Secwayiso Lesitfolakala Kulokwenteka Kadzeni

Jehova ngeke abavumele bantfu lababi kutsi bone liPharadisi. Bangani bakhe kuphela labatawuphila khona. Kutawentekani kubantfu lababi? Kuze utfole imphendvulo, ase ucabange ngendzaba leliciniso lephatselene naNowa. Waphila etinkhulungwaneni teminyaka leyengcile. Abeyindvodza lelungile leyayetama ngaso sonkhe sikhatsi kwenta intsandvo yaJehova. Kepha labanye bantfu emhlabeni bebenta tintfo letimbi. Kungako Jehova atjela Nowa kutsi abetawuletsa zamcolo ubhubhise bonkhe bantfu lababi. Jehova wamtjela kutsi akhe umkhumbi kuze yena nemndeni wakhe bangafi nakufika Zamcolo.—Genesisi 6:9-18.

Nowa nemndeni wakhe bakha umkhumbi. Nowa wecwayisa bantfu ngekutsi kwakutawufika Zamcolo, kepha abamlalelanga. Bachubeka benta tintfo letimbi. Nasekuphelile kwakhiwa kwemkhumbi, Nowa wangenisa tilwane kuwo, wabese naye uyangena nemndeni wakhe. Jehova wabese uletsa imvula lenkhulu leyana emalanga langu-40 nebusuku lobungu-40. Emanti ambonya wonkhe umhlaba.—Genesisi 7:7-12.

Bantfu lababi balahlekelwa kuphila kwabo, kodvwa Nowa nemndeni wakhe basindza. Jehova wabaphephisa kuZamcolo, basala baphila emhlabeni lowase ute bubi. (Genesisi 7:22, 23) LiBhayibheli litsi kutawuphindze kufike sikhatsi lapho khona Jehova atawubhubhisa labo labangafuni kwenta lokulungile. Bantfu labalungile ngeke babhujiswe. Batawuphila phakadze emhlabeni loliPharadisi.—2 Phetro 2:5, 6, 9.

Lamuhla bantfu labanyenti benta tintfo letimbi. Umhlaba ugcwele tinkinga. Jehova uchubeka atfumela boFakazi bakhe kutsi bacwayise bantfu, kepha labanyenti abafuni kulalela emavi akhe. Kutawentekani kulabo bantfu? Bayoke bashintje yini? Labanyenti ngeke bashintje. Sikhatsi siyeta lapho khona bantfu lababi batawubhujiswa futsi bangaphindze baphile.—Tihlabelelo 92:7.

Umhlaba ngeke ubhujiswe; utawentiwa lipharadisi. Labo lababa bangani baNkulunkulu batawuphila phakadze ePharadisi lelitawube lisemhlabeni.—Tihlabelelo 37:29.