Kukhuluma Ngekuciniseka

NANGABE umuntfu akhuluma ngekuciniseka, labanye bayabona kutsi ukukholelwa mbamba loko lakushoko. Kuciniseka lokunjalo kwabonakala emsebentini wekushumayela wemphostoli Pawula. Abhalela labo lababa ngemakholwa eThesalonika, watsi: “Tindzaba letimnandzi lesitishumayelako atifikanga kini ngenkhulumo kuphela, kodvwa taphindze tefika . . . nangekuciniseka lokukhulu.” (1 Thes. 1:5) Lokuciniseka kwabonakala endleleni labekhuluma ngayo nalabephila ngayo. Kuciniseka kufanele kuphindze kubonakale nasendleleni lesetfula ngayo emaciniso eliBhayibheli.

Kukhuluma ngekuciniseka akufani nekuhambisa embili imibono yakho, kuba nenkhani nobe kutati. Kodvwa nangabe umuntfu locinisekako akhuluma ngetintfo letiseVini laNkulunkulu, ukhuluma ngendlela lekhombisa kutsi unekukholwa lokucinile.—Heb. 11:1.

Lapho Ungakhombisa Khona Kuciniseka. Kubalulekile kukhuluma ngekuciniseka nawusemsebentini wekushumayela. Ngalokuvamile, indlela lokhuluma ngayo bantfu bayinaka ngendlela lefanako naloko lokushoko. Bayayibona indlela lotiva ngayo ngaloko lokushoko. Kwendlula emavi nje kuphela, kuciniseka kungaveta kutsi loko lofuna kukusho kubaluleke kakhulu.

Kuyadzingeka kutsi ukhombise kuciniseka nalapho ukhuluma nalamanye emaKhristu. Umphostoli Phetro wabhala incwadzi yakhe yekucala lephefumulelwe ‘kuze akhutsate futsi anikete bufakazi lobuliciniso bekutsi lona ngiwo mbamba umusa waNkulunkulu.’ Kulencwadzi wakhutsata bazalwane bakhe, watsi: “Ngako manini nicine kuwo.” (1 Phet. 5:12) Nakabhalela libandla laseRoma, umphostoli Pawula wakhuluma ngekuciniseka, futsi loko kwabazuzisa. Wabhala watsi: “Ngobe ngiyaciniseka kutsi ngisho nekufa, kuphila, tingilosi, babusi, tintfo letikhona nyalo naleto letitako, emandla, kuphakama, kujula, ngisho nanobe nguyiphi indalo, ngeke kukwati kusehlukanisa nelutsandvo lwaNkulunkulu lolukuKhristu Jesu iNkhosi yetfu.” (Rom. 8:38, 39) Pawula waphindze wabhala ngekuciniseka mayelana nesidzingo sekushumayela kulabanye, futsi kukhutsala kwakhe kulowo msebenti kwaba bufakazi bekutsi naye uyaciniseka kutsi ubalulekile. (Imis. 20:18-21; Rom. 10:9, 13-15) Kuciniseka lokunjalo kufanele kubonakale nakulabadzala labangemaKhristu lamuhla njengobe bafundzisa loko lokuseVini laNkulunkulu.

Ngetikhatsi tekufundza kanye nakuletinye, batali kufanele bakhulume ngekuciniseka nabacoca ngetintfo letiseBhayibhelini nebantfwana babo. Loku kudzinga kutsi etinhlitiyweni tabo, batali babe nelutsandvo ngaNkulunkulu kanye netindlela takhe. Loku kutawukwenta kutsi ngalokusuka enhlitiyweni bakhulume ngekuciniseka nebantfwana babo, “ngobe umlomo ukhuluma loko lokugcwele enhlitiyweni.” (Luk. 6:45; Dut. 6:5-7) Kuba nekuciniseka lokunjalo kutawusita batali kutsi babeke sibonelo ‘sekukholwa lokute kutentisa.’​—2 Thim. 1:5.

Kubaluleke kakhulu kutsi ukhulume ngekuciniseka nangabe kukholwa kwakho kuhlaselwa. Umuntfu lofundza naye esikolweni, thishela nobe losebenta naye angase amangale ngekutsi awuhlanganyeli ekugubheni umkhosi lotsite. Imphendvulo leveta kuciniseka kanye nalecatjangwe kahle ingamsita kutsi akuhloniphe loko lokukholelwako lokusekelwe eBhayibhelini. Kutsiwani nangabe lotsite afuna kutsi utiphatse kabi, kungaba kutsi ungetsembeki, usebentise kabi tidzakamiva nobe utiphatse kabi ngekwelicasi? Kubalulekile kutsi ukwente kucace kutsi ngeke ukwente loko, nekutsi ngisho nobe angakuncenga kangakanani ngeke ushintje. Loku kudzinga kutsi ukhulume ngekuciniseka nangabe ukwala loko lafuna kukwentisa kona. Ngesikhatsi ala kutiphatsa kabi nemkaPhotifari, ngekuciniseka Josefa watsi: “Ngingabenta kanjani lobubi lobungaka, ngone kuNkulunkulu?” Ngesikhatsi achubeka amncenga, Josefa wabaleka.​—Gen. 39:9, 12.

Indlela Yekukhombisa Kuciniseka. Emagama lowasebentisako angadlala indzima lebalulekile ekukhombiseni kuciniseka. Etikhatsini letinyenti, Jesu abecala loko lakushoko ngemavi latsi: “Ngicinisile, ngicinisile ngitsi kuwe.” (Joh. 3:3, 5, 11; 5:19, 24, 25) Kuciniseka kwaPawula bekubonakala emavini labewasebentisa lanjengalatsi, “ngiyaciniseka,” “ngiyati futsi ngiyaciniseka ngeNkhosi Jesu,” kanye nalatsi “ngikhuluma liciniso hhayi emanga.” (Rom. 8:38; 14:14; 1 Thim. 2:7) Mayelana nekugcwaliseka kwemavi akhe, ngaletinye tikhatsi Jehova waphefumulela baphrofethi bakhe kutsi bakugcizelele loku ngekutsi basho emavi lanjengekutsi: “Sona sitawufika nome kanjani.” (Hab. 2:3) Nawukhuluma ngaletiphrofetho, ungasebentisa lulwimi lolufanako. Nangabe ungatetsembi wena kodvwa wetsemba Jehova futsi ukhuluma nalabanye ngendlela lenenhlonipho, emavi lakhombisa kuciniseka atawuveta kutsi unekukholwa lokucinile.

Kuciniseka kungaphindze kubonakale ngekutsi emavi lowashoko asuke enhlitiyweni futsi abe nemandla. Simo sakho sebuso kanye nekushukuma kwemtimba kungaba nesandla kuloku, nanobe loku kwehlukahluka kuye ngemuntfu. Ngisho nobe unemahloni nobe unensa nawukhuluma, nangabe uciniseka kutsi loko lokushoko kuliciniso nekutsi labanye kuyadzingeka kutsi bakuve, kutawubonakala kutsi uyaciniseka.

Kuliciniso kutsi nobe nguyiphi indlela lesikhombisa ngayo kuciniseka kufanele isuke enhlitiyweni. Nangabe bantfu babona kutsi siyatentisa nobe asikhulumi ngalokusuka enhlitiyweni, bangaphetsa ngekutsi loko lesikushoko akukabaluleki. Ngako-ke kubalulekile kutsi ukhulume ngendlela lovame kukhuluma ngayo. Kuye ngekutsi banyenti kangakanani bantfu lokhuluma nabo, kungase kudzingeke kutsi uphakamise livi futsi ube nemdlandla. Kodvwa umgomo wakho kufanele ube kukhuluma ngalokusuka enhlitiyweni kanye nangendlela lovame kukhuluma ngayo.

Lokungakusita Kuze Ukhulume Ngekuciniseka. Njengobe kuciniseka kuhambisana nendlela lotiva ngayo ngaloko lokhuluma ngako, kulungiselela kahle kubalulekile. Kumane utsatse loko lokubhalwe encwadzini letsite bese uphindze uyakusho, akukeneli. Kudzingeka ukucondze kahle futsi ukhone kukusho ngemavi akho. Kufanele uciniseke kutsi kuliciniso kanye nekutsi kubalulekile kulabo labakulalele. Loku kusho kutsi nawulungiselela, kufanele ucabange ngetimo tabo nangaloko lesebavele bakwati ngaleyo ndzaba nobe kutsi bativa njani ngayo.

Kumelula kutsi labanye babone kutsi siyaciniseka nangabe sishelela nasikhuluma. Ngako-ke, ngetulu kwekulungiselela indzaba lezuzisako, kufanele ulungiselele nendlela yekuyetfula. Naka tincenye tenkhulumo yakho letidzinga kutsi ukhulume ngalokusuka enhlitiyweni, kuze ukhone kutetfula ungafundzi phansi. Khumbula nekutsi uthantaze ucele Jehova abusise imetamo yakho. Nawenta njalo, ‘ngaNkulunkulu utawuba nesibindzi’ sekukhuluma ngendlela lekhombisa kutsi uyaciniseka kutsi loko lokushoko kuliciniso futsi kubalulekile.​—1 Thes. 2:2.