Indlela Yekusebentisa Kahle Imali

Sonkhe siyayidzinga imali kute sinakekele imindeni yetfu ngetintfo letiyidzingako. (Taga 30:8) Ngetulu kwako konkhe, ‘imali iyintfo yekukhosela.’ (Umshumayeli 7:12) Njengobe nishadile kungase kube lukhuni kukhuluma ngemali, kodvwa ningayivumeli kutsi ibangele tinkinga emshadweni wenu. (Efesu 4:32) Bantfu labashadene kufanele betsembane futsi bente tincumo kanye kanye ngekutsi batayisebentisa njani imali.

1 HLELA NGEKUCOPHELELA

LOKO LOKUSHIWO LIBHAYIBHELI: “Ngubani emkhatsini wenu lotsi nakafuna kwakha umbhoshongo angacali ahlale phansi abale tindleko kute abone kutsi unako konkhe yini lokudzingekako kuze awucedze?” (Lukha 14:28) Kubalulekile kutsi nihlele nobabili ngendlela lenitayisebentisa ngayo imali. (Amose 3:3) Ncumani kutsi yini lenidzinga kuyitsenga nekutsi ingakanani imali lenitayisebentisa. (Taga 31:16) Kuba nemali yekutsenga lokutsite akusho kutsi sekufanele ukutsenge. Yetama kubalekela tikweledi. Sebentisa kuphela imali lonayo.​—Taga 21:5; 22:7.

LONGAKWENTA:

• Nangabe ninemali lenyenti ekupheleni kwenyanga, ncumani kanye kanye kutsi nitawentani ngayo

• Nangabe nite imali leyenele, yentani luhlelo lolucondzile lekunciphisa tindleko tenu. Nasi sibonelo: Ningapheka ekhaya esikhundleni sekutsi niyodla ngaphandle

2 KHULUMISANANI NGEKUKHULULEKA FUTSI NIBE NELICINISO

LOKO LOKUSHIWO LIBHAYIBHELI: ‘Nakekela tonkhe tintfo ngekwetsembeka, hhayi embikwaJehova kuphela, kodvwa nasembikwebantfu.’ (2 Khorinte 8:21) Yetsembeka kumuntfu loshade naye ngekutsi umtjele kutsi uhola malini nekutsi usebentise imali lengakanani.

Ngaso sonkhe sikhatsi khuluma nemuntfu loshade naye nangabe ufuna kutsatsa tincumo letibalulekile letitsintsa imali. (Taga 13:10) Kukhuluma ngemali kutanisita kutsi nigcine kuthula emshadweni wenu. Ungatsatsi umholo wakho njengemali yakho, kodvwa wutsatse njengemali yemndeni.​—1 Thimothi 5:8.

LONGAKWENTA:

• Vumelanani ngemali umuntfu ngamunye langayisebentisa ngaphandle kwekucela imvume kulomunye

• Ningameli kuze kuvele tinkinga kube ngukhona nikhuluma ngemali