“Hlanganisa Sonkhe Sive”
1. Imihlangano yesigodzi neyetive ifana ngani nemhlangano lobewubaluleke kakhulu ema-Israyeli laba nawo ngekushesha ngemuva kwekuphuma eGibhithe?
1 Ngekushesha ngemuva kwekuphuma eGibhithe, Jehova watjela Mosi kutsi ‘ahlanganise sonkhe sive’ eNtsabeni iSinayi kute sive emavi akhe sitewumesaba siphindze sifundzise nebantfwana baso tindlela takhe. (Dut. 4:10-13) Kufanele kutsi lomhlangano lowacopha umlandvo wakucinisa kukholwa kwaso. Etinyangeni letimbalwa letitako, bantfu baJehova batawuhlangana emihlanganweni yesigodzi neyetive kute abafundzise. Yini lokufanele siyente kute sizuze kulomhlangano?
2. Yini lokufanele siyente kute ‘siwulungele’ umhlangano wetfu?
2 ‘Kulungele’: Jehova wayala ema-Israyeli kutsi ‘awulungele’ lomhlangano lowacopha umlandvo lowawuseNtsabeni iSinayi. (Eks. 19:10, 11) Ngendlela lefanako, bonkhe labatawuba khona kulemihlangano kudzingeka bakulungiselele kahle, kungagcini ngalabo labatawuba netabelo. Kungenteka kutsi labanyenti kutawudzingeka bacele emsebentini. Mhlawumbe usesimeni lesifana nesaNehemiya. Bekafuna kushiya umsebenti wakhe emalanga latsite, njengobe abengumphatsi wesitja seNkhosi Athazeksesi, kute aye eJerusalema ayokwakha kabusha tibondza takhona, kodvwa bekati kutsi inkhosi yayingase ingavumi. Nehemiya wathantaza, ngemuva kwaloko waba nesibindzi sekwetfula sicelo sakhe ngekutitfoba. Inkhosi yamvumela kutsi ahambe, yaphindze yawusekela lomsebenti wekwakha. (Neh. 2:1-9) Ngetulu kwekucela emalanga kumcashi wakho, sewuhlelile yini kutsi utawuhamba ngani nekutsi utawulala kuphi? Labadzala batakujabulela kusita nome ngabe ngubani longase adzinge lusito. Hlela kufika ngesikhatsi eluhlelweni ngalunye uphindze ukulungele ‘kukunakisisa’ loko lotakuva.—Heb. 2:1.
3. Yini letasisita kutsi sente tinhlitiyo tetfu tilungele umhlangano?
3 Lokunye lokubalulekile ekutilungiseleleni, kulungisa tinhlitiyo tetfu kute silalele siphindze sifundze. (Ezra 7:10, NW) Luhlelo lwemhlangano lutawufakwa ku-jw.org kusenesikhatsi. Lutawuba netihloko tato tonkhe tinkhulumo kanye nembhalo munye nome lemibili leyinhloko lehambisana nenkhulumo ngayinye. Lutasineketa loko lesingacoca ngako eKukhonteni Kwemndeni kwakusihlwa emavikini langaphambi kwemhlangano lesabelwe kuwo. Labanye bamemeteli bayaluphrinta loluhlelo bese balusebentisela kubhala emaphuzu lamafishane nakuchubeka umhlangano.
4. Umhlangano ungabasita njani batali kutsi bafundzise bantfwana babo?
4 ‘Fundzisa Bantfwana Bakho’: Lenye yetinjongo talomhlangano lowawuseNtsabeni iSinayi kwakukutsi batali labangema-Israyeli ‘bafundzise bantfwana babo.’ (Dut. 4:10) Umhlangano uniketa batali litfuba lelikahle lekwenta lokufananako. Batali kufanele bahlale nebantfwana babo nakuchubeka umhlangano, baphindze babasite kutsi balalelisise. Ngemuva kwelusuku ngalunye lwemhlangano, imindeni ingacoca ngeluhlelo lwangalelo langa bese kamuva icoca ngawo ekukhonteni kwemndeni.
5. Sitawuzuza njani ngekuba khona emhlanganweni lotako?
5 Lomhlangano lobalulekile lowawuseNtsabeni iSinayi wasita ema-Israyeli kutsi alatise lelilungelo lelingakavami lekuba sive saNkulunkulu. (Dut. 4:7, 8) Umhlangano lotako wentelwe kutsi usizuzise ngendlela lefanako. Kulamanga lamatsatfu kutawuba shengatsi siphumile kulelive laSathane lelinjengelihlane leliyingoti, sijabulele kufundziswa nguJehova kanye nekuhlangana nebazalwane betfu ngekuthula. (Isa. 35:7-9) Njengobe lilanga laJehova lisondzela, shengatsi singete saliyekela lelitfuba lekuhlangana futsi sikhutsatane.—Heb. 10:24, 25.