Imali Yimphandze Yesono Yini?

Lokushiwo liBhayibheli

Cha. LiBhayibheli alisho kutsi imali yimbi, noma kutsi iyimbangela yato tonkhe tintfo letimbi. Lomusho lovamile lotsi “imali yimphandze yesono” ngemavi lasetjentiswa kabi latsetfwe eBhayibhelini. Mbambambamba liBhayibheli litsi: “kutsandza imali kuyimphandze yako konkhe lokubi.”a—1 Thimothi 6:10, Swati Standard Bible

Yini Leshiwo liBhayibheli ngemali?

LiBhayibheli liyavuma kutsi imali nayisetjentiswa kahle ilusito, iphindze ibe ‘yintfo yekukhosela.’ (Umshumayeli 7:12) Ngetulu kwaloko, liBhayibheli liyabancoma labo labapha labanye, lokufaka ekhatsi kubapha imali.—Taga 11:25.

Ngesikhatsi lesifanako liBhayibheli lisecwayisa ngekunaka kakhulu imali. Litsi: “Indlela leniphila ngayo ayingabi yekutsandza imali, kodvwa yeneliswani tintfo leninato.” (Hebheru 13:5) Sifundvo lesisitfolako kutsi kufanele siyisebentise kahle imali futsi singafuni bunjinga. Kunaloko, umgomo wetfu kufanele kube kwenetiseka ngetintfo lesitidzingako, letifaka ekhatsi kudla, kwekwembatsa, kanye nendzawo yekuhlala.—1 Thimothi 6:8.

**Lisecwayiselani liBhayibheli ngekutsandza imali?**

Bantfu lababukhali angeke bakutfole kuphila lokuphakadze. (Efesu 5:5) Sizatfu saloko kutsi bukhali buluhlobo lwekukhonta titfombe noma kukhonta kwemanga. (Kholose 3:5). Lokunye kutsi nabafise kwenta labakufunako, bantfu lababukhali abatinaki timiso letilungile. Taga 28:20 titsi: “kodvwa lojaka kuceba uyawutfola sijeziso.” Bangase balingeke kutsi bente bugebengu lobunjengekwesabisa bantfu, kungetsembeki, kukhwabanisa, kutfumba noma kubulala.

Ngisho noma kutsandza imali kungaholeli etentweni letimbi, kodvwa kungaba nemiphumela lemibi. LiBhayibheli litsi “labatimisele ngekunjinga bawela esilingweni, elugibeni, nasetifisweni letinyenti letingenangcondvo naletilimatako.”—1 Thimothi 6:9.

Seluleko seliBhayibheli singasisita njani endzabeni yemali?

Nasingatilahli tintfo lesati kutsi tilungile futsi tijabulisa Nkulunkulu ngenca yemali sitawuhlonipheka, sitsandvwe nguNkulunkulu aphindze asisekele. Labo labetama ngalokusuka enhlitiyweni kumjabulisa Nkulunkulu wetsembisa kutsi “ngeke ngize ngikushiye, futsi ngeke ngize ngikulahle.” (Hebheru 13:5, 6) Uphindze asicinisekise kutsi “Umuntfu lowetsembekile uyawuchuma.”—Taga 28:20.

Emavesi eliBhayibheli lakhuluma ngemali

Umshumayeli 7:12: “Nemali iyintfo yekukhosela.”

Lokukushoko: Nasiyisebentisa kahle, imali ingasizuzisa ngoba ingasivikela.

Lukha 12:15: “Ngisho nalapho umuntfu anjingile kuphila kwakhe akuveli etintfweni lanato.”

Lokukushoko: Imali ayisiyo intfo lebaluleke kakhulu ekuphileni futsi angeke isisindzise.

1 Thimothi 6:10: “Kutsandza imali kuyimphandze yako konkhe lokubi; labanye-ke ngekuyifisa kwabo bedukile, bakhwesha ekukholweni, batigwaza ngeminjunju yebuhlungu leminyenti.”

Lokukushoko: Imali ngekwayo ayisiyimbi. Kodvwa bantfu labatsandza imali—nalabayenta ite kucala ekuphileni kwabo batiletsela tinkinga—letifana nekwehlukana kwemindeni kanye nemphilo lebutsakatsaka ngenca yekusebenta kakhulu.

Hebheru 13:5: “Indlela leniphila ngayo ayingabi yekutsandza imali.”

Lokukushoko: Kunekudzela yonkhe intfo ngenca yekufuna bunjinga, kukuhlakanipha kwenetiseka ngalesikudzinga mbamba.

Matewu 19:24: “Kumelula kutsi likamela lingene embotjeni yenyalitsi kunekutsi umuntfu lonjingile angene eMbusweni waNkulunkulu.”

Lokukushoko: Jesu wamema lijaha lebelinjingile kutsi libe ngumlandzeli wakhe. Lelijaha alizange livume ngoba beliwutsandza kakhulu umcebo walo. Ngako Jesu abesecwayisa. Umuntfu lotsandza bunjinga kwendlula kutsandza Nkulunkulu utawulahlekelwa kuphila lokuphakadze.

a Lelivesi lingaphindze lifundzeke kanje: “Kutsandza imali kuyimphandze yato tonkhe tinhlobo tetintfo letilimatako.”