Ngingumuntfu Lonjani KuJehova?
1. LiBhayibheli lifaniswa nesibuko ngayiphi indlela?
1 Utibuka kangakhi esibukweni? Linyenti letfu litibuka onkhe emalanga ngobe kwenta njalo kusisita kutsi sitibone kutsi sinjani bese siyatilungisa nakunesidzingo. LiBhayibheli lifaniswa nesibuko. Kufundza liVi laNkulunkulu kwenta sitibone kutsi linjani lingekhatsi letfu, lokuyintfo Jehova layibonako. (1 Sam. 16:7; Jak. 1:22-24) LiVi laNkulunkulu ‘lingacondza imicabango netinhloso tenhlitiyo.’ (Heb. 4:12) Kufundza liBhayibheli onkhe emalanga kanye nekuzindla ngalo, kungasisita kanjani kutsi sibone lakufanele sitfutfukise khona kute sibe bavangeli labaphumelelako?—Hla. 1:1-3.
2. Lingasisita njani liBhayibheli kutsi sitihlolisise?
2 Sebentisa LiBhayibheli Njengesibuko: Kulandzisa lokuseBhayibhelini lokumayelana netinceku taJehova letetsembekile, kusifundzisa kutsi hlobo luni lwebuntfu lolwemukelekako kuye. Nasi sibonelo: Davide wakhombisa kutsi unenshisekelo ngelibito laNkulunkulu. (1 Sam. 17:45, 46) Ngesibindzi, Isaya washumayela ngekutitsandzela ensimini lebeyilukhuni. (Isa. 6:8, 9) Indlela Jesu labemtsandza kakhulu ngayo uYise wakhe wasezulwini, yambangela kutsi atsatse umsebenti wekushumayela njengemtfombo wekucabuleka nekwenetiseka hhayi njengemtfwalo lomatima. (Joh. 4:34) EmaKhristu ekucala ashumayela ngenkhutsalo, etsembela kuJehova futsi abetimisele kuchubeka nalomsebenti. (Imis. 5:41, 42; 2 Khor. 4:1; 2 Thim. 4:17) Kuzindla ngetibonelo letifana naleti, kuyasisita kutsi natsi sitihlolisise sinemgomo wekutfutfukisa imisebenti lengcwele lesiyentako.
3. Kungani kungakafaneli sihudvule tinyawo ekwenteni lushintjo?
3 Lungisa Lakufanele Khona: Kuliciniso kutsi akusisiti ngalutfo kutibuka esibukweni bese asisakunaki loko lokufanele sikulungise. Singacela Jehova kutsi asisite sitibuke sinemgomo, aphindze asisite kutsi silungise lakufanele khona. (Hla. 139:23, 24; Luk. 11:13) Ngenca yekutsi sesincane sikhatsi lesisele futsi timphilo tebantfu tisengotini, kufanele singahudvuli tinyawo ekwenteni lushintjo loludzingekako.—1 Khor. 7:29; 1 Thim. 4:16.
4. Kwentekani kumuntfu lofundzisisa liVi laNkulunkulu bese uyakwenta loko lakufundzako?
4 Lingekhatsi lemuntfu, lokuyintfo Jehova layinakako, libaluleke kakhulu kunekubukeka kwakhe kwangaphandle. (1 Phet. 3:3, 4) Kwentekani kumuntfu lofundzisisa liVi laNkulunkulu bese uyakwenta loko lakufundzako? “Akabi ngulovako bese uyakhohlwa, kepha uba ngumenti welivi, futsi utawujabula ngekulenta.” (Jak. 1:25) Sitawujabula futsi sibe tisebenti letiphumelelako ‘nasiveta inkhatimulo yaJehova njengetibuko.’—2 Khor. 3:18.