BANTFU LABASHA BAYABUTA
Ngingamkhetsa Njani Umuntfu Longaba Sibonelo Lesihle Kimi?
“Nangiba netinkinga esikolweni bengisitwa kucabanga ngemuntfu lengimtsandzako loke waba sesimeni lesifanako. Ngetama kulingisa loyo muntfu. Kuba nemuntfu losibonelo lesihle kwenta kwaba melula kubhekana netimo letimatima.”—Haley.
Kuba nemuntfu losibonelo kuwe kungakusita ugweme tinkinga futsi ufinyelele imigomo yakho. Lokubalulekile kutsi ukhetse umuntfu losibonelo lesihle.
Kubaluleke ngani kutsi ukhetse kahle?
Bantfu lobakhetsa kutsi babe sibonelo kuwe bangayitsintsa indlela lowenta ngayo tintfo.
LiBhayibheli litjela emaKhristu kutsi anake labo labasibonelo, nalitsi: “Njengobe nicabangisisa ngemiphumela yekutiphatsa kwabo, lingisani kukholwa kwabo.”—KumaHebheru 13:7.
Lokungakusita: Njengobe kukhetsa kwakho bantfu labatoba sibonelo kuwe kungakwenta kutsi wente lokuhle nobe lokubi, kubalulekile kukhetsa bantfu labanebuntfu lobuhle hhayi ngoba badvumile nobe balingana nawe.
“Simo sengcondvo semzalwane Adamu kanye nebuntfu bakhe kwangifundzisa lokunyenti. Ngisatikhumbula namanje tintfo letitsite lebekatisho kanye naloko lebekakwenta. Wayitsintsa kakhulu imphilo yami.”—Colin.
Bantfu lobakhetsa kutsi babe sibonelo kuwe bangayitsintsa indlela locabanga ngayo nalotiva ngayo.
LiBhayibheli litsi: “Ningadukiswa. Kutihlanganisa nebantfu lababi kona imikhuba lemihle.”—1 KubaseKhorinte 15:33.
Lokungakusita: Khetsa umuntfu lonebuntfu lobuhle hhayi nje kubukeka kwangephandle. Uma ungenta njalo utawudvumateka.
“Kuhlale uticatsanisa nebantfu labadvumile kukwenta utive ungakabaluleki futsi ungesimuhle. Kungakwenta unake kakhulu indlela lobukeka ngayo.”—Tamara.
Longacabanga ngako: Yini lengaba yinkinga ngekukhetsa bantfu labadvumile nalabahamba embili kutemidlalo kutsi babe sibonelo kuwe?
Indlela lokhetsa ngayo bantfu labatawuba sibonelo kuwe kungakwenta uyifinyelele nobe ungayifinyeleli imigomo yakho.
LiBhayibheli litsi: “Loyo lohamba nalabahlakaniphile naye utawuhlakanipha.”—Taga 13:20.
Lokungakusita: Khetsa bantfu labanebuntfu lobuhle lofise kubulingisa kutsi babe sibonelo kuwe. Njengobe ubuka indlela labenta ngayo tintfo, utawufundza tindlela letingakusita ufinyelele imigomo yakho.
“Kunekutibekela imigomo lengacaci kahle njengalotsi ‘Ngifuna kwenta tintfo ngendlela lekahle,’ ungahle utsi, ‘Ngifuna kwenta tintfo ngendlela lekahle njengaJane. Uhlale afika ngesikhatsi futsi uyenta ngekutimisela yonkhe imisebenti yakhe.’”—Miriam.
Naku lokubalulekile: Nangabe ukhetsa umuntfu losibonelo lesihle, usuke ukhetsa kutsi ufuna kuba luhlobo luni lwemuntfu.
Kulingisa sibonelo lesihle semuntfu losibonelo kuwe kungakwenta usheshe uyifinyelele imigomo yakho!
Indlela yekukhetsa
Ungasebentisa yinye kuletindlela letimbili kuze ukhetse umuntfu longaba sibonelo kuwe.
Ungakhetsa buntfu lofuna kuba nabo bese ufuna umuntfu lomtsandzako lonalobuntfu.
Ungakhetsa umuntfu lomtsandzako bese ubuka buntfu lanabo nawe lofuna kuba nabo.
Lokwekubhalela lokuhambisana nalesihloko kutakusita ukhetse.
Bantfu labangaba sibonelo kuwe kungaba:
Bontsanga yakho. “Ngingatsandza kufana nemngani wami. Uhlale akulungele kunaka labanye bantfu. Kona mncane kunami, kodvwa unebuntfu lobuhle mine lengingenabo futsi loko kungenta ngifune kumlingisa.”—Miriam.
Ngulabadzala kunawe. Kungaba batali bakho nobe labo lokholwa nabo. “Bobabili batali bami basibonelo lesihle kimi. Banebuntfu lobuhle. Ngiyawabona emaphutsa abo, nanobe kunjalo babantfu labetsembekile. Ngifisa kungatsi kungashiwo intfo lefanako ngami nasengimdzala ngangabo.”—Annette.
Bantfu lokukhulunywa ngabo eBhayibhelini. “Kunebantfu lokukhulunywa ngabo eBhayibhelini lengikhetse kutsi babe sibonelo kimi ngenca yetizatfu letehlukahlukene, boThimothi, Ruthe, Jobe, Phetro, nentfombatanyana lengumIsrayeli. Nangifundza lokunyenti ngalabantfu lokukhulunywa ngabo eBhayibhelini, baba bantfu mbamba kimi. Ngikujabulele kufundza tindzaba letikulencwadzi letsi Lingisa Kukholwa Kwabo, kanye ‘ne-Role Model Index’ letfolakala kuletincwadzi letimbili letitsi Intsha Iyabuza—Izimpendulo Ezisebenzayo.”—Melinda.
Lokungakusita: Ungabi nemuntfu munye losibonelo kuwe. Umphostoli Pawula washo naku kumaKhristu lakholwa nawo: “Ninake labo labahamba ngendlela levumelana nesibonelo lesinibekela sona.”—KubaseFiliphi 3:17.
Bewati yini? Nawe ungaba sibonelo kulabanye! LiBhayibheli litsi: “Ngekukhuluma, ngekutiphatsa, ngelutsandvo, ngekukholwa nangekuba msulwa, bani sibonelo kulabetsembekile.”—1 KuThimothi 4:12.
“Ngisho nobe nawe usadzinga kutfutfukisa lobunye buntfu lonabo, usengasita labanye kutsi babe bantfu labancono. Awati kutsi ngubani lokubukile, futsi awati nekutsi loko lokushoko kukutsintsa njani kuphila kwalomunye umuntfu.”—Kiana.