Isaya 41:10—“Ngako-ke Ungesabi, Ngobe Mine Nginawe”

“Ungesabi ngobe mine nginawe. Ungakhatsateki ngobe mine nginguNkulunkulu wakho. Ngitakucinisa, nome kanjani ngitakusita, Nakanjani ngitakubamba ngesandla sami sangesekudla sekulunga.”—Isaya 41:10, Lihumusho Lemhlaba Lomusha.

“Ngako-ke ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite, ngiyakukubamba ngesandla sami sekudla lesilungile.”—Isaya 41:10, LiBhayibheli LesiSwati Lelivamile.

Loko lokushiwo ngu-Isaya 41:10

Jehovaa Nkulunkulu ucinisekisa tikhonti takhe letetsembekile kutsi utatisita ngisho nobe tihlangabetana nanobe ngutiphi tinkinga.

“Nginawe.” Jehova utjela tikhonti takhe kutsi tingesabi ngobe atisitodvwa. Ngenca yekutsi uyakubona kuhlupheka kwato futsi uyayiva nemithantazo yato, kuba ngazutsi ukanye nato.—Tihlabelelo 34:15; 1 Phetro 3:12.

“NginguNkulunkulu wakho.” Jehova wenta tikhonti takhe tibe nemoya lophansi ngekutikhumbuta kutsi usenguNkulunkulu wato futsi usatemukela njengetikhonti takhe. Tingaciniseka kutsi kute lokungavimba Nkulunkulu kutsi atisite.—Tihlabelelo 118:6; KubaseRoma 8:32; KumaHebheru 13:6.

“Ngitakucinisa, nome kanjani ngitakusita, nakanjani ngitakubamba ngesandla sami sangesekudla sekulunga.” Jehova usebentisa imisho lemitsatfu kuze acinisekise tikhonti takhe kutsi nakanjani utatisita. Usebentisa emavi lakha sitfombe engcondvweni, laveta indlela Yena lenta ngayo kuze asite bantfu bakhe nabadzinga lusito. Nakwenteka sikhonti sakhe siwa, Nkulunkulu welula sandla sakhe sangesekudla kuze asibambe.—Isaya 41:13.

Indlela lehamba embili Nkulunkulu lacinisa aphindze asite ngayo tikhonti takhe liVi lakhe, liBhayibheli. (Joshuwa 1:8; KumaHebheru 4:12) Nasi sibonelo, liVi laNkulunkulu lisiniketa seluleko lesingasetjentiswa ngulabo labanetinkinga letinjengekweswela, kugula nobe kufelwa bantfu lababatsandzako. (Taga 2:6, 7) Nkulunkulu angasebentisa nemoya wakhe longcwele nobe emandla akhe lasebentako kuze asite tikhonti takhe tikhone kucabanga kahle futsi tingakhatsateki kakhulu ngetinkinga letihlangabetana nato.—Isaya 40:29; Lukha 11:13.

Loko Isaya 41:10 lakhuluma ngako

Lamavi awadvudvuta emaJuda letsembekile lebekatfunjelwe eBhabhulona. Jehova watsi nasekatawukhululwa, bekutawuba nemibiko ngalotsite lebekatawuncoba tive letibomakhelwane baseBhabhulona futsi ahlasele neBhabhulona. (Isaya 41:2-4; 44:1-4) Ngisho nobe iBhabhulona kanye netive letibomakhelwane betitakwetfuka futsi tesabe nativa lemibiko, kodvwa emaJuda bekungakafaneli esabe ngobe Jehova bekatawavikela. Wawacinisekisa tikhatsi letintsatfu ngemavi latsi “ungesabi.”—Isaya 41:5, 6, 10, 13, 14.

Ekucaleni, lamavi laku-Isaya 41:10, Jehova Nkulunkulu bekawabhalele emaJuda letsembekile lebekatfunjelwe eBhabhulona, kodvwa wawagcina kuze advudvute tonkhe tikhonti takhe. (Isaya 40:8; KubaseRoma 15:4) Usatisita tikhonti takhe nalamuhla njengobe atisita endvulo.