BoFakazi BaJehova Balishintjile Yini Libhayibheli Kuze Livumelane Naloko Labakukholelwako?
Cha asikalishintji. Kunaloko, ngesikhatsi sitfola kutsi tinkholelo tetfu ativumelani ngalokuphelele naloko lokushiwo liBhayibheli, satishintja.
Ngaphambi kwekutsi sicale kuhumusha i-New World Translation of the Holy Scriptures nga-1950, sahlolisisa liBhayibheli. Sasebentisa onkhe emahumusho latfolakalako, sase sikela kuwo loko lesikukholelwako. Ase sicoce ngetinkholelo letimbalwa BoFakazi BaJehova lebebasolo batikholelwa, bese uyatincumela kutsi tiyavumelana yini naloko lokushiwo liBhayibheli.
Lesikukholelwako: Nkulunkulu akasuye Mtsatfu Amunye. Magazini we-Zion’s Watch Tower, waJuly 1882 watsi: “Njengobe bantfu labafundza tincwadzi tetfu bati kutsi siyakholelwa kuJehova, kuJesu nasemoyeni longcwele, asivumelani ngalokuphelele nemfundziso lengakasekelwa emiBhalweni letsi kunaboNkulunkulu labatsatfu labangumuntfu munye, nobe kutsi Nkulunkulu munye wakha bantfu labatsatfu.”
Loko lokushiwo liBhayibheli: “Jehova Nkulunkulu wetfu unguJehova munye.” (Dutheronomi 6:4, i-The Holy Bible, yaRobert Young) “KunaNkulunkulu munye, longuBabe, tonkhe tintfo letikhona ngaye, futsi natsi sivela kuye; kuneNkhosi yinye, Jesu Khristu, tonkhe tintfo letaba khona ngayo, natsi lesikhona ngayo.” (1 Khorinte 8:6, i-American Bible Union Version) Jesu watsi: “Babe mkhulu kunami.”—Johane 14:28, i-Douay-Rheims Version.
Lesikukholelwako: Kute kuhlushwa kwaphakadze esihogweni semlilo. Magazini we-Zion’s Watch Tower waJune 1882 lebewunesihloko lesitsi “Inkhokhelo Yesono Kufa,” wacaphuna KubaseRoma 6:23 ku-King James Version, watsi: “Lamavi acacile futsi amelula. Kuyamangalisa kutsi bantfu labanyenti labatsi liBhayibheli liliVi laNkulunkulu bachubeka baphikisana nalamavi laliciniso, futsi ngekuciniseka batsi bayakholelwa kutsi liBhayibheli litsi inkhokhelo yesono kuhlushwa kwaphakadze.”
Loko Lokushiwo LiBhayibheli: “Umuntfu lowonako nguye loyakufa.” (Hezekeli 18:4, 20, i-King James Version) Sijeziso sekugcina salabo labamelene naNkulunkulu asisiko kuhlushwa kwaphakadze, kodvwa ‘sikubhujiswa kwaphakadze.”—2 KubaseThesalonika 1:9, i-King James Version.
Lesikukholelwako: UMbuso waNkulunkulu unguhulumende sibili, awusiso simo senhlitiyweni. Mayelana neMbuso waNkulunkulu, magazini waDecember 1881 we-Zion’s Watch Tower watsi: “Kumiswa kwaloMbuso kutawufaka ekhatsi kususwa kwayo yonkhe imibuso lesemhlabeni.”
Loko Lokushiwo LiBhayibheli: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”—Danyela 2:44, King James Version.
BoFakazi BaJehova betsembele eHumushweni Lemhlaba Lomusha yini kutsi lisekele tikholelo tabo?
Cha, ngobe siyawasebentisa nalamanye emahumusho lamanyenti eliBhayibheli emsebentini wetfu wekushumayela. Ecinisweni, nanobe sibanika mahhala bantfu emakhophi e-LiHumusho Lemhlaba Lomusha njengencenye yeluhlelo lwekuchuba tifundvo teliBhayibheli lolumahhala, siphindze sikujabulele kufundza nalabo labakhetsa kusebentisa lamanye emahumusho eliBhayibheli.