Yini Lebangela Imphi Kanye Netiphitsiphitsi Letihambisana Nebudlova Kutsi Kuchubeke?
LiBhayibheli liyasitjela kutsi yini lebangela kube netimphi netiphitsiphitsi letinebudlova kanye nekutsi yini leyenta kuchubeke kukhona.
SONO
Nkulunkulu wadala batali betfu bekucala bo-Adamu na-Eva, ngemfanekiso wakhe. (Genesisi 1:27) Loko kusho kutsi badalwa ngendlela yekutsi bakhone kuveta buntfu baNkulunkulu lobufaka ekhatsi kuthula nelutsandvo. (1 KubaseKhorinte 14:33; 1 Johane 4:8) Nobe kunjalo, bo-Adamu na-Eva abazange bamlalele Nkulunkulu futsi bona. Ngenca yaloko, sonkhe satfola lifa lelisono nekufa. (KubaseRoma 5:12) Ngenca yalesono, ngalesinye sikhatsi siba nemicabango lemibi kantsi labanye bantfu benta tintfo letimbi letihambisana nebudlova.—Genesisi 6:5; Makho 7:21, 22.
HULUMENDE WEBANTFU
Nkulunkulu akasidalanga ngendlela yekutsi sikhone kutibusa. LiBhayibeli litsi: “Akusiko kwemuntfu kutsi aticondzisele yena imphilo yakhe.” (Jeremiya 10:23) Ngenca yalesosizatfu, bohulumende bebantfu abakhoni kucedza timphi kanye nebudlova ngalokuphelele.
SATHANE NEMADIMONI AKHE
LiBhayibheli liveta kutsi “live lisemandleni alomubi.” (1 Johane 5:19) ‘Lolomubi’ ubitwa ngekutsi nguSathane Develi, futsi ungumbulali. (Johane 8:44) Akanye netidalwa letimbi letingumoya babangela kutsi kube nemphi kanye nebudlova.—Sembulo 12:9, 12
Bantfu angeke bakhone kucedza tintfo letenta kutsi kube nemphi kanye nebudlova kodvwa nguNkulunkulu longaticedza.