Kutfutfukisa Emakhono Etfu Emsebentini Wekushumayela—Kufakaza Usebentisa I-Intercom

Kubaluleke Ngani?: Singase sikwesabe kufakaza sisebentisa i-intercom. Yini lesingayenta kute lokwesaba kungasicedzi emandla ekushisekela imisebenti lemihle? Kugcine engcondvweni kutsi kufakaza usebentisa i-intercom kungase kube kuphela kwendlela yekutjela labanye ngetindzaba letimnandzi. (Rom. 10:14) Kunyenti lesikwatiko lokukhombisa kutsi singaphumelela nasifakaza sisebentisa lendlela. (Fundza “INcwadi Yonyaka” ya-2011, emakh. 65-66, kanye neya-2000, likh. 54, sig. 3, letitfolakala ngesiZulu.) Cabanga nganankha emaphuzu lalandzelako.

Indlela Yekukwenta:

Lungiselela inshumayelo lemfishane futsi uyibhale phansi kuze uyifundzele loyo lokhuluma naye ku-intercom. Loku kungakusita kutsi utetsembe. Nawusacala nje kukhuluma naye, mchazele injongo yekuta kwakho. Sebentisa libito lakhe nangabe libhaliwe. Yephetsa ngekucela kumletsela (nobe kumshiyela emnyango wakhe) lipheshana nobe magazini lotamchazela kabanti ngaloko lebenicoca ngako.
Londvolota umbono lofanele. Mamatseka futsi ushukumise umtimba kube shengatsi nicoca buso nebuso nalomuntfu lokhuluma naye.
Khululeka futsi ukhulume ngendlela lohlale ukhuluma ngayo nawucoca. Khuluma ushelele futsi livi lakho livakale kahle. Ungahlabi likhefu lapho kungadzingeki khona, kodvwa ngesikhatsi lesifanako ungakhulumi usheshise kakhulu.
Buka timo. Etakhiweni letinkhulu, kungahle kube nema-intercom lamanyenti. Ungase ukhetse kushaya mabili nobe matsatfu, bese uyabhala kutsi ugcine kuphi ngaphambi kwekutsi uhambe. Nasihlala sikhatsi lesidze kuze sishaye onkhe lama-intercom, bantfu labahlala kuleso sakhiwo bangahle betfuke.

Yetama Loku Kulenyanga:

Kuphrakthizeni loku ekukhonteni kwemndeni. Labo labakhulumako kufanele bangabukani, lomunye abuke le nalomunye abuke le.