Lalela Uphindze Ufundze
1. Yini lengabangela kutsi kudzingeke sente umetamo kuze silalele siphindze sifundze emhlanganweni wesigodzi?
1 Umhlangano wesigodzi wa-2013 utawucala masinyane. Kunyenti losekwentiwe ekulungiseleleni lomhlangano lotawuhlangabetana netidzingo tabo bonkhe bantfu. Sewuwentile yini emalungiselelo ekuba khona kuwo omatsatfu emalanga alomhlangano? Imihlangano lemikhulu inetiphazamiso letinyenti ngako-ke kungase kudzingeke sente umetamo lomkhulu kute sikhone kulalelisisa nakuchubeka umhlangano. Njengobe umhlangano wesigodzi utsatsa sikhatsi lesidze kunemihlangano yelibandla, kudzingeka sihlale silalelisisile sikhatsi lesidze. Ngetulu kwaloko, luhambo loluya emhlanganweni kanye naletinye tintfo kungase kusente sidzinwe. Yini letasisita kutsi sihlale siphapheme kuze sikhone kulalela siphindze sifundze?—Dut. 31:12.
2. Singatenta kanjani tinhlitiyo tetfu kutsi tilangatelele lomhlangano wesigodzi?
2 Nawusengakafiki Umhlangano Wesigodzi: I-www.jw.org lokuyi-Web site yetfu lesemtsetfweni, inalo luhlelo lwemihlangano yesigodzi letawuchutjwa emhlabeni wonkhe (tikhatsi temhlangano wesigodzi lenabelwe kuwo tivetwe lapha ngentasi), lokufaka ekhatsi tihloko tato tonkhe tinkhulumo letihambisana nembhalo munye nome lemibili lengumgogodla. Nangabe sikhona kungena ku-internet, kutasisita kubuka letihloko kuze sente tinhlitiyo tetfu tiwulangatelele lomhlangano. (Ezra 7:10) Kungaba njani nicoce ngeluhlelo lwalomhlangano eKukhonteni Kwemndeni kwakusihlwa kute nonkhe nitewulangatelela?
3. Yini letasisita kutsi silalelisise?
3 Nakuchubeka Umhlangano: Nakungenteka, yani emthoyi usengakacali umhlangano. Vala mahlalekhikhini wakho kuze ungakuphazamisi nawukhala nome nakungena umlayeto futsi kuze nawe ungalingeki kutsi utfumelele labanye imilayeto nakuchubeka umhlangano. Nangabe kudzingeka kutsi lucingo lwakho luhlale luvuliwe, lubeke esimeni lesingeke siphatamise labanye nangabe kukhona lokushayelako. Uma usebentisa i-tablet nakuchubeka umhlangano, yisebentise ngendlela yekutsi ungaphatamisi labanye. Ungadli nome unatse nakuchubeka umhlangano. (Shu. 3:1) Hlale unake sikhulumi. Nakufundvwa umbhalo, wuvule eBhayibhelini lakho, uhambisane nesikhulumi. Bhala emaphuzu kafishane.
4. Batali bangabasita njani bantfwababo kutsi balalele baphindze bafundze?
4 Sifuna nekutsi bantfwabetfu balalele baphindze bafundze. Taga 29:15 titsi: “Umntfwana longashaywa nalongayalwa uhlazisa unina.” Ngako-ke, kuhle kutsi imindeni ihlale ndzawonye kute batali bente siciniseko sekutsi bantfwababo balalele nakuchubeka umhlangano kunekutsi bakhulume, batfumele imilayeto ngamahlalekhikhini nome bazulazule. Ngisho nome babancane kakhulu kutsi bangakuva konkhe lokukhulunywako, bantfwana bangaceceshwa kutsi bahlale bathule futsi bangalali.
5. Kusita ngani kubuketa umhlangano, futsi singakwenta kanjani loko?
5 Ngemuva Kwemhlangano Welusuku Ngalunye: Ungahlali kuze kube sebusuku kakhulu. Sheshe ulale kuze uphumule ngalokwanele. Kubuketa emaphuzu lowatfole emhlanganweni kutakusita kutsi uwakhumbule sikhatsi lesidze. Ngako-ke, kunganisita kutsatsa imizuzu lembalwa nicoce ngemhlangano njengemndeni njalo kusihlwa. Nawuya endzaweni yekudlela nebangani bakho, kungaba njani uhambe nemaphuzu lowabhale emhlanganweni bese ubacocela linye nome lamabili kuwo lowatsandzile? Nasenibuyela ekhaya ekupheleni kwemhlangano, ningase nisebentise sikhatsi lesitsite eKukhonteni Kwemndeni kwakusihlwa nicoce ngendlela leningakusebentisa ngayo njengemndeni kwatiswa kwalomhlangano. Ningaphindze nibeke eceleni sikhatsi liviki ngalinye kuze nibukete tincenye tetintfo letikhululiwe.
6. Kwenele yini kumane sibe khona emhlanganweni wesigodzi? Chaza.
6 Lidzili alisiti kangako nangabe kudla kwalo kungakadliwa. Singasho lokufanako endzabeni yelidzili lelivela kuNkulunkulu lelitawuba khona emhlanganweni wesigodzi. Shengatsi singazuza kakhulu ngekuba khona kuwo wonkhe lomhlangano, silalelisise siphindze sikwente lesitakufundza.