Indlela Yekucatulula Tinkinga

Njengobe wena naloshade naye nicala imphilo yenu ndzawonye, kutawuvela tinkinga letehlukahlukene. Tingabangelwa kutsi ayifani indlela lenicabanga ngayo, lenitiva ngayo nalenenta ngayo tintfo ekuphileni. Mhlawumbe kungavela tinkinga letichamuka ngaphandle nome letibangelwe tintfo lebetingakalindzeleki.

Kungaba melula kucabanga kutsi tinkinga angeke tibe khona, kodvwa liBhayibheli lisikhutsata kutsi sitilungise tinkinga. (Matewu 5:23, 24) Nanisebentisa timiso teliBhayibheli, nitawutfola tisombululo letincono kakhulu tetinkinga tenu.

1 COCANI NGENKINGA LENINAYO

LOKO LOKUSHIWO LIBHAYIBHELI: “Kunesikhatsi . . . sekukhuluma.” (Umshumayeli 3:1, 7) Cinisekani kutsi nicitsa sikhatsi lesanele nikhuluma ngenkinga leninayo. Yetsembeka nawuchazela umuntfu loshade naye ngendlela lotiva ngayo nangaloko lokucabangako ngalendzaba. Hlale ‘ukhuluma liciniso’ kuloshade naye. (Efesu 4:25) Ngisho nome utiva utfukutsela, kubalekele kulwisana naye. Imphendvulo leshiwo ngemoya lophansi ingenta kutsi kucocisana kwenu kungagcini sekufana nemphi.​—Taga 15:4; 26:20.

Ngisho nobe ningavumelani, chubeka uba nemusa futsi ungakhohlwa kumkhombisa lutsandvo nenhlonipho umuntfu loshade naye. (Kholose 4:6) Yetamani kulungisa inkinga ngekushesha futsi ningayekeli kukhulumisana.​—Efesu 4:26.

LONGAKWENTA:

• Bekani sikhatsi lesikahle sekukhuluma ngenkinga leninayo

• Nasekunguwe lokufanele ulalele, ungamphatamisi umuntfu loshade naye. Nawe utalitfola litfuba lakho lekukhuluma

2 LALELANANI FUTSI NICONDZANE

LOKO LOKUSHIWO LIBHAYIBHELI: “Tsandzanani . . . Nihambe embili ekuhloniphaneni.” (Roma 12:10) Indlela lolalela ngayo ibaluleke kakhulu. Yetama kuwucondza umbono waloshade naye ngekutsi ube ‘neluvelo . . . futsi utfobeke.’ (1 Phetro 3:8; Jakobe 1:19) Ungamane nje wente shengatsi umlalele kantsi awukamlaleli. Nakungenteka, tibekele eceleni tintfo lotentako bese uyamnaka umuntfu loshade naye, nome ucele kutsi nicoce ngalendzaba ngalesinye sikhatsi. Nangabe umuntfu loshade naye umtsatsa njengemngani wakho kunekutsi umtsatse njengesitsa sakho, ngeke ‘usheshe ucansuke.’​—Umshumayeli 7:9.

LONGAKWENTA:

• Chubeka unengcondvo levulekile nawulalela umuntfu loshade naye, ngisho nobe loko lakushoko kukuphatsa kabi

• Yetama kutfola loko lacondze kukusho. Naka simo sakhe semtimba nendlela lakhuluma ngayo

3 KWENTENI LOKO LENIVUMELENE NGAKO

LOKO LOKUSHIWO LIBHAYIBHELI: “Kuko konkhe kusebenta matima kunemvuzo; kodvwa labo labalibala kukhulumela futsi bahlala beswele.” (Taga 14:23) Akukeneli kumane nivumelane ngesisombululo lesikahle senkinga letsite. Kufanele nibese niyakwenta loko lenikuncumile. Loko kungadzinga nente imetamo leminyenti, kodvwa kwenta njalo kutanizuzisa. (Taga 10:4) Nangabe nisebenta ndzawonye ngekubambisana, ‘nitawutfola umvuzo lomuhle’ wekusebenta kwenu kamatima.​—Umshumayeli 4:9.

LONGAKWENTA:

• Vumelanani ngekutsi ngutiphi tinyatselo lenitatitsatsa kute nicatulule inkinga leninayo

• Nakuchubeka sikhatsi, hlolani kutsi ikhona yini intfutfuko leniyentile