Jesu Uyaboshwa

Jesu nebaphostoli bakhe bewela sihosha saseKhidroni baya eNtsabeni Yemincuma. Bekusekhatsi nebusuku, futsi bekukhanya inyeti. Ngesikhatsi bafika eGetsemane, Jesu watsi kubo: “Hlalani lapha nilindze.” Jesu wakhwesha kancane kubo wase uguca ngemadvolo. Wathantaza kuJehova watsi: “Akwenteke intsandvo yakho.” Jehova wase utfumela ingilosi yakhe kutsi itocinisa Jesu. Nakabuyela emuva kubafundzi bakhe, wabatfola balele. Watsi kubo: ‘Vukani! Lesi akusiso sikhatsi sekulala. Sikhatsi sekutsi nginikelwe etitseni tami sesifikile.’

Ngekushesha, Judasi wefika ahamba nebantfu labanyenti lebebaphetse tinkemba netindvuku. Abeyati lendzawo, ngobe bebavame kuhlangana kuyo naJesu nebafundzi bakhe. Judasi watjela emasotja lebekahamba nawo kutsi utawakhombisa Jesu. Wacondza kuJesu wafike watsi: “Sawubona Mfundzisi!” wase uyamcabuza. Jesu watsi: ‘Judasi, ungitsengisa ngekungicabuza?’

Jesu wasondzela kulabantfu wababuta watsi: ‘Nifuna bani?’ Batsi kuye: “Sifuna Jesu waseNazaretha.” Watsi kubo: “Nginguye.” Labantfu badedela emuva. Jesu waphindze wababuta watsi: “Nifuna bani?” Baphindze batsi: “Sifuna Jesu waseNazaretha.” Jesu watsi kubo: ‘Nginitjelile kutsi nginguye. Bayekeleni laba.’

Ngesikhatsi Phetro abona kutsi kwentekani, wakhipha inkemba washaya ngayo Malkhusi sisebenti semphristi lophakeme wasisusa indlebe. Kodvwa Jesu watsintsa indlebe yaMalkhusi futsi yaphola. Wase utsi kuPhetro: ‘Buyisela lenkemba esikhwameni sayo. Nawulwa ngenkemba uyawubulawa ngayo.’ Lamasotja abamba Jesu ambopha tandla futsi baphostoli bakhe babaleka. Ahamba naye ku-Anasi indvuna yebaphristi. Anasi wabuta Jesu imibuto wase umyisa kuKhayafase uMphristi lophakeme. Kodvwa kwentekani kubaphostoli baJesu?