Sembulo Lesembulelwa Johane

Ngesikhatsi umphostoli Johane aboshiwe esihlengeni lokutsiwa yiPhatmose, Jesu wamembulela imibono lengu-16, wamkhombisa lobekutawenteka esikhatsini lesitako. Kulemibono, wabona kutsi ligama laJehova belitawungcweliswa njani, uMbuso wakhe bewutawufika njani nekutsi intsandvo yaNkulunkulu beyitawentiwa njani emhlabeni njengasezulwini.

Kulomunye umbono, Johane wabona Jehova ahleti esihlalweni sakhe sebukhosi ezulwini situngeletwe tihlalo tebukhosi letingu-24, kuhleti labadzala labangu-24 bagcoke timphahla letimhlophe, nasetinhloko tabo kunemichele yeligolide. Kulesihlalo sebukhosi bekuphuma imibane, kuvakala nemsindvo wekudvuma kwelitulu. Labadzala labangu-24 bebakhotsama embikwaJehova futsi bamkhonta. Kulomunye umbono, wabona sicumbi lesikhulu sebantfu labakhonta Jehova, lesiphuma kuto tonkhe tive, tinhlanga, bantfu, kanye netilwimi. LiWundlu lelinguJesu lalibelusa, libayisa emitfonjeni yemanti ekuphila. Ngekuhamba kwesikhatsi, kulomunye umbono wabona Jesu acala kubusa njengeNkhosi ezulwini kanye nalabadzala labangu-24. Embonweni lowalandzela, Johane wabona Jesu alwa naDrago, longuSathane, kanye nemadimoni akhe futsi abajikijela emhlabeni.

Johane wase ubona liWundlu kanye nalabangu-144 000 beme eNtsabeni iSiyoni. Wabona lenye ingilosi indiza emoyeni, itjela bantfu kutsi besabe Nkulunkulu futsi bamnike inkhatimulo.

Embonweni lowalandzela, wabona kuliwa imphi lebitwa ngekutsi yi-Amagedoni. Kulemphi, Jesu nelibutfo lakhe behlula Sathane nelive lakhe lelibi. Embonweni wekugcina, Johane wabona sekunekuthula ezulwini nasemhlabeni. Sathane nebantfu lababi babhujiswa. Bonkhe labasezulwini nalabasemhlabeni bangcwelisa ligama laJehova futsi bakhonta yena kuphela.