lesiphrofetho sinekugcwaliseka lokukhulu. Injongo yalesiphrofetho bekukutsi “bantfu labaphilako bati kutsi Losetikwako Konkhe uneligunya leliphakeme etikwemibuso yebantfu, nekutsi bukhosi ubunika nobe ngubani lafuna kumnika futsi emandla ekubusa uwanika ngisho nemuntfu lophansi kunabo bonkhe.” (Danyela 4:17) Nkulunkulu bekafuna kuniketa Nebukhadnezari lotigcabhako bukhosi yini? Cha, ngobe ngaphambilini Nkulunkulu bekamnikete lelinye liphupho lelisiphrofetho lebeliveta kutsi kute umbusi lokufaka ekhatsi naye Nebukhadnezari, lebekangaba yinkhosi. Kunaloko, Nkulunkulu “utawubeka umbuso longeke uze ubhujiswe.”​—Danyela 2:31-44.

Ngaphambilini, Nkulunkulu bekabeke umbuso lebewumelela kubusa kwakhe emhlabeni: lokusive saka-Israyeli wasendvulo. Nkulunkulu wavumela kutsi lombuso ‘ubhujiswe’ ngobe babusi bawo bebangaketsembeki, kodvwa waphrofetha kutsi umbuso utawuniketa “loyo lonelilungelo lelisemtsetfweni.” (Hezekeli 21:25-27) LiBhayibheli liveta Jesu Khristu njengaloyo lonelilungelo lelisemtsetfweni lekutfola lombuso waphakadze. (Lukha 1:30-33) Ngalokungafani naNebukhadnezari, Jesu ‘unemoya lophansi,’ njengobe bekuphrofethiwe.​—Matewu 11:29.

Simelela ini lesihlahla lokukhulunywa ngaso kuDanyela sehluko 4? Ngaletinye tikhatsi, eBhayibhelini tihlahla timelela bukhosi. (Hezekeli 17:22-24; 31:2-5) Ekugcwalisekeni lokukhulu kwalesiphrofetho lesikuDanyela sehluko 4, lesihlahla lesikhulu simelela bukhosi baNkulunkulu.

Kusho ini kujutjwa kwalesihlahla? Njengobe lokujutjwa kwalesihlahla kusho kuphazamiseka kwekubusa kwaNebukhadnezari, kuphindze kumelele nekuphazamiseka kwekubusa kwaNkulunkulu emhlabeni. Loku kwenteka ngesikhatsi Nebukhadnezari abhubhisa iJerusalema, lapho emakhosi aka-Israyeli bekahlala khona “esihlaweni sebukhosi saJehova” kuze amelele Nkulunkulu.​—1 Tikhronike 29:23.

Timelela ini “tikhatsi letingu-7”? ‘Letikhatsi letingu-7’ timelela sikhatsi lapho Nkulunkulu avumela khona tive kutsi tibuse emhlabeni ngaphandle kwekuphazanyiswa ngumbuso lobekwe nguye. ‘Letikhatsi letingu-7’ tacala nga-October 607 B.C.E., ngalesikhatsi iJerusalem ibhujiswa yiBhabhulona, ngekusho kwekulandzelana kwetikhatsi lokuseBhayibhelini.a​—2 Emakhosi 25:1, 8-10.

Tisikhatsi lesidze kangakanani “tikhatsi letingu-7”? Angeke tibe yiminyaka lengu-7 njengobe kwenteka kuNebukhadnezari. Jesu waveta imphendvulo ngesikhatsi atsi “tive titayigcobagcoba iJerusalema, [lemelela kubusa kwaNkulunkulu] kuze kube sikhatsi lesibekiwe setive.” (Lukha 21:24) “Sikhatsi lesibekiwe setive,” lokusikhatsi lapho Nkulunkulu avumela khona kutsi ‘tive tigcobagcobe,’ umbuso wakhe siyafana ‘netikhatsi letingu-7’ lokukhulunywa ngato kuDanyela sehluko 4. Loku kusho kutsi ‘letikhatsi letingu-7’ betichubeka ngisho nangesikhatsi Jesu alapha emhlabeni.

LiBhayibheli liyasiniketa indlela yekubona budze ‘baletikhatsi letingu-7.’ Litsi “tikhatsi” letintsatfu nehhafu tilingana nemalanga langu-1 260, ngako “tikhatsi letingu-7” tilingana netikhatsi letintsatfu nehhafu nawutiphindze kabili, nobe emalanga langu-2 520. (Sembulo 12:6, 14) Ngekusebentisa umtsetfo longekwesiphrofetho lotsi ‘lilanga linye limelela umnyaka,’ emalanga langu-2 520 amelela iminyaka lengu-2 520. Ngako, “tikhatsi letingu-7,” nobe iminyaka lengu-2 520, beyitawuphela nga-October 1914.​—Numeri 14:34; Hezekeli 4:6.