Yini Leyenta BoFakazi BaJehova Bangatigubhi Tinsuku Tekutalwa?

Tsine BoFakazi BaJehova asitigubhi tinsuku tekutalwa ngobe sikholelwa kutsi kutigubha akumjabulisi Nkulunkulu. Ngisho nobe liBhayibheli lingakulahli ngalokucondzile kugubha tinsuku tekutalwa, liyasisita sicabangisise ngetintfo letentiwa kulemicimbi futsi sicondze nembono waNkulunkulu ngato. Cabanga ngetintfo letine letimayelana naletinsuku tekutalwa kanye netimiso teliBhayibheli letikhuluma ngato.

1. Kugubha tinsuku tekutalwa kunemsuka wemacaba. Ngekusho kwe-Funk & Wagnalls Standard Dictionary of Folklore, Mythology, and Legend, lokugujwa kwetinsuku tekutalwa kwacala enkholelweni yekutsi njalo ngelilanga umuntfu latalwa ngalo “imimoya lemibi itfola litfuba lekumhlasela” futsi “kuba khona kwebangani bamfisele lokuhle kuyamvikela.” Incwadzi letsi The Lore of Birthdays itsi, ngekusho kwe-“the mystic science of astrology,” endvulo, kubhalwa phansi kwetinsuku tekutalwa bekubalulekile kuze isite ekukhetseni inkhanyeti lecondzana nelusuku lwemuntfu lwekutalwa. Lencwadzi iphindze itsi “emakhandlela lakhanyiswa kulomcimbi welusuku lwekutalwa, etinganekwaneni kukholelwa kutsi anemlingo wekukuniketa lokufisako.”

   Nobe kunjalo liBhayibheli liyakulahla kusebentisa umlingo, kuphengula, kusebentelana nemimoya, nobe “tintfo letinjalo.” (Dutheronomi 18:14; KubaseGalathiya 5:19-21) Ecinisweni sizatfu lesenta Nkulunkulu walahla lidolobha laseBhabhulona yasendvulo kutsi takhamiti takhona betifundza tinkhanyeti lokungulolunye luhlobo lwekuphengula. (Isaya 47:11-15) Tsine BoFakazi BaJehova asihlali sinake imisuka yayo yonkhe imicimbi, kodvwa lapho imiBhalo iniketa ticondziso leticacile, siyatilalela.

2. EmaKhristu angelikhulu lekucala akazange atigubhe tinsuku tekutalwa. I-The World Book Encyclopedia itsi, “bebatsatsa konkhe kugujwa kwetinsuku tekutalwa njengalokunemsuka wemacaba.” LiBhayibheli likhombisa kutsi baphostoli kanye nalabanye labafundziswa nguJesu ngalokucondzile babekela onkhe emaKhristu sibonelo lokufanele asilandzele.​—2 KubaseThesalonika 3:6.

3. Lokukuphela kwemcimbi emaKhristu lokufanele awugubhe, lusuku lwekufa kwaJesu, hhayi lwekutalwa. (Lukha 22:17-20) Loku akumangalisi ngobe liBhayibheli litsi, “nelilanga lekufa lincono kunelilanga lekutalwa.” (Umshumayeli 7:1) Nasekatawukufa, Jesu watakhela ligama lelihle naNkulunkulu, lokwenta kutsi kufa kwakhe kubaluleke kakhulu kunelilanga lakhe lekutalwa.​—KumaHebheru 1:4.

4. LiBhayibheli alikhulumi ngesikhonti saNkulunkulu lesake sagubha lilanga laso lekutalwa. Loku akusilo liphutsa ngobe liyakhuluma ngebantfu lababili lebebangamkhonti Nkulunkulu labagubha emalanga abo ekutalwa. Nobe kunjalo, akukhulunywa kahle ngayo yomibili lemicimbi.​—Genesisi 40:20-22; Makho 6:21-29.

Bantfwana baboFakazi bativa bashiyeka yini ngenca yekungawagubhi emalanga ekutalwa?

Njengabo bonkhe batali labakahle, boFakazi bahlale bakhombisa bantfwana babo kutsi bayabatsandza ngekubapha tipho baphindze bente nemibutsano kuze bajabule. Betama kulandzela sibonelo saNkulunkulu lobapha nobe nini bantfwana bakhe tipho letinhle. (Matewu 7:11) Bantfwana babo Fakazi abativa balahlekelwa, njengobe kuvetwa ngunaku labakushoko:

• “Kumnandzi kakhulu kuphiwa sipho ungakasigadzi.”​—Tammy, loneminyaka lengu-12.

• “Ngisho nobe ngingatitfoli tipho ngelilanga lami lekutalwa, batalali bami bayangitsengela tipho ngalamanye emalanga. Nguloko lengikutsandzako ngobe ngisuke ngingakasigadzi.”​—Gregory loneminyaka lengu-11.

• “Ucabanga kutsi imizuzwana lembalwa nje yekudla emakhekhe nekuhlabela ingoma, yiphathi? Wota ekhaya kitsi utobona iphathi sibili!”​—Eric, loneminyaka lengu-6.