Litsini LiBhayibheli Ngekufaka I-makeup Nekwekugaba?

Lokushiwo liBhayibheli

Nanobe liBhayibheli lingakhulumi lokunyenti ngalendzaba, alikwaleli kufaka i-makeup, kugaba lokutsite nobe kutihlobisa. Kunaloko liBhayibheli likhutsata “kutihlobisa ngemoya wekuthula nalophansi,” kunekunaka kakhulu kutihlobisa kwangephandle.​—1 Phetro 3:3, 4.

LiBhayibheli alikwaleli kutihlobisa

• Bafati labetsembekile lokukhulunywa ngabo eBhayibhelini bebatihlobisa. Rebheka, lowashada nendvodzana ya-Abrahama, Isaka, watihlobisa ngendandatho yeligolide lefakwa ekhaleni, ngemabhengela eligolide kanye nangalokunye kwekugaba lokudulile lebekakuphiwe ngubabetala wakhe. (Genesisi 24:22, 30, 53) Na-Esta wemukela “tintfo tekutimonyonga” kuze atilungiselele kuba yinkhosikati yeNkhosi yasePheresiya. (Esta 2:7, 9, 12) Kungenteka letimonyo betifaka ekhatsi “emafutsa ekugcobisa,” nobe “tinhlobonhlobo tetimonyo.”​—New International Version; Easy-to-Read Version.

• LiBhayibheli lisebentisa kwekugaba kuze lente kucatsanisa lokukahle. Sibonelo nje, umuntfu loniketa seluleko lesikahle ufananiswa ‘nelicici leligolide. . . kumuntfu lonendlebe lelalelako.’ (Taga 25:12) Ngendlela lefanako, Nkulunkulu wafananisa indlela laphatsa ngayo sive sema-Israyeli nendvodza legabisa makoti wayo emabhengela, umgaco kanye nemacici. Lokuhlotjiswa kwenta lesive ‘saba sihle kakhulu.’​—Hezekeli 16:11-13.

Lokungasilo liciniso ngekufaka i-makeup nangekwekugaba

Lokungasilo liciniso: Kusebentisa ‘pende wemehlo’ kwaJezebeli, Indlovukazi lembi’ kufakazela kutsi kufaka i-makeup kubi.​—2 Emakhosi 9:30, umbhalo longentasi.

Liciniso: Jezebeli, lebekangumtsakatsi futsi angumbulali, wehlulelwa ngenca yetento takhe letimbi, hhayi ngendlela labukeka ngayo.​—2 Emakhosi 9:7, 22, 36, 37.