Jesu Usensimini

NGEMUVA kwekuphuma ekamelweni lelisetulu, Jesu kanye nebaphostoli bakhe baya ensimini yaseGetsemane. Bebakwetayele kufika lapha. Jesu wabatjela kutsi bahlale balindzile futsi bathandaze. Yena wachubeka wahamba libangana, wase uguca phansi uyathandaza.

Ngemuva kwesikhashana, Jesu wabese ubuyela lapho abeshiye khona baphostoli bakhe. Ucabanga kutsi wabakhandza bentani? Bebalele! Wabatjela tikhatsi letintsatfu kutsi bahlale balindzile, kepha kwakutsi lapho abuyela kubo, abakhandze balele. Ekugcineni lapho Jesu abuya, watsi kubo: ‘Nisalele namanje? Sikhatsi sesifikile sekutsi nginikelwe etitseni tami.’

Watsi asakhuluma nje, kwase kuvakala umsindvo wesicumbi sebantfu. Uyawabona yini lamadvodza laphetse tinkemba, tindvuku kanye netibane? Lapho efika, lomunye wawo waphuma kulesicumbi weta kuJesu, wafike wamanga, njengoba ubona lapha. Lendvodza nguJudasi Skariyothi. Abemangelani?

Jesu wambuta watsi: ‘Judasi, ingabe ungitsengisa ngekunganga?’ Kumanga bekuyindlela yekukhombisa lamadvodza Judasi lahamba nawo kutsi Jesu abengiyo lendvodza labayifunako. Ngako-ke titsa taJesu tasondzela tambamba. Kepha Phetro akakuvumelanga loko kutsi kwenteke kuJesu, ngako-ke wakhipha inkemba yakhe, washaya indvodza lesedvutane naye. Inkemba yageja inhloko yalendvodza yabese ijuba indlebe yayo. Kepha Jesu watsintsa indlebe yalendvodza wayiphilisa.

Jesu wase utsi kuPhetro: ‘Buyisela inkemba emgodleni wayo. Ucabanga kutsi bengingete ngacela yini mine kuBabe kutsi angehlisele tinkhulungwane tetingilosi titewungisindzisa?’ Yebo Jesu abengakwenta loko, kepha bekati kutsi sikhatsi sesifikile sekutsi titsa takhe timtsatse. Ngako-ke, wavuma kutsi bamtsatse. Ase sibone kutsi kwentekani kuJesu nyalo.