INCENYE 5
Indlela Longagcina Ngayo Kuthula Netihlobo Takho
“Gcokani . . . umusa, kutfobeka, umoya lophansi, nekubeketela.”—Kholose 3:12
Bantfu nabashada baba ngumndeni lomusha. Nanobe utawuchubeka ubatsandza batali bakho futsi ubahlonipha, kodvwa umuntfu loshade naye senguye lobaluleke kakhulu kuwe lapha emhlabeni. Kungaba matima ngaletinye tihlobo takho kutsi tikwemukele loko. Kodvwa timiso teliBhayibheli tingakusita kutsi wente tintfo ngendlela lefanele, kuze ukhone kuhlale unekuthula netihlobo takho futsi ngesikhatsi lesifanako ube usebenta kamatima kute utfutfukise umshado wakho.
1 HLALA UNEMBONO LOFANELE NGETIHLOBO TAKHO
LOKO LOKUSHIWO LIBHAYIBHELI: “Hlonipha uyihlo nenyoko.” (Efesu 6:2) Ngisho nobe umdzala kangakanani, kufanele uhlale ubahlonipha batali bakho futsi ubaphatsa kahle. Khumbula kutsi nemuntfu loshade naye kufanele abanake batali bakhe, njengobe angumntfwana wabo. “Lutsandvo . . . lute umona,” ngako ungacali utive ushiyelwe ngephandle ngenca yebuhlobo umuntfu loshade naye lanabo nebatali bakhe.—1 Khorinte 13:4; Galathiya 5:26.
LONGAKWENTA:
Kubalekele kusho emavi lanjengekutsi “Bantfu bakini bahlale bangentela phansi” nobe kutsi “Akwenteki make wakho atitsandze tintfo lengitentako”
Yetama kubona tintfo ngendlela umuntfu loshade naye latibona ngayo
2 UNGAYEKELELI NAKUFANELE
LOKO LOKUSHIWO LIBHAYIBHELI: “Indvodza iyawushiya uyise nenina inamatsele kumfati wayo, bese baba nyamanye.” (Genesisi 2:24) Nawushada, batali bakho bangase beve shengatsi basenalo ligunya etintfweni lotentako, futsi kungenteka bafune kungenela emshadweni wenu ngisho nalapho kungakafaneli.
Kungumtfwalo wakho naloshade naye kutsi nibekele batali benu imincele bese nibachazela ngelutsandvo ngayo. Ningakhona kukhuluma nabo ngekukhululeka nangendlela lecacile ngaphandle kwekuba luhlata. (Taga 15:1) Kutfobeka, kubanemoya lophansi kanye nekubeketela kutakusita kutsi ube nebuhlobo lobuhle netihlobo takho futsi nichubeke ‘nibeketelelana ngelutsandvo.’—Efesu 4:2.
LONGAKWENTA:
Nayikukhatsata indlela tihlobo tenu letingenela ngayo emshadweni wenu, coca nemuntfu loshade naye nasisihle simo
Vumelanani ngekutsi nitawenta njani etindzabeni letinjena