Indlela Imphi Kanye Netiphitsiphitsi Letihambisana Nebudlova Lokutawucedvwa Ngayo

NKULUNKULU UTAWUSUSA BOHULUMENDE BEBANTFU

Nkulunkulu utawususa bohulumende bebantfu asebentisa imphi liBhayibheli leliyibita ngekutsi yi-Amagedoni.a (Sembulo 16:16) Ngaleso sikhatsi, “emakhosi emhlaba wonkhe” atawubutsana ndzawonye “emphini yelilanga lelikhulu laNkulunkulu Somandla.” (Sembulo 16:14) I-Amagedoni yimphi yaNkulunkulu letawucedza tonkhe timphi.

Nkulunkulu utawuletsa uMbuso wakhe lotawutsatsa sikhundla sabohulumende bebantfu. LoMbuso utawubusa usezulwini futsi angeke ubhujiswe. (Danyela 2:44) Nkulunkulu ukhetse iNdvodzana yakhe, Jesu Khristu kutsi ibe yiNkhosi yaloMbuso wakhe. (Isaya 9:6, 7; Matewu 28:18) LoMbusob ngulona Jesu lafundzisa bafundzi bakhe kutsi bawuthantazele. (Matewu 6:9, 10) Bonkhe bantfu emhlabeni batawubuswa nguhulumende munye, iNkhosi yawo lokunguJesu.

Ngalokungafani nebabusi lababantfu, Jesu angeke asebentise ligunya lakhe kuze atizuzise yena. Ngenca yekutsi akakhetsi, kute lotawukhatsateka ngekutsi utawubukelwa phansi ngenca yebuve, buhlanga nobe sizinda. (Isaya 11:3, 4) Bantfu ngeke kudzingeke kutsi balwele emalungelo abo. Leni? Kungobe Jesu utawutinaka tonkhe tidzingo tebantfu. “Itawukhulula lohluphekile lokhalela lusito, ikhulule lophansi kanye naloyo lote longamsita. . . . Itawubakhulula ekucindzetelweni nasebudloveni.”​—Tihlabelelo 72:12-14.

UMbuso waNkulunkulu utawususa tonkhe tikhali letiyingoti emhlabeni. (Mikha 4:3) Utawuphindze ususe bonkhe bantfu lababi labangafuni kuyekela kulwa nobe labaphatamisa kuthula kwalabanye. (Tihlabelelo 37:9, 10) Bonkhe bantfu lokufaka ekhatsi emadvodza, bafati kanye nebantfwana batotiva balondzekile noma kuphi labaya khona emhlabeni.​—Hezekeli 34:28.

Nasekubusa uMbuso waNkulunkulu emhlabeni, bonkhe bantfu batawuba nemphilo lenhle. Utawucedza tinkinga letibangela bantfu kutsi balwe, letifaka ekhatsi buphuya, indlala kanye nekuswelakala kwetindzawo tekuhlala. Bonkhe bantfu batawutfola kudla lokunyenti lokunemphilo futsi batawujabulela kuba netindzawo letikahle tekuhlala.​—Tihlabelelo 72:16; Isaya 65:21-23.

UMbuso waNkulunkulu utawususa imiphumela lebuhlungu lebangelwe timphi. Loku kufaka ekhatsi kulimala emtimbeni, kukhatsateka kanye nebuhlungu lobungekwemivelo ngenca yetintfo letentekile kubantfu ngesikhatsi semphi. Ngisho nalabo labafa, batawuvuswa baphindze baphile emhlabeni. (Isaya 25:8; 26:19; 35:5, 6) Imindeni itawuphindze ihlangane futsi kukhumbula tintfo letimbi letenteka ngesikhatsi setimphi kutawuba ‘tintfo letindzala lesetendlulile.’​—Sembulo 21:4.

NKULUNKULU UTAWUSUSA SONO

Nasekubusa uMbuso waNkulunkulu bonkhe bantfu batawukhonta Jehovac lokunguNkulunkulu weliciniso, “Nkulunkulu welutsandvo newekuthula.” (2 KubaseKhorinte 13:11) Bantfu batawufundza kuhlala ndzawonye ngekuthula. (Isaya 2:3, 4; 11:9) Bonkhe labo labalalela Nkulunkulu batawuba bete sono.​—KubaseRoma 8:20, 21.

NKULUNKULU UTAWUSUSA SATHANE KANYE NEMADIMONI AKHE

UMbuso waNkulunkulu utawubhubhisa labo lababangela kutsi kube netimphi, lokunguSathane kanye nemadimoni akhe. (Sembulo 20:1-3, 10) Nasebabhujisiwe, ‘kuthula kutokwandza.’​—Tihlabelelo 72:7.

Ungaciniseka kutsi sitawufezeka setsembiso saNkulunkulu sekucedza timphi kanye netiphitsiphitsi letihambisana nebudlova. Nkulunkulu unawo emandla kanye nesifiso sekucedza imphi.

• Nkulunkulu uhlakaniphile futsi unemandla ladzingekile kuze acedze imphi kanye nebudlova. (Jobe 9:4) Kute lokungamvimba kutsi akwente loko.​—Jobe 42:2.

• Nkulunkulu uyakutondza kubona bantfu bahlupheka. (Isaya 63:9) “Uyamenyanya umuntfu lotsandza budlova.”​—Tihlabelelo 11:5

• Nkulunkulu akawacambi emanga, uyakwenta loko lakushito.​—Isaya 55:10, 11; KuThithusi 1:2.